ۋكراينادا تۇماۋدان 155 ادام كوز جۇمدى، - دەپ حابارلايدى «قامشى» پورتالى.  

ولاردىڭ اراسىندا ن-1N-1 ۆيرۋسىنا شالدىعىپ قايتىس بولعاندار دا بار دەپ حابارلايدى دەنساۋلىق ساقتاۋ مينيسترلىگى. سىرقاتتان اجال قۇشقانداردىڭ دەنى ودەسسا ءوڭىرىنىڭ تۇرعىندارى. ەلدىڭ 18 وبلىسىندا دەرتتى جۇقتىرۋ ەپيدەميولوگيالىق شەگىنەن اسىپ كەتتى. سوندىقتان وسى اپتادا مەملەكەتتىك ورگاندار «رەسمي تۇماۋ ەپيدەمياسىن» جاريالادى. بۇگىنگى كۇنگە دەيىن تۇماۋ جانە ءجىتى رەسپيراتورلىق ۆيرۋستىق ينفەكسيالاردى جۇقتىرعان ۋكراينالىقتاردىڭ سانى 3 ملن-دان استى. ءقازىر ماماندار ەلدە ناۋقاستاردى ەمدەيتىن دارى-دارمەكتەر تاپشى ەكەنىن مويىنداپ وتىر.

ولگا گولۋبوۆسكايا، ۋكراينا دەنساۋلىق ساقتاۋ مينيسترلىگىنىڭ شتاتتان تىس باس ينفەكسيونيسى:

- بۇگىندە ءتيىستى قوندىرعىلار مەن مەديسينالىق ماقساتتا پايدالانىلاتىن قۇرالدار جەتىسپەيدى. ەندى وسى قاجەتتى زاتتاردى تەزىرەك ساتىپ الۋ ءۇشىن ءبىز مينيسترلىكتەن ەلدە تۇماۋ ەپيدەمياسىن جاريالاۋدى سۇرادىق. ويتكەنى بىزگە ءدال ءقازىر شۇعىل تۇردە وتتەگىمەن دەمالۋعا مۇمكىندىك بەرەتىن بەتپەردەلەر، دەم الۋ اپپاراتتارى جانە ءتۇرلى پرەپاراتتار قاجەت.