بىلتىرعى جىل قازاقستاندىق اۆتوموبيل نارىعىنا دا وڭايعا سوققان جوق. بىرنەشە مارتە تەڭگەنىڭ قۇلدىراۋى مەن حالىقتىڭ الەۋمەتتىك جاعدايىنىڭ تومەندەۋى، ءىرىلى-ۇساقتى كاسىپورىنداردىڭ ەكونوميكالىق قيىندىقتار كورۋى كولىك ساۋداسىنداعى باعانى دا مىڭ قۇبىلتتى. بيىلعى جىل دا بۇل نارىق ءۇشىن اسا جەمىستى جىل بولا قويمايتىن سياقتى. قاراجاتتان قينالعان حالىق كولىك ساۋداسىن بۇرىنعىداي قىزدىرۋعا قۇلىقتى ەمەس. اقشاسى بارلاردىڭ ءوزى دە ارزان كولىكتەرگە ۇمتىلۋدا.

kolesa.kz سايتىنداعى مالىمەتتەرگە سۇيەنە وتىرىپ، «قامشى» پورتالى نازارلارىڭىزعا 2016 جىلدىڭ العاشقى ايىندا ەڭ كوپ ساتىلعان، باعاسى ارزان بەس كولىك ماركاسىن ۇسىنادى. تىزىمگە ەنگەن بەس ماركانىڭ بارلىعى دا تمد ەلدەرىندە قۇراستىرىلاتىن كولىكتەر. ونىڭ ىشىندە، بىرەۋى قازاقستان مەن وزبەكستان ماركاسى بولسا، قالعان ۇشەۋى رەسەيلىك كولىكتەر.

Daewoo Matiz

قازاقستانداعى ەڭ ارزان كولىكتەر ءتىزىمىن وزبەك اعايىندار قۇراستىرعان Matiz باستاپ تۇر. اۆتوسالوندار بۇل كولىك ءۇشىن 1 559 000 تەڭگە سۇراپ وتىر. جارتى جىل بۇرىن 1 059 000 تەڭگەگە ساتىلعان كولىكتىڭ باعاسى بيىل ءبىرشاما قىمباتتاعان. بيۋدجەتتىك كولىك 51 اتتىڭ كۇشىنە يە 0،8 ليترلىك قوزعالتقىشپەن، مەحانيكالىق 5 ساتىلى بەرىلىس قورابىمەن جابدىقتالعان. مۇندا ءرۋلدىڭ گيدروكۇشەيتكىشى، ورتالىق قۇلىپ دەگەن جۇيەلەر مۇلدە ورناتىلماعان. وسى رەتتە بۇل ماركالى كولىكتەردىڭ ەۋرازيالىق ەكونوميكالىق وداقتىڭ تەحنيكالىق رەگلامەنتىنە ساي قازاقستانعا اكەلىپ ساتىلۋىنا تىيىم سالىنعانىن، سالوندارعا بۇرىن اكەلىنگەن كولىكتەر تاۋسىلعان سوڭ اۆتوموبيل ساتىلىمنان شىعارىلاتىنىن ەسكەرتە كەتۋ كەرەك.

بۇگىندە سالوندار بۇل كولىك ماركاسىن 1 559 000-2 329 000 تەڭگە ارالىعىندا ساۋدالاۋدا.

LADA Granta

وتىمدىلىگى جاعىنان رەسەيلىك LADA Granta دا قالىسپايدى. باعاسىنىڭ ارزاندىعىنا بايلانىستى بۇل ماركا قازاقستان كولىك نارىعىنداعى ەڭ تانىمال كولىكتەردىڭ ءبىرى بولىپ وتىر. بۇل ماركا تانىمالدىعى جاعىنان تەك Hyundai Accent كولىگىنە عانا جول بەرەدى ەكەن.  كولىكتىڭ ەڭ قاراپايىم جيناعىن (كومپلەكتاسيا) 1 669 000 تەڭگەگە ساتىپ الۋعا بولادى. Lada-نىڭ بۇل ماركاسىنداعى 1،6 كولەمدى قوزعالتقىشى 82 اتتىڭ كۇشىنە يە، 5 ساتىلى مەحانيكالىق بەرىلىس قورابى بار. قولايلىلىق جاعىنان «ماتيزدەن» اسىپ تۇسپەيدى. ءبىراق، ارتىقشىلىعى رەتىندە جالعىز قاۋىپسىزدىك «جاستىعى» بارىن ايتا كەتۋ كەرەك.

LADA Granta -نىڭ ەڭ ارزان جيناعى 1 669 000 تەڭگە تۇرسا، ەڭ