بۇگىن ەلوردادا ب ا ق وكىلدەرىنە ارنالعان «كاسىبي شەبەرلىك جانە جۋرناليستيكا» تاقىرىبىندا سەمينار-ترەنينگ باستالدى، - دەپ حابارلايدى «قامشى» پورتالى.

«تۇركىتىلدەس جۋرناليستەر قورى» قوعامدىق قورى ۇيىمداستىرعان بۇل شاراعا ەلىمىزدىڭ ءبىرقاتار وڭىرىنەن كەلگەن 30-عا جۋىق جۋرناليستەر قاتىسۋدا. ەكى كۇنگە جوسپارلانعان سەمينار-ترەنينگ بارىسىندا قاتىسۋشىلار ەكونوميكالىق جۋرناليستيكا، ونلاين مەديا، سمارتفونداردى جۋرناليستيكادا ءتيىمدى پايدالانۋ، اۋديو-بەينە فايلداردى، سۋرەتتەردى وڭدەۋ، PR جاڭالىقتارى، ستيلدىك ەرەكشەلىك بويىنشا تاجىريبە الماسادى.

شارانىڭ العاشقى كۇنىندە مەديا-ترەنەرلەر – جوبا مەنەدجەرى، ينتەرنەت-ماركەتولوگ نۇرلان جاناي جانە «سۇراق-جاۋاپ» سايتىنىڭ نەگىزىن قالاۋشى ەربول سەرىكباي IT سالاسىنداعى بىلىمدەرىمەن ءبولىستى. سەمينار تىڭداۋشىلارى تەوريالىق ءدارىس الۋمەن شەكتەلمەي، ونى تاجىريبە جۇزىندە جاساپ، بىلىكتىلىكتەرىن ارتتىردى. بىرنەشە توپقا ءبولىنىپ، بەرىلگەن تاپسىرمالار بويىنشا از ۋاقىت ىشىندە جەدەل اقپارات تاراتۋ جولدارىمەن تانىستى.

باعدارلاما بويىنشا شەبەرلىك سىنىبىنىڭ ەكىنشى كۇنىندە «الەۋمەتتىك جەلىلەردى قارجى تابۋ ماقساتىندا پايدالانۋ، ستاتيستيكالىق مالىمەتتەر كوزى،  سايت اشۋ جانە ونىڭ رەيتينگىن ءوسىرۋ جولدارى، حوستينگ جاساۋ، ونلاين-ترانسلياسيا، ۆيدەوتۇسىرىلىمدەر ت.ب. تاقىرىپتاردا دارىستەر جالعاساتىن بولادى.

«بۇل باسقوسۋ قازاق جۋرناليستەرىنىڭ كاسىبي تۇرعىدان شىڭدالۋىنا، زاماناۋي مەديانى تاجىريبە جۇزىندە جەتىك مەڭگەرۋىنە مۇمكىندىك بەرەدى. ءبىزدىڭ نەگىزگى ماقساتىمىز دا – وسى. بۇل جولدا ءبىزدىڭ قىزمەتىمىزگە «شيەۆرون» كومپانياسى دەمەۋشىلىك جاساپ وتىر. اقپارات ماماندارىن مۋلتيمەديالىق جۋرناليستيكا زامانىنا بەيىمدەۋ وتە ماڭىزدى. دالىرەك ايتساق، جۋرناليست ءوزى سۋرەتكە ءتۇسىرىپ، قىسقا ءارى نۇسقا اقپارات ازىرلەپ، سايتقا ورنالاستىرىپ، فوتورەپورتاج جاساپ، سلايد دايىنداپ امبەباپ مامانعا اينالۋى ءتيىس» دەيدى قور پرەزيدەنتى ءنازيا جويامەرگەن قىزى.

ايتا كەتەيىك، «تۇركىتىلدەس جۋرناليستەر قورى» 2014 جىلدىڭ قاراشا ايىندا قۇرىلعان بولاتىن. قوعامدىق قور سودان بەرى تۇركى مەملەكەتتەرىندەگى بۇقارالىق اقپارات قۇرالدارى وكىلدەرىمەن سەرىكتەستىك ورناتىپ، ىسكەرلىك ىنتىماقتاستىقتى ارتتىرۋ باعىتىندا جۇمىس ىستەپ كەلەدى. 2016 جىلداعى قىزمەتىن الماتىدان باستاعان ۇيىمداستىرۋشىلار الداعى ۋاقىتتا اتىراۋ جانە شىمكەنت قالالارىندا سەمينار وتكىزۋدى جوسپارلاپ وتىر.

ءمولدىر ەركىن قىزى

استانا