رف پرەزيدەنتى ۆلاديمير ءپۋتيننىڭ ۇلكەن قىزى دا ءسىڭىلىسى سياقتى اكەسىنىڭ تەگىن قولدانبايدى. ءقازىر ماسكەۋدە تۇراتىن ول 2011 جىلى ماسكەۋ مەملەكەتتىك ۋنيۆەرسيتەتىنىڭ فۋندامەنتالدى مەديسينا فاكۋلتەتىن قىزىل ديپلوممەن ءتامامداعان، - دەپ حابارلايدى «قامشى» پورتالى The New Times جۇرگىزگەن زەرتتەۋلەرگە سىلتەمە جاساپ.

باسىلىمنىڭ جازۋىنشا مەديسينا مامانى بولعانىمەن ءاتى-جونىن ماريا ۆورونسەوۆا دەپ جازدىرعان ول قاراپايىم ادامدارعا ۇقسامايتىن ءومىر سالتىن ۇستاناتىن كورىنەدى. ونىڭ ەۋروپاعا ءجيى ساياحاتتاپ تۇراتىنىن جازادى The New Times.

گوللانديالىق كاسىپكەرگە تۇرمىسقا شىققان ول كەيىن ءاتى-جونىن ماريا فااسەن دەپ وزگەرتكەن. الايدا، جۋرنالدىڭ دەرەككوزدەرى ماريا بۇعان دەيىن دە ءتورت ءتۇرلى فاميليا يەلەنگەنىن ايتادى.

جۋرنال ماريا فااسوننىڭ تۇراتىن ءۇيى ماسكەۋدەگى نوۆينسكيي بۋلۆارىندا، اقش ەلشىلىگىمەن ىرگەلەس ەكەنىن ايتادى. باسىلىم سونداي-اق، ول ارنايى «مەگالكا» ورناتىلعان كولىكپەن جۇرەتىنىن، تەلەفونمەن فرانسۋز تىلىندە سويلەسەتىنىن جانە ءوزىن ماريا ۆلاديميروۆنا دەپ تانىستىراتىنىن دا جازادى.

باسىلىم بەتىندە ءپۋتيننىڭ قىزىنىڭ كۋرستاستارى عالامتورعا جاريالاعان سۋرەتتەر دە جاريالانعان. 2008-2013 جىلدارى تۇسىرىلگەن ول سۋرەتتەردە يتاليا، فرانسيا مەن يسپانياعا ساياحاتتار تۇسىرىلگەن. باسىلىم پرەزيدەنتتىڭ قىزى قۇربىلارىمەن بىرگە  تاۋلىگىنە جالداۋ اقىسى 35-45 مىڭ ەۋرو بولاتىن Aria كەمەسىمەن سەيىل قۇرعانىن جازادى. سونداي-اق، ونىڭ ەۋروپانىڭ باسقا دا ەلدەرىنە ساپار شەككەن سۋرەتتەرىن جاريالايدى.

باسىلىم زەرتتەۋىندە سونىمەن قاتار، ماريا ۆورونسەوۆا-فااسەننىڭ ءبىر قىزى بارى جانە كانديداتتىق ديسسەرتاسيا قورعاعاندىعى ايتىلادى. ءتىپتى، گەرمانيادا «يديوپاتيالىق ەرگەجەيلىلىك» تاقىرىبىندا مونوگرافيا جاريالاعانىن، 2014 جىلى وتكەن حالىقارالىق عىلىمي كونفەرەنسيالاردىڭ بىرىنە «گەرمانيانىڭ بالالارعا ەندوكرينولوگيالىق كومەك كورسەتۋ تاجىريبەسى» تاقىرىبىندا عىلىمي جۇمىس ۇسىنعانى ايتىلادى.

الايدا، شەتەلدىك باسىلىم رەسەي باسشىسىنىڭ قىزدارى تۋرالى بيلىك ورىندارىنان ەشقانداي رەسمي مالىمەت الا الماعان. ۆ. ءپۋتيننىڭ وتباسى تۋرالى رەسمي مالىمەتتەردە ونىڭ تەك قانا 1985، 1986 جىلدارى تۋعان ماريا جانە كاتەرينا ەسىمدى ەكى قىزى بارى عانا ايتىلادى. ءبىراق، رەسەيلىك اقپارات قۇرالدارى بۇعان دەيىن رف پرەزيدەنتىنىڭ كىشى قىزى تۋرالى مالىمەتتەردى تاۋىپ جاريالاعان بولاتىن. قۇجات بويىنشا ەكاتەرينا تيحونوۆا اتالاتىن ول رەسەيلىك «يننوپراكتيكا» كومپانياسىن باسقارادى جانە ماسكەۋ مەملەكەتتىك ۋنيۆەرسيتەتىن دامىتۋ جوباسىنا قاتىساتىنىن جازعان ەدى.