تۇركى حالىقتارىنىڭ حالىقارالىق كونگرەسى ءال-فارابي اتىنداعى قازاق ۇلتتىق ۋنيۆەرسيتەتىنە «تۇركى ەلدەرى اراسىنداعى ۇزدىك جوو» اتاعىن بەردى. حالىقارالىق ماراپاتقا لايىق بولعان قازاقستاندىق جوعارى وقۋ ورنىن تۇركى حالىقتارى حالىقارالىق كونگرەسىنىڭ پرەزيدەنتى ياحيا يۋسيفوگلى الييەۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ ۇجىمىمەن كەزدەسۋ بارىسىندا حابارلادى.
الەمنىڭ التى اكادەمياسىنىڭ اكادەميگى، تۇركى حالىقتارى حالىقارالىق كونگرەسىنىڭ پرەزيدەنتى، دوكتور ياحيا الييەۆ بۇل شەشىم 47 تۇركى حالىقتارى مەن ۇلىستارىن بىرىكتىرىپ وتىرعان حالىقارالىق كونگرەستىڭ 2015 جىلى جەلتوقسان ايىندا وتكەن وتىرىسىندا ءبىراۋىزدان ماقۇلدانعانىن ايتتى. سودان سوڭ ول قازۇۋ رەكتورى، اكادەميك عالىم مۇتانوۆتى «تۇركى الەمىنە سىڭىرگەن ەڭبەگى ءۇشىن» اتتى التىن توسبەلگىمەن ماراپاتتادى.
«مەن الەمنىڭ كوپتەگەن ۇزدىك ۋنيۆەرسيتەتتەرىندە بولدىم. ءبىراق، تەك قازۇۋ قايتا قۇرىلۋ اۋقىمدىلىعىمەن جانە الەمدىك رەيتينگتە ازعانا ۋاقىتتىڭ ىشىندە ايتارلىقتاي جوعارى كورسەتكىشكە قول جەتكىزگەنىمەن تاڭقالدىرادى. قازاقستاندىق ۋنيۆەرسيتەتتىڭ جوعارى كورسەتكىشكە قول جەتكىزگەنى مەملەكەت تاراپىنان ادامي كاپيتالدى دامىتۋعا ايتارلىقتاي كوڭىل ءبولىنىپ وتىرعاندىعىنىڭ كورسەتكىشى جانە بولاشاققا جاسالعان ينۆەستيسيا دەپ قاراستىرۋعا بولادى. وسكەلەڭ ۇرپاقتىڭ بولاشاعىنا قامقورلىق تانىتۋدىڭ بىردەن ءبىر ۇلگىسى عىلىم مەن بىلىمگە كوپ كوڭىل ءبولىپ جۇرگەن الەمدىك كوشباسشىلاردىڭ ءبىرى، ق ر پرەزيدەنتى ن.نازاربايەۆ»، – دەدى ياحيا الييەۆ. قازۇۋ-دىڭ ۇزدىك ۋنيۆەرسيتەتتەر قاتارىندا ەكەنىن QS World University Rankings حالىقارالىق رەيتينگ ناتيجەلەرىنەن بايقاۋعا بولاتىنىن اتاپ وتكەن ءجون. ۋنيۆەرسيتەت حالىقارالىق رەيتينگتە 275-ورىندا تۇرسا، ال تۇركى ەلدەرى اراسىندا بۇل رەيتينگتە ءبىرىنشى بولىپ، كوش باستاپ تۇر.
ماراپاتتاۋ ءراسىمى ءال-فارابي اتىنداعى قازاق ۇلتتىق ۋنيۆەرسيتەتىنىڭ تۋىلعان كۇنىمەن تۇسپا-تۇس كەلدى. 15 قاڭتاردا قازۇۋ-دىڭ نەگىزى قالانعانىنا 82 جىل تولدى. حالىقارالىق ماراپات قازۇۋ ۇجىمى ءۇشىن عىلىم مەن ءبىلىم سالاسىندا جاڭا جەتىستىكتەر مەن ماراپاتتارعا شابىتتاندىرار جاعىمدى جاڭالىق بولدى.
