سوڭعى 7-8 جىل شاماسىندا قازاق ەستراداسىندا ەرەكشە تانىمالدىققا يە بولىپ، ونەرىمەن كوپتى ءتانتى ەتكەن قايرات نۇرتاس سوڭعى ۋاقىتتا قازاقى تاربيە كورگەن جاسقا ءتان ەمەس جات قىلىقتار تانىتۋدا. مۇنى ءبىز قايراتتىڭ عالامتوردى شارلاپ جۇرگەن ءتۇرلى وتىرىستارداعى «قىزىقتارى» جازىلعان ۆيدەولارعا قاتىستى ايتىپ وتىرعانىمىز جوق.

جەلتوقسان ايىندا استانا مەن الماتىدا دۇركىرەتىپ كونسەرت وتكىزگەن ءانشىمىز وعان رەسەيدەن ارنايى بارىپ، تيماتي مەن نيۋشا دەگەن ەكى ءانشىنى الدىرتتى. راس، قازاق جاستارىنىڭ اراسىندا بۇلاردى تىڭدايتىندار، ءتىپتى، ونەرىنە تابىناتىندار جەتىپ ارتىلادى. ءبىراق، ەلىمىزدە كاتوليك ءدىنىن ۇستاناتىندار بار ەكەن دەپ كۇندە ريم پاپاسىن قوناق ەتە المايتىنىمىز سياقتى، ۇلتتىق تانىمىمىزعا جات وسى بىرەۋلەردى شاقىرماسا دا قايراتتىڭ كونسەرتى وتپەي قالماس ەدى عوي. ونىمەن قويماي، اقپارات قۇرالدارى «قايرات كونسەرتىنە كەلگەن رەسەيلىك انشىلەرگە 89 ميلليون تەڭگە اقشا تولەپتى»، - دەگەندى جارىسا جازدى. بۇل دا انشىگە دەگەن سوڭعى ءۇمىتى سونبەگەن تىڭدارماننىڭ كوڭىلىنە قاياۋ تۇسىرگەنى انىق.

ال، «…يا ۆووبششە نە مەستنىي.
دا، ي بەز پروپيسكي.
نۋ، ا چە كراساۋچيك، مەنيا ليۋبيات كيسكي،
101 روزا، پوپولنيايا سپيسكي، و كاكايا ج..ا،

كاكيە س..كي، سلىش داي-كا نومەروك بىسترو...»، - دەگەن سياقتى دورەكى ماتىندەردى ءان ەتىپ ايتىپ جۇرگەن تيماتيدەي انشىلەر كەيبىر شالا ساۋات قازاقتارعا بولماسا، بىلايعى جۇرتقا ەش قىزىق ەمەس. مۇنى ءبىر بىلسە، قايرات ءبىلۋى ءتيىس ەدى. الايدا، ولاي بولمادى. «مەن ءبىرىنشى بولىپ تيماتيدى الدىرتتىم، نيۋشا مەنىڭ كونسەرتىمە ارنايى كەلدى» دەگەن ماقتان قىمبات بولعان سىڭايلى بارىنەن.

حوش. بولعان ءىس بولدى. تيماتي كەتتى. ءىس ءبىتتى. تىڭدارماندارىمەن بايلانىس ۇستايتىن، ولاردىڭ اراسىنداعى پىكىر اۋانىن زەردەلەيتىن ءانشى بولسا،  بۇدان كەيىنگى جەردە اياعىن اڭدىپ باسار ەدى عوي. ولاي دا بولمادى. تاعى دا داڭعازالىققا، داراقىلىققا سالدى. باسقا اينالىسار تۇگى جوقتاي، قاڭتاردىڭ ايازىندا قوستانايعا بارىپ، حريستيان جاماعاتىمەن بىرگە «شوقىنۋ مەيرامىندا» سۋعا ءتۇستى. ونى تاعى دا «مەنى كوردىڭدەر مە؟» دەگەندەي عالامتورعا جاريالادى. بۇنى دا بوس داراقىلىق دەگەننەن باسقاشا باعالاي المايسىز. قانشا جەردەن رەسەي انشىلەرىنە اقشا تولەپ، بىرەر اۋىز ءان ايتتىرسىن، قانشا جەردەن سولاردىڭ مەيرامىن تويلاسىن، ءتىپتى، شوقىنىپ كەتسە دە ورىستار قايراتتى كەرەك تە قىلمايدى. شىمكەنتشە ايتقاندا، قانشا جەردەن «جىرتىلسا دا»، ولار ءۇشىن كوپ «چۋركانىڭ» ءبىرى بوپ قالا بەرەدى. قايراتقا دەيىن دە تالاي ءانشى رەسەي جاققا قاراپ ىڭىلداعان. قانشاسى ماسكەۋ، پەتەربور بارىپ، سىڭىسە الماي قايتىپ كەلگەن. ەندىگىلەر دە سويتەدى.

قالاي بولعاندا دا ءوز بالامىزدىڭ بۇلاي اداسۋى ءجون ەمەس. سەزىمنىڭ نازىك قىلىن شەرتەتىن ويلى اندەرمەن كوپتىڭ جۇرەگىن جاۋلاعان ەرەكشە دارىن يەسىنىڭ كوز الدىمىزدا بۇلاي جەكسۇرىن كەيىپكە ەنىپ بارا جاتقانى جانىمىزعا باتادى. ءالى دە كەش ەمەس، ءانشى وتكەن-كەتكەندى سالماقتاپ، اينالاسىمەن اقىلداسىپ، تىڭداۋشىلارىنىڭ پىكىرىنە قۇلاق ءتۇرىپ وي تۇيەدى دەگەن سەنىمدەمىز.

ايگۇل ساپارحان قىزى

شىمكەنت