بۇگىن اقتوبەدە العاش رەت باۋىر الماستىرىلدى. سيرروز دەرتىنە شالدىققان 38 جاستاعى اقتوبەلىك ايەلگە تۋعان ءىنىسى دونور بولۋعا كەلىسىمىن بەرگەن، - دەپ حابارلايدى "قامشى" پورتالى كەرەك-ينفوعا سىلتەمە جاساپ. 
كۇردەلى وتا جەتى ساعاتقا سوزىلدى. ونى وڭتۇستىك كورەيالىق حيرۋرگتار اقتوبەلىك دارىگەرلەرمەن بىرلەسىپ جاسادى. مۇنداي وپەراسيا اقتوبەدە بۇرىن سوڭدى جاسالعان ەمەس. سوندىقتان وتاعا مەديسينا عىلىمدارىنىڭ دوكتورى، پروفەسسور جاقسىلىق دوسقالييەۆ تە قاتىسقان. 
- پاسيەنت بىرنەشە جىلدان بەرى باۋىر سيرروزىمەن اۋىرادى. ەگەر ۋاقىتىلى وتا جاسالماسا، ارتى ولىممەن اياقتالۋى دا مۇمكىن ەدى.اپكەسىنە باۋىرىنىڭ جارتىسىن بەرۋگە 26 جاستاعى ءىنىسى كەلىسكەن بولاتىن. ودان الىنعان ىشكى اعزا 1 جىلدىڭ شاماسىندا قايتادان قالپىنا كەلەدى، -دەيدى اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆ.
بۇگىندە اقتوبە وبلىسىندا 60 ادام باۋىرىن الماستىرۋ ءۇشىن كەزەكتە تۇر. بۇدان وزگە 128 ەمدەلۋشىنىڭ بۇيرەگىنە ترانسپلانتاسيا جاسالۋى كەرەك. الايدا، ناۋقاسقا سايكەس كەلەتىن دونور تابۋ قيىن. سول سەبەپتى اقتوبەلىك دارىگەرلەر جاقىن ارادا ءمايىت دونورلىعىن قولعا الماق. 
اقتوبەلىك دارىگەرلەر بيىلدان باستاپ شەتەلدىك مامانداردىڭ قاتىسۋىنسىز باۋىرعا تراسپلاتاسيا جاساۋدى جوسپارلاپ وتىر. وتا رەسپۋبليكالىق بيۋدجەت ەسەبىنەن تەگىن جاسالادى.