«جۇڭگو ءتىلىن بىلمەيتىن ءھام جەتىك مەڭگەرمەگەن جۇمىسشىلار ءوز قىزمەتتەرىندە جوعارىلاۋ مۇمكىندىگىنەن ايىرىلىپ وتىر. تىپتەن، كومپانيادان شىعىپ قالۋ ءقاۋپى تونگەن. ال ەگەر قىتايدىڭ كونە ءتىلىن وقىماي كەلگەن جاعدايدا تانىس پەن بەلگىلى ءبىر سوماداعى قاراجات ارقىلى عانا جۇمىسقا ورنالاسۋعا بولادى»، — دەپ جازادى «اقتوبە تايمس» «سنپس-اقتوبەمۇنايگاز» كومپانياسىنداعى باسسىزدىقتى اشكەرەلەپ.
«سنپس-اقتوبەمۇنايگاز» كومپانياسىنىڭ جەتەكشىلەرى ءوزىنىڭ جاڭا زاڭدارىمەن جۇمىسشىلارىن سارساڭعا سالىپ، ولاردىڭ اشۋى مەن قارسىلىعىن تۋدىرىپ وتىر. بۇل قۇجاتتار قازاقستاندىقتاردىڭ ەڭبەك قۇقىقتارىن شەكتەيدى جانە تىلدىك ديسكريميناسيانىڭ اشىق تۇردە كورىنىس بەرۋى بولىپ ەسەپتەلەدى. بۇعان دەيىن كومپانيا باسشىلارىنىڭ «75% قىزمەتكەرلەر — نادان، ءبىلىمسىز جانە جالقاۋ» دەگەن مالىمدەمەسى جارىق كورگەن بولاتىن.
كومپانيا پرەزيدەنتى ۆان سزيۋنجەننىڭ اۋزىنان شىققان بۇل اڭگىمە وسى جىلدىڭ تامىز ايىنان بەرى جالعاسىپ كەلەدى. بارلىق جۇمىسشى جۇڭگو ءتىلىن بىلۋگە جانە ونى كۇن وتكەن سايىن جەتىلدىرىپ وتىرۋعا مىندەتتى بولىپ شىقتى. ونىمەن قوسا، بايعۇس قازاقتاردىڭ 6 ايدا ءبىر رەت مىندەتتى تۇردە سول تىلدەن ەمتيحان تاپسىرۋى كەرەك ەكەن.
ءوز جەرىمىزدە ءجۇرىپ وزگەگە جەم بولعانىمىزبەن قوسا، سول ۇلتتىڭ ءتىلى مەن ءداستۇرىن قابىلداۋعا ءماجبۇر بولىپ قالعانىمىز سۇمدىق ەمەس پە؟! كەشە ورىستىڭ «كرەششەنيەسىندە» سۋعا ءتۇسىپ، شوقىنۋدى ۇيرەنسەك، بۇگىن قىتايدىڭ «يەروگليفتەرىن» جاتتاپ ءجۇرمىز…
دەرەككوز:"ۇلت" پورتالى
