وسى اپتادا ەلىمىزدىڭ ورتالىق جانە جەرگىلىكتى اتقارۋشى ورگاندارىندا ءبىرقاتار كادرلىق ءاۋىس-تۇيىس ورىن الدى. سونداي-اق ەلباسى وكىمىمەن ق ر پرەزيدەنتىنىڭ كەڭەسشىسى تاعايىندالىپ، ءبىرقاتار اۋداننىڭ جاڭا اكىمدەرى ءوز جۇمىستارىنا كىرىستى. «قامشى» پورتالى قازاقپاراتقا سىلتەمە جاساپ، وسى اپتا ىشىندە ورىن العان وسى جانە وزگە دە تاعايىنداۋلاردى نازارلارىڭىزعا ۇسىنادى.
سونىمەن مەملەكەت باسشىسى نۇرسۇلتان نازاربايەۆتىڭ وكىمىمەن تالعات امانگەلدى ۇلى مۇسابايەۆ قازاقستان رەسپۋبليكاسى پرەزيدەنتىنىڭ كەڭەسشىسى قىزمەتىنە 2017 جىلعى 31 جەلتوقساندى قوسا العانداعى وكىلەتتىك مەرزىمگە تاعايىندالدى.
ت.مۇسابايەۆ 1951 جىلى 7 قاڭتاردا الماتى وبلىسى جامبىل اۋدانىندا دۇنيەگە كەلگەن. ريگا ازاماتتىق اۆياسيا ينجەنەرلەرى ينستيتۋتىن جانە اقتوبە جوعارى ۇشقىشتار ۋچيليششەسىن بىتىرگەن. قازاقستان رەسپۋبليكاسىنىڭ جانە رەسەي فەدەراسياسىنىڭ ۇشقىش-عارىشكەرى، قازاقستان رەسپۋبليكاسىنىڭ حالىق قاھارمانى جانە رەسەي فەدەراسياسىنىڭ باتىرى. «بايتەرەك» قازاقستان-رەسەي بىرلەسكەن كاسىپورنى» اكسيونەرلىك قوعامىنىڭ باس ديرەكتورى، قازاقستاننىڭ اۋە-عارىش اگەنتتىگىنىڭ ديرەكتورى قىزمەتتەرىن اتقارعان. جاڭا قىزمەتكە تاعايىندالعانعا دەيىن ق ر ينۆەستيسيالار جانە دامۋ مينيسترلىگىنىڭ اەروعارىش كوميتەتىنىڭ ءتوراعاسى بولدى. ءى دارەجەلى «بارىس»، وتان، حالىقتار دوستىعى، اۆستريانىڭ «كۇمىس قىران»، رەسەيدىڭ «1 دارەجەلى ۇلى پەتر» وردەندەرىمەن، كوپتەگەن مەدالدارمەن، قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان.
سونداي-اق مەملەكەت باسشىسىنىڭ وكىمىدەرىمەن دانيار ايتمۇحامەت ۇلى ايتمۇحامەتوۆ قازاقستان رەسپۋبليكاسى ادىلەت مينيسترلىگىنىڭ جاۋاپتى حاتشىسى، ق ر ۇقك ۇكىمەتتىك بايلانىس قىزمەتىنىڭ ديرەكتورى مىندەتىن ۋاقىتشا اتقارۋدان بوساتىلعان مارحات دانيار ۇلى ارۋنوۆ اتالعان قىزمەتتىڭ ديرەكتورى بولىپ تاعايىندالدى.
