سايلاۋعا بولىنگەن بيۋدجەت قاراجاتىنىڭ ءار تەڭگەسىنە ۇقىپتىلىقپەن قاراۋىمىز كەرەك. بۇگىن ق ر پارلامەنتى ءماجىلىسى مەن ءماسليحات دەپۋتاتتارى سايلاۋىن ازىرلەۋ جانە ۇيىمداستىرۋ ماسەلەلەرى جونىندەگى رەسپۋبليكالىق سەمينار-كەڭەستە ءسوز سويلەگەن ق ر ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ وسىلاي دەدى.
«سايلاۋ ورگاندارىنىڭ باستى مىندەتى - سايلاۋدىڭ زاڭدىلىعىن قامتاماسىز ەتۋ، ياعني، سايلاۋ زاڭناماسى مەن جالپىعا بىردەي تانىلعان حالىقارالىق ۇستانىمداردىڭ تالاپتارىنا سايكەس ءادىل جانە اشىق سايلاۋ ناۋقانىن وتكىزۋ»، - دەدى ق.تۇرعانقۇلوۆ.
سونىمەن قاتار ورتالىق سايلاۋ كوميسسياسىنىڭ ءتوراعاسى كەڭەسكە قاتىسۋشىلاردىڭ نازارىن ساياسي ناۋقاندى وتكىزۋگە بولىنگەن بيۋدجەت قاراجاتىن ۇنەمدەۋ ماسەلەسىنە ايرىقشا نازار اۋدارتتى. «قازىرگى كۇردەلى ەكونوميكالىق جاعدايدا قاراجاتتىڭ ءتيىمسىز جۇمسالۋىن بولدىرماۋ جانە ەلباسىنىڭ ءاربىر بيۋدجەت تەڭگەسىنە ۇقىپتى قاراۋ تۋرالى نۇسقاۋىن ناقتى ۇستانۋىمىز قاجەت»، - دەدى ول.
ءسوز سوڭىندا ول سەمينار قاتىسۋشىلارىنا ورتالىق سايلاۋ كوميسياسى اتقارعان دايىندىق جۇمىستارى، كوميسسيانىڭ اعىمداعى قىزمەتى مەن سايلاۋ ناۋقانىنىڭ بارىسى تۋرالى قىسقاشا اقپارات بەرىپ ءوتتى. سەمينارعا وبلىستىق، استانا مەن الماتى قالالىق سايلاۋ كوميسسيالارىنىڭ ءتوراعالارى مەن حاتشىلارى، ەلىمىزدىڭ ساياسي پارتيالارىنىڭ وكىلدەرى، سونداي-اق سايلاۋ سالاسىندا قىزمەت ەتەتىن حالىقارالىق ۇيىمداردىڭ وكىلدەرى قاتىسۋدا.
