استانا قالاسى اكىمدىگىنىڭ قىزمەتكەرلەرى جاڭا جۇمىس كەستەسىنە كوشەدى، دەپ حابارلايدى astana.kz.

2016 جىلعى 1 اقپاننان باستاپ استانا قالاسىنىڭ بارلىق اتقارۋشى ورگاندارىنىڭ قىزمەتكەرلەرى ساعات 8.30 - 18.00 دەيىن جۇمىس ىستەيتىن بولادى. تۇسكى ءۇزىلىس ساعات 13.00-14.30 دەيىن. استانا قالاسى اكىمىنىڭ وكىمى قازاقستان رەسپۋبليكاسىنىڭ ەڭبەك كودەكسىنە جانە «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» قازاقستان رەسپۋبليكاسىنىڭ زاڭىنا سايكەس قابىلداندى.

استانادا بۇعان دەيىن كوشەلەرگە تۇسەتىن جۇكتەمەنى ازايتۋ جونىندەگى ماسەلەنى شەشۋدىڭ بالاماسى رەتىندە قالالىق مەكەمەلەر مەن ۇيىمداردا جۇمىس كەستەسىن وزگەرتۋ ماسەلەسى قارالعان بولاتىن.

مۇنداي وزگەرىستەر قالالىق اكىمدىكتە، «سارىارقا»، «الماتى»، «ەسىل» اۋداندارىنىڭ اكىمى اپپاراتتارىندا جانە قالالىق باسقارمالاردا ورىن الماق.