ينۆەستيسيالار جانە دامۋ مينيسترلىگى ەتيكا جونىندەگى ۋاكىل ءوز قىزمەتىنە كىرىستى. ەندى بۇل مينيسترلىكتەگى ەتيكا جونىندەگى ۋاكىل - تيمۋر سەرىك ۇلى توقتابايەۆ بولادى. ت.توقتابايەۆ ۇلتتىق قاۋىپسىزدىك كوميتەتى اكادەمياسىن، ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىن، كوكشەتاۋ مەملەكەتتىك ۋنيۆەرسيتەتىن ءتامامداعان. ەڭبەك جولىن 2003 جىلى ۇلتتىق قاۋىپسىزدىك كوميتەتىنىڭ ورگاندارىندا وفيسەر قىزمەتتەرىن اتقارىپ، باستاعان. 2006 جىلى «قازگەواقپارات» رەسپۋبليكالىق گەولوگيالىق اقپارات ورتالىعى باسشىسىنىڭ ورىنباسارى قىزمەتىنە تاعايىندالعان. 2008 جىلدان باستاپ ەنەرگەتيكا جانە مينەرالدى رەسۋرستار مينيسترلىگىنىڭ جەر قويناۋلارىن پايدالانۋ دەپارتامەنتىندە ديرەكتور ورىنباسارى، باسقارما باسشىسى قىزمەتتەرىن اتقارعان. 2010 جىلى «تاۋ-كەن-سامۇرىق» ۇلتتىق تاۋ-كەن كومپانياسىندا قۇقىقتىق قامتاماسىز ەتۋ دەپارتامەنتىنىڭ ديرەكتورى قىزمەتىنە تاعايىندالدى. 2011 جىلدىڭ تامىزىنان بەرى سول كەزدەگى يندۋستريا جانە جاڭا تەحنولوگيالار مينيسترلىگىندە جەر قويناۋىن پايدالانۋ دەپارتامەنتى ديرەكتورىنىڭ ورىنباسارى قىزمەتىنە تاعايىندالدى. قازىرگى تاڭدا ينۆەستيسيالار جانە دامۋ مينيسترلىگىنىڭ جەر قويناۋىن پايدالانۋ دەپارتامەنتىنىڭ ديرەكتورى قىزمەتىن اتقارادى.
ەركىن مۇستافا ۇلى شايماعامبەتوۆ ق ر ينۆەستيسيالار جانە دامۋ مينيسترلىگى اەروعارىش كوميتەتى (قازعارىش) جەتەكشىسىنىڭ ۋاقىتشا مىندەتىن اتقارۋشى قىزمەتىنە كىرىسكەنى بەلگىلى بولدى. ول 1974 جىلى قىزىلوردا وبلىسى سىرداريا اۋدانى تاسبوگەت كەنتىندە دۇنيەگە كەلگەن. ۇيلەنگەن، ءبىر ۇلى بار. 1998 جىلى ماسكەۋ مەملەكەتتىك اۆياسيا ينستيتۋتىن ءتامامداعان. قىزمەت جولىن «بايقوڭىر» عارىش ايلاعىندا باستاعان.
قازاقستان رەسپۋبليكاسى سەناتىنىڭ ءتوراعاسى قاسىم-جومارت توقايەۆتىڭ وكىمىمەن سەنات اپپاراتىنىڭ باسشىسى قىزمەتىنە سەرىك ءسىلامجان ۇلى سىدىقوۆ تاعايىندالدى. س.سىدىقوۆ 1962 جىلى تۋعان. س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتن بىتىرگەن. قازاقستان رەسپۋبليكاسىنىڭ پارلامەنتىندە 1995 جىلدان جۇمىس جاسايدى. قازاقستان رەسپۋبليكاسى پارلامەنتى سەناتىندا كونسۋلتانت، قۇىقتىق ساراپتاما ءبولىمىنىڭ سەكتور مەڭگەرۋشىسى، ساراپتاما ءبولىمى مەڭگەرۋشىسىنىڭ ورىنباسارى، اكىمشىلىك ءبولىمىنىڭ مەڭگەرۋشىسى، اپپارات باسشىسىنىڭ ورىنباسارى قىزمەتتەرىن اتقاردى. «قۇرمەت» وردەنىمەن، «ۇزدىك مەملەكەتتىك قىزمەتشى» توسبەلگىسىمەن ماراپاتتالعان.
وتىرار اۋدانىنىڭ جاڭا اكىمى بولىپ ەرلان ايتاحانوۆ تاعايىندالدى. ەرلان قۋانىش ۇلى 1971 جىلى تۋعان، ءبىلىمى جوعارى، ماماندىعى بويىنشا ەكونوميست، زاڭگەر، ەكونوميكا عىلىمدارىنىڭ كانديداتى. ەڭبەك جولىن قازاقستان بانكتەرىنىڭ بىرىندە ەكونوميست بولىپ باستاعان. كەيىن «قازاقستان تەمىر جولى» رەسپۋبليكالىق مەملەكەتتىك كاسىپورنىندا باسشىلىق قىزمەتتەردە بولدى. قازاقستان رەسپۋبليكاسى تابيعي مونوپوليالاردى رەتتەۋ جانە باسەكەلەستىكتى قورعاۋ اگەنتتىگىندە ءتۇرلى قىزمەتتە بولدى. ەرلان قۋانىش ۇلى قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك ينسپەكتورى قىزمەتتەرىن اتقارعان. ال 2014 جىلدىڭ قازانىنان وقو اكىمىنىڭ ورىنباسارى بولىپ ەڭبەك ەتتى.
