قازاقستان رەسپۋبليكاسى كونستيتۋسياسىنداعى ءسوز بوستاندىعى جانە اقپارات تاراتۋدا زاڭ شەڭبەرىندە جۇمىس ىستەۋ ەرەجەلەرىن باسشىلىققا الا وتىرىپ قازاقستان جۋرناليستەرى مەن ب ا ق سالاسىنداعى ۇكىمەتتىك ەمەس ۇيىم وكىلدەرى سايلاۋعا قاتىستى حارتيا جاريالادى، - دەپ حابارلايدى «قامشى» پورتالى. ول حارتيانىڭ تولىق ءماتىنى تومەندەگىدەي:

1. بۇل حارتيا قازاقستان رەسپۋبليكاسىنىڭ كونستيتۋسياسىنا، قازاقستان رەسپۋبليكاسىنىنىڭ «سايلاۋلار تۋرالى» جانە «بۇقارالىق اقپارات قۇرالدارى تۋرالى» زاڭدارىنا سايكەس جاسالعان.

2. بۇل حارتيانىڭ نەگىزگى ماقساتى قازاقستاندىقتاردى سايلاۋ ناۋقانى، سونداي-اق قازاقستان رەسپۋبليكاسىنىڭ پارلامەنتى ءماجىلىسى مەن ماسليحاتتارىنىڭ دەپۋتاتتىعىنا كانديداتتاردىڭ قىزمەتتەرى تۋرالى بۇقارالىق اقپارات قۇرال¬دارىندا شىنايى ءادىل، تولىق جانە سەنىمدى اقپاراتتارمەن قامتاماسىز ەتۋ بولىپ تابىلادى.

3. باق-تار قازاقستان رەسپۋبليكاسىنىڭ پارلامەنتى ءماجىلىسى مەن ماسليحاتتارىنىڭ دەپۋتاتتىعىنا تىركەلگەن بارلىق كانديداتتاردىڭ، ولاردىڭ ساياسي كوزقاراستارىنا قاراماستان، وزدەرىنە تەڭدەي مۇمكىندىككە يە بولۋىنا ىقپال ەتە الادى جانە سولاي ەتۋگە ءتيىستى.

4. بۇل حارتيا ءاربىر ازامات ءوزىنىڭ سايلاۋ قۇقىن جۇزەگە اسىرۋىنا مۇمكىندىك الۋ ءۇشىن باق-تاردى سايلاۋ جۇمىستارىن، كانديداتتار مەن سايلاۋ ناۋقانىنىڭ نەگىزگى كەزەڭدەرى، داۋىس بەرۋ رەسىمى جانە باسقا دا ماسەلەلەر تۋرالى كاسىبي جانە شىنايى اقپار تاراتۋعا شاقىرادى.

وسىعان بايلانىستى، بىزدەر، قازاقستان جۋرناليستەرى مەن ۇكىمەتتىك ەمەس ۇيىمدار وكىلدەرى، سايلاۋدى كورسەتۋ كەزىندە مىنا قاعيداتتاردى ۇستاناتىنىمىزدى مالىمدەيمىز:

1) قازاقستان رەسپۋبليكاسىنىڭ زاڭنامالارىن، جۋرناليستەردىڭ كاسىبي ەتيكا نورمالارى مەن مىنەز-قۇلىق ەرەجەلەرىن بۇلجىتپاي ساقتاۋ؛

2) سايلاۋ تاقىرىبىنا ارنالعان بارلىق ماتەريالداردىڭ وبەكتيۆتى، الالاۋسىز، اقپاراتتىق، سونداي-اق قازاقستان رەسپۋبليكاسىنىڭ پارلامەنتى ءماجىلىسى مەن ماسليحاتتارىنىڭ دەپۋتاتتىعىنا ۇمىتكەرلەرگە قاتىستى ءادىل بولۋلارىنا ىقپال ەتۋ؛

3) ۇمىتكەرلەردىڭ ابىرويى مەن ىسكەرلىك بەدەلىنە، جەكە باسىنا نۇقسان كەلتىرۋى ىقتيمال اقپاراتتاردى تاراتپاۋ؛

4) اقپارات كوزدەرىن، اسىرەسە، ەگەر ولار كۇدىك تۋدىراتىن بولسا تەكسەرۋگە الۋ؛

5) ۇگىت جاريالانىمدارى مەن اقپاراتتىق حابارلامالار اراسىنداعى ايىرماشىلىقتى ناقتى اجىراتۋ؛

6) بەلگىلەنگەن ءتارتىپ پەن الەۋمەتتىك ساۋالناما جۇرگىزۋ شارتتارىن ۇستانۋ، ساۋالناما ناتيجەلەرىن جاريالاۋ كەزىندە اۋديتورياعا بەرىلگەن ساۋالناما جاۋاپتارى تەك قانا بولجام ەكەنىن ەسكەرتۋ جانە ساۋالناما ناتيجەلەرى تۋرالى نەمەسە سايلاۋعا بەس كۇن بۇرىن جانە داۋىس بەرۋ كۇنگى الدىن الا ناتيجەلەر تۋرالى ماتەريالداردى تاراتپاۋ.

7) بۇل حارتيا ءوزارا قۇرمەتكە نەگىزدەلگەن ءوزارا قارىم-قاتىناس جۇيەسىن قۇرۋدى، بارلىق ءوزارا ىقپالداسۋشى تاراپتاردىڭ مۇددەلەرىن تانۋ مەن ەسەپكە الۋدى، سەنىمدى جانە تولىق اقپاراتقا سۇيەنگەن جوعارى ساياسي مادە-نيەتتى قاراستىرادى.

حارتيا ادامنىڭ، قوعام مەن مەملەكەتتىڭ جالپىعا بىردەي تانىلعان قۇقىقتارى مەن بوستاندىقتارىنىڭ ءسوزسىز باسىمدىعىنا باعىتتالعان جانە ساياسي پروبلەمالاردى شەشۋدە بىر-بىرىنە ءوزارا جول بەرىپ، ءوزارا ءىس-قيمىلدىڭ كەلىسىمدىك نەگىزىن قاراستىرادى.

حارتياعا قول قويا بەرۋگە بولادى.