رەسەيلىك ريا-نوۆوستي اگەنتتىگى قازاقستاننىڭ پرەمەر-مينيسترى كارىم ءماسىموۆتىڭ ۇلتتىق ۆاليۋتا تەڭگەنىڭ باعامىنا قاتىستى پىكىرىن جاريالادى.
وندا پرەمەر-مينيستر تەڭگەنىڭ باعامى بەلگىلى ءبىر تەپە-تەڭدىك نۇكتەسىنە جاقىنداپ قالعانىن ايتقان.
«ءبىز سالىستىرمالى تۇردە تەپە-تەڭدىك نۇكتەسىنە جاقىنداپ قالدىق دەپ ويلايمىن. جاقىن بولاشاقتا، مەنىڭ ويىمشا، بىرنەشە اپتانىڭ ىشىندە، دوللارعا شاققانداعى رۋبل باعامىنىڭ دا، تەڭگە باعامىنىڭ دا تۇراقتالعانىن كورەتىن بولامىز. مەن بۇل وتە ماڭىزدى دەپ ويلايمىن. سول تەڭدىك نۇكتەسىنە جەتكەندە جاعداي تۇراقتالادى جانە ۇزاق مەرزىمدى بولجامدار جاساۋعا مۇمكىندىك تۋادى»، - دەگەن «ساۋەگەيلىك» تانىتادى ك. ءماسىموۆ.
ونىڭ بۇل ايتقانىنان ۇققانىمىز، ۇكىمەت باسىنداعىلار نە تەڭگەنىڭ وسىنشاما قۇلدىرايتىنىن كۇنى بۇرىن بىلگەن، نە قازىرگى قارجى نارىعىندا بولىپ جاتقان جاعدايلارعا قاتىستى قانداي دا ءبىر ناقتى زەرتتەۋ جۇرگىزىپ وتىرعان جوق. ايتپەسە، «ۇلتتىق ۆاليۋتانىڭ قۇلدىراۋى تەپە-تەڭدىك نۇكتەسىنە جاقىنداپ قالدى» دەگەنى قاي ساسقانى؟ ودان كەيىن، ك. ءماسىموۆ باعامنىڭ ول «نۇكتەگە» جاقىنداپ قالعانىن قانداي نەگىزدەرگە سۇيەنىپ ايتىپ وتىر؟ قانداي كورسەتكىشتەرگە بايلانىستى ۇكىمەت باسشىسى وسىنداي ويعا كەلگەن؟ بۇل، ارينە، ءسىز بەن ءبىز ءۇشىن جۇمباق.
قارجى-ەكونوميكالىق سالاسىنداعى زور ءبىلىم يەسى كەيپىندە سويلەگەن ءماسىموۆ مىرزا سايتقا بىلدىرگەن پىكىرىندە سونداي-اق قازاق ۆاليۋتاسىنىڭ قۇلدىراۋىنا رەسەيدىڭ دە قاتىسى جوق ەمەستىگىن ايتىپ كەتىپتى. ول ءتول ۆاليۋتا باعامىنا بىرىنشىدەن مۇناي باعاسى اسەر ەتسە، ەكىنشىدەن ءرۋبلدىڭ دوللارعا قاتىستى باعامى دا ىقپال ەتەتىنىن جاسىرماعان.
«مەنىڭ ويىمشا، قازىرگى ەكونوميكالىق جاعداي، مۇناي باعاسى، ءرۋبلدىڭ دوللارعا شاققانداعى باعامى تەڭگەنىڭ نەگىزگى ۆاليۋتالارعا قاتىستى باعامىنا ىقپال ەتۋدە. مەنىڭ بولجامىم بويىنشا، قىسقا مەرزىمدى كەزەڭدە مۇناي باعاسىنىڭ قۇلدىراۋى جالعاسا بەرەدى. سوعان ساي تەڭگەنىڭ دە دوللارعا قاتىستى تولقۋى جانە كەرىسىنشە جاعداي ورىن الادى»، - دەگەن سۇحبات يەسىنىڭ سوزدەرىنەن وسى قالايماقانعا سولتۇستىك كورشىمىزدىڭ قالاي دا قاتىسى بار دەگەندى عانا ۇعا الدىق.
ال، ەندى «ۇلتتىق بانك ءۇشىن ايىرباس باعامى ەمەس، ينفلياسياعا سايكەس باعا كورسەتكىشتەرى ماڭىزدى بولىپ وتىر. الايدا، ارينە، ادامدار ءۇشى، ءبارى ءۇشىن ايىرباس باعامى وتە ماڭىزدى» دەگەنىنەن نە تۇسىنۋگە بولاتىنىن ءوزىڭىز باعامداپ كورىڭىز.
سوڭعى ۋاقىتتا پرەمەر-مينيستردىڭ وتاندىق اقپارات قۇرالدارىنان كوپ كورىنبەي كەتۋىنىڭ سەبەبىن رەسەيلىك باق-تا جاريالانعان وسى پىكىرىنەن كەيىن تۇسىنگەندەي بولدىق. تەڭگەنى تەنتىرەتىپ جىبەرىپ، ەل ەكونوميكاسىنا يە بولا الماي قالعان ول كۇن سايىن وتاندىق تەلەارنالاردان وسىنداي جاڭىلتپاشتار ايتىپ وتىرسا، حالىق الدىندا الدەقاشان جەكسۇرىن بولىپ كەتەر مە ەدى، بالكىم؟!
جومارت ابدوللا ۇلى