شقو اكىمىنىڭ وكىمىمەن ۇلان اۋدانىنىڭ جاڭا اكىمى تاعايىندالدى. بۇل قىزمەتكە داۋلەت باتىربايەۆ كەلدى. ول 2012 جىلدان اتالعان اۋدان اكىمىنىڭ ورىنباسارى، ال 2014 جىلدان اۋدان اكىمىنىڭ م.ا. بولىپ قىزمەت ەتتى. داۋلەت باتىربايەۆ 1976 جىلى سەمەي قالاسىندا تۋعان.1998 جىلى - «سەمەي» مەملەكەتىك ۋنيۆەرسيتەتىندە، 2001 جىلى نوۆوسيبيرسك گۋمانيتارلىق ينستيتۋتىندا وقىدى. 1999 جىلدان بيزنەس-قۇرىلىمدارىندا جۇمىس ىستەدى. مەملەكەتتىك قىزمەتتەگى جۇمىسىن وسكەمەننىڭ كاسىپكەرلىك، اۋىل شارۋاشىلىعى جانە ۆەتەريناريا باسقىرماسىندا 2009 جىلى باستادى. كەيىن مەنوۆنوۆ اۋىلدىق وكرۋگى اكىمىنىڭ ورىنباسارى بولدى. 2011-2012 جىلدارى شقو جولاۋشى كولىگى جانە اۆتوموبيل جولدارى باسقارماسىنىڭ ءبولىم باسشىسى بولىپ قىزمەت ەتتى. 2012 جىلدىڭ شىلدەسىندە ۇلان اۋدانى اكىمىنىڭ ورىنباسارى بولىپ تاعايىندالدى. 2014 جىلدىڭ جەلتوقسانىنان اۋدان اكىمى مىندەتىن ورىندادى.
قاراعاندى وبلىسى ساتبايەۆ قالاسىنىڭ اكىمى بولىپ 40 جاستاعى اسقار ىدىرىسوۆ تاعايىندالدى. ول وسىعان دەيىن «نۇر وتان» پارتياسىنىڭ ورتالىق اپپاراتىندا قىزمەت ەتكەن. ا. ىدىرىسوۆ 1975 جىلى تۋعان. ەكى جوعارى ءبىلىمى بار. 1997 جىلى ءو. بايقوڭىروۆ اتىنداعى جەزقازعان ۋنيۆەرسيتەتىن، ال 2005 جىلى ق. ساتبايەۆ اتىنداعى قازاق ۇلتتىق ۋنيۆەرسيتەتىن اياقتادى. 1999 جىلدان باستاپ مەملەكەتتىك قىزمەتتە. ورتالىق ورگانداردا ءتۇرلى قىزمەتتەردى اتقاردى. ق ر شاعىن بيزنەستى قولداۋ جونىندەگى اگەنتتىكتە جەتەكشى مامان، باس مامان بولىپ قىزمەت ىستەدى. 2008 جىلى ق ر يندۋستريا جانە ساۋدا مينيسترلىگىنىڭ ستراتەگيالىق جوسپارلاۋ جانە تالداۋ دەپارتامەنتىنىڭ ديرەكتورى قىزمەتىنە تاعايىندالدى. 2008-2012 جىلدارى ق ر پرەزيدەنتى اكىمشىلىگىنىڭ مەملەكەتتىك باقىلاۋ جانە ۇيىمداستىرۋ-اۋماقتىق جۇمىس ءبولىمىنىڭ مەملەكەتتىك ينسپەكتورى بولىپ ىستەدى. 2012 جىلدىڭ قازان ايىنان اسقار ىدىرىسوۆ قاراعاندى وبلىسى اكىمى اپپاراتىنىڭ باسشىسى، كەيىن ساتبايەۆ اكىمى قىزمەتتەرىن اتقارىپ كەلدى. وسى تاعايىنداۋعا دەيىن استاناداعى «نۇر وتان» پارتياسىنىڭ ورتالىق اپپاراتىندا اۋديت قىزمەتىنىڭ باسشىسى بولعان.
