شىعىس ەۋروپا مەن ورتالىق ازياداعى QS-تىڭ (ۇلىبريتانيا) ايماقتىق ديرەكتورى زويا زايسيەۆا ءال-فارابي اتىنداعى قازاق ۇلتتىق ۋنيۆەرسيتەتى باسشىلىعىمەن كەزدەستى، - دەپ حابارلايدى «قامشى» پورتالى وقۋ ورنىنىڭ باسپا ءسوز قىزمەتىنە سىلتەمە جاساپ.
كەزدەسۋدە جوعارى وقۋ ورنىنىڭ رەيتينگ كورسەتكىشتەرىن جاقسارتۋ ءۇشىن ۋنيۆەرسيتەت قىزمەتىنىڭ نەگىزگى ماسەلەلەرى تالقىلاندى. زويا زايسيەۆا قازۇۋ-دىڭ سوڭعى 3 جىلداعى قىزمەتىن جوعارى باعالادى. QS وتكىزگەن كوپتەگەن حالىقارالىق سەمينارلاردا قازۇۋ-دىڭ الەمدىك رەيتينگتە جوعارى كورسەتكىشكە قول جەتكىزۋگە جاساعان قادامدارى جاقسى ۇلگى رەتىندە اتالۋدا. سونىڭ ىشىندە ۋنيۆەرسيتەتتىڭ ناتيجەگە باعىتتالعان باسقارۋ ۇلگىسى، ينتەرناسيونالداندىرۋ ستراتەگياسى مەن عالىمداردىڭ ماقالا جاريالاۋ قىزمەتىن بەلسەندى قولداۋ تاجىريبەسى ۇلكەن قىزىعۋشىلىق تۋدىرادى. قازۇۋ تاجىريبەسىن تمد جانە ورتالىق ازيا ەلدەرىنىڭ جوو-دا زەرتتەلىپ، قولدانىلىپ كەلەدى.
زويا زايسيەۆا قازۇۋ-دىڭ ينفراقۇرىلىمدىق نىساندارىمەن تانىسىپ بولعاننان كەيىن، قازۇۋ-دىڭ الەمنىڭ ەڭ ۇزدىك 200 ۋنيۆەرسيتەتتەر قاتارىنا قوسىلۋ ۇمتىلىسى اۋقىمدى عىلىمي جوبالاردى جۇزەگە اسىرۋ مەن وزەكتى ماسەلەلەرگە بايلانىستى حالىقارالىق ۇيىمدارمەن بايلانىس ورناتۋ ارقىلى جۇزەگە اسىپ جاتقاندىعىنا كوز جەتكىزدى. ونىڭ پىكىرىنشە، قازۇۋ كورەيانىڭ جەتەكشى ۋنيۆەرسيتەتتەرىمەن بىرلەسىپ اشقان مەديسينالىق ورتالىق پەن قوعامدىق دەنساۋلىق ساقتاۋ جوعارى مەكتەبىنىڭ (قدسم) اشىلۋى زەرتتەۋ جۇمىستارىن اتقارىپ وتىرعان ۋنيۆەرسيتەت ءۇشىن ۇلكەن جەتىستىك. قازۇۋ-دىڭ بۇۇ اكادەميالىق ىقپالدىلىق بويىنشا جاھانداق حابى بولۋى، گەرمانيا، جاپونيا مەن پاكىستاننىڭ اكادەميالىق ينستيتۋتتارىندا قازۇۋ ورتالىعىنىڭ اشىلۋى، ۋنيۆەرسيتەت اۋماعىندا Sumsung، HP، Microsoft سياقتى الەمدىك كومپانيالارمەن بىرلەسىپ عىلىمي-زەرتتەۋ لابوراتوريالاردىڭ جۇمىس جاساۋى ۋنيۆەرسيتەتتىڭ كۇن سايىن ارتىپ كەلە جاتقان اكادەميالىق ىقپالدىلىعى مەن جۇمىس بەرۋشىلەردىڭ اراسىنداعى بەدەلىنىڭ، جوعارى عىلىمي الەۋەتىنىڭ دالەلى.
ACCELS، Erasmus Mundus-پەن ارىپتەستىك پەن ءبىلىم بەرۋ باعدارلامالارىن ەۋروپالىق اگەنتتىكتەرمەن بىرلەسىپ تولىق حالىقارالىق اككرەديتاسيالاۋ شەتەلدىك ستۋدەنتتەردىڭ قىزىعۋشىلىعىن ارتتىرۋدا. شىعىس ەۋروپا مەن ورتالىق ازياداعى ايماقتىق ديرەكتورى زويا زايسيەۆا: «قازاقستانداعى جوعارى ءبىلىمنىڭ study-destination ەلى بولۋعا (ءبىلىم الۋ ورنىنا) نەمەسە شەتەلدىك ستۋدەنتتەردى «تارتۋ ورتالىعىنا» اينالۋعا مۇمكىندىگى بار. ۇلكەن كادرلىق الەۋەتى مەن مۇمكىندىكتەرى بار ءال-فارابي اتىنداعى قازۇۋ كولەمدى قابىلداۋدى جۇزەگە اسىراتىن ءبىرىنشى جوو بولادى. ۋنيۆەرسيتەتتىڭ وسى قىزمەت الەۋەتى اۋقىمدى بولعاندىقتان، ول جالپى ۋنيۆەرسيتەت رەيتينگىن باعالاۋ كەزىندە ساپالىق جانە ساندىق كورسەتكىشتەرگە وڭ اسەرىن تيگىزەدى»، - دەپ اتاپ ءوتتى.
پىكىر قالدىرۋ