بۇگىن ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ ءماجىلىس پەن بارلىق دەڭگەيدەگى ءماسليحاتتار دەپۋتاتتارىن سايلاۋ ءتارتىبىن ءتۇسىندىردى، - دەپ حابارلايدى «قامشى» پورتالى.

وسى جەردە 20 ناۋرىزدا وتكەلى وتىرعان سايلاۋدى ۇيىمداستىرۋعا قازىنادان 7 ميلليارد 985 ميلليون 300 مىڭ تەڭگە بولىنگەنىن ايتا كەتكەن ءجون.

اتالعان سايلاۋ اياسىندا ماجىلىسكە 107 دەپۋتات، ونىڭ ىشىندە 9-ى قازاقستان حالقى اسسامبلەياسى اتىنان سايلانسا، وبلىستىق، قالالىق، اۋداندىق ءماسليحاتتارعا 3335 دەپۋتات وكىلەتىك الماق.

سايلاۋ نەگىزىنەن ۇسىنۋ، تىركەۋ، سايلاۋ الدى ۇگىت دەپ اتالاتىن ءۇش كەزەڭ بويىنشا وتەدى. ساياسي پارتيالار اتىنان كانديداتتاردى ۇسىنۋ بۇگىن باستالىپ، 8 اقپانعا دەيىن جالعاسادى. كانديداتتار ۇسىنۋ تەك ساياسي پارتيالاردىڭ جانە حالىق اسسامبلەياسى كەڭەسىنىڭ عانا قۇزىرىنداعى ماسەلە ەكەنى بەلگىلى. ال، اسسامبلە اتىنان ۇسىنىستار 20-29 اقپان ارالىعىندا قابىلدانادى. ءماسليحات دەپۋتاتتىعىنا كانديداتتاردى ۇسىنۋ 19 اقپانعا دەيىن جالعاسادى.

تىركەۋ كەزەڭىنە كەلەر بولساق، پارتيالىق تىزىمدەردى تىركەۋدى وسك 19 اقپانعا دەيىن جۇرگىزەدى. قحا –دان ۇسىنىلعان كانديداتتاردى تىركەۋ 25 اقپان مەن 5 ناۋرىز ارالىعىندا وتەدى. اۋماقتىق سايلاۋ كوميسسيالارى ءماسليحات دەپۋتاتتىعىنا ۇمىتكەرلەردى 23 اقپانعا دەيىن تىركەپ بىتۋلەرى ءتيىس.

 سايلاۋدىڭ ەڭ قىزىقتى ءساتى ۇگىت-ناسيحات كەزەڭىنە كەلەر بولساق، ول پارتيالىق ءتىزىم بويىنشا سايلاۋعا تۇسەتىندەر ءۇشىن 20 اقپاندا باستالىپ، 18 ناۋرىزعا دەيىن سوزىلادى. قحا اتىنان تۇسەتىن ۇمىتكەرلەر 6-19 ناۋرىز ارالىعىندا ۇگىت-ناسيحات جۇمىستارىن جۇرگىزبەك. ءماسليحات سايلاۋىنىڭ ۇگىت-ناسيحات شارالارى 24 اقپان مەن 18 ناۋرىز ارالىعىندا وتەدى.

 سونىمەن، سايلاۋ كۇنى سايلاۋشىنىڭ قولىنا 3 بىردەي بيۋللەتەن بەرىلەدى. ونىڭ ءبىرى – ءماجىلىس دەپۋتاتتىعىنا ۇمىتكەر ۇسىنعان پارتيالاردىڭ ءتىزىمى بولسا، قالعان ەكەۋى وبلىستىق، قالالىق، اۋداندىق ءماسليحات دەپۋتتاتتىعىنا ۇمىتكەرلەردىڭ ءتىزىمى بولماق. مۇنىڭ بارلىعى جەر-جەرلەردەگى سايلاۋ ۋچاسكەلەرىندەگى قىزمەتكەرلەر ءۇشىن ءبىرشاما اۋىرتپالىقتار تۋعىزارى انىق. الايدا، وسك باسشىسى سايلاۋدى ءتيىستى دەڭگەيدە وتكىزۋگە قاجەت بارلىق مۇمكىندىكتەرگە يەمىز دەپ وتىر.