ميربولات سۇيەۋ ۇلى نۇرتازين ق ر مەملەكەتتىك قىزمەت ىستەرى مينيسترلىگى بقو بويىنشا دەپارتامەنتىنىڭ باسشىسى، ادەپ جونىندەگى كەڭەسىنىڭ ءتوراعاسى بولىپ تاعايىندالدى. 1956 جىلى قازتالوۆ اۋدانى تاسكۇتىر ەلدى مەكەنىندە دۇنيەگە كەلگەن م.س.نۇرتازين ساراتوۆ مەملەكەتتىك پەداگوگيكالىق ينستيتۋتىن، ورتالىق ازيا ۋنيۆەرسيتەتىن بىتىرگەن. ەڭبەك جولىن كۋزنەسوۆ مەكتەبىندە ءمۇعالىم بولىپ باستاعان ول سودان كەيىن كامەن (ءقازىر تاسقالا) اۋداندىق پارتيا كوميتەتىنىڭ نۇسقاۋشىسى، تاسقالا اۋدانى اكىمى اپپاراتى ءبولىم مەڭگەرۋشىسىنىڭ ورىنباسارى، مەڭگەرۋشىسى، بقو اكىمى اپپاراتى ۇيىمداستىرۋ-باقىلاۋ جانە كادر جۇمىستارىنىڭ باس مامانى قىزمەتتەرىن اتقاردى. 2000-2014 جىلدارى ق ر مەملەكەتتىك قىزمەت ىستەرى اگەنتتىگى بقو بويىنشا دەپارتامەنتى باسشىسىنىڭ ورىنباسارى، تارتىپتىك كەڭەس حاتشىلىعىنىڭ مەڭگەرۋشىسى، 2014 جىلدان ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى بقو بويىنشا تارتىپتىك كەڭەس حاتشىلىعىنىڭ مەڭگەرۋشىسى، باسشىنىڭ ورىنباسارى - تارتىپتىك كەڭەس ءتوراعاسى مىندەتىن اتقارۋشى بولدى.
«سامۇرىق-قازىنا» اق قۇقىقتىق جانە تاۋەكەلدەر باسقارۋ جونىندەگى باسقارۋشى ديرەكتور بولىپ عاني بيتەنوۆتاعايىندالدى. ول ق ر پرەزيدەنتى جانىنداعى قازاق مەنەدجمەنت، ەكونوميكا جانە بولجاۋ ينستيتۋتىن (كيمەپ) ءبىتىرىپ، گارۆارد ۋنيۆەرسيتەتى مەن باسقا دا تانىمال حالىقارالىق ينستيتۋتتاردا بىلىكتىلىكتى ارتتىرۋ كۋرستارىنان وتكەن. ونىڭ قۇقىق دوكتورى (DoctorofCivilLaw)، McGillUniversity (كانادا، مونرەال ق.) اتاعى بار جانە حالىقارالىق شانحاي اربيتراج ورتالىعىنىڭ ءاربيترى سەكىلدى تاجىريبەلەرى دە جەتكىلىكتى. حالىقارالىق (Bracewell&Giuliani) جانە قازاقستاندىق زاڭگەرلىك كومپانيالارىندا 10 جىلدان استام ۋاقىت جەتەكشى قىزمەتتەر اتقارعان. جۇزدەگەن ميلليون دوللارلىق اۋقىمدى جوبالاردا ەۋروپا قايتا قۇرۋ جانە دامۋ بانكى، MerrillLynchInternational، JPMorganChaseBankN.A. سىندى الەمدىك دەڭگەيدەگى ءىرى ينۆەستيسيالىق بانكتەردىڭ مۇددەسىنە وكىلدىك جاساعان.
ستەپنوگور قالاسىندا جەرگىلىكتى پوليسيا قىزمەتىنىڭ باسشىسى تاعايىندالدى. بۇل قىزمەتكە اسەت وماروۆ كەلدى. ول 1980 جىلى تۋعان. 2004 جىلى قاراعاندى مەملەكەتتىك ۋنيۆەرسيتەتىن زاڭگەر ماماندىعى بويىنشا ءتامامداعان. ىشكى ىستەر ورگاندارىندا 1998 جىلدان باستاپ ەڭبەك ەتەدى. 2012 جىلدىڭ قىركۇيەك ايىنان باستاپ، قازىرگى كەزگە دەيىن ستەپنوگور قالالىق ءىىب باسشىسىنىڭ ورىنباسارى بولدى.
