اقتوبەدەگى «ۇلى قامال» ج ش س ۇجىمىمەن كەزدەسۋ كيكىلجىڭمەن باستالدى، - دەپ حابارلايدى «قامشى» پورتالى.
وبلىس اكىمى بەردىبەك ساپاربايەۆتىڭ قازاق تىلىندە سويلەگەن ءسوزىن كومپانيا اۋدارماشىسى قىتايشاعا اۋدارا الماعان. سول كەزدە بەردىبەك ساپاربايەۆ ءتىلماشقا قازاق ءتىلىن بىلمەيتىنىن بەتىنە باسىپ، سىن ايتادى.
كومپانيا باسشىسى، تەك جۇڭگو ءتىلىن عانا تۇسىنەتىن چجان سزيۋن اۋدارماشى مەن اكىم اراسىندا نە اڭگىمە بولىپ جاتقانىن دا تۇسىنە الماي دال بولادى.
ال، اۋدارماشى بولسا ءوزىنىڭ جۇڭگو ازاماتى ەكەنىن، قازاق ءتىلىن بىلمەيتىنىن ايتىپ اقتالعان. اقتالىپ قانا قويماي، قازاقستاندا قازاق ءتىلىن ماڭىزدى دەپ سانامايتىنىن دا بىلدىرگەن.
«مەن جۇڭگو ازاماتىمىن. ورىس ءتىلى قازاقستاندا كەڭ تاراعان، مەن قازاقشا بىلمەيمىن»، - دەپ ءبىراق قايىرعان.
بۇعان وبلىس باسشىسى ودان ءارى بۇلقان-تالقان بولادى.
«ءبىز جاقىندا مەملەكەتتىك حاتشىمەن بىرگە نازاربايەۆ زياتكەرلىك مەكتەبىندە بولدىق. وندا بەس جىلدان بەرى جۇمىس ىستەيتىن اقش ازاماتى قازاق تىلىندە ەركىن سويلەيدى. مەن ودان مۇنىڭ ءمانىن سۇراعاندا، ول «قازاقستاندا تۇرعاننان كەيىن، سول ەلدىڭ مەملەكەتتىك ءتىلىن ءبىلۋ كەرەكپىن» دەپ جاۋاپ بەردى. اقش-تا تۇراتىن قىتايلار اعىلشىن ءتىلىن بىلەدى. ءوزىڭ جۇرگەن ەلدى سىيلاۋ كەرەكسىڭ. سوندىقتان، سىزدەردىڭ اۋدارماشىلارىڭىز قازاق ءتىلىن ءبىلۋى كەرەك. ءسىز ءوزىڭىز دە باسشى رەتىندە قازاقستاننىڭ مەملەكەتتىك ءتىلىن مەڭگەرىپ الۋعا تىرىسىڭىز»، - دەپ كومپانيا باسشىسىنىڭ وزىنە تالاپ قويعان.
بۇعان دەيىن، ءبىز «سنپس-اقتوبەمۇنايگاز» كومپانياسىندا قازاق جۇمىسشىلارى جۇڭگو تىلىنەن سىناق تاپسىرۋعا مىندەتتەلگەنىن جازعان بولاتىنبىز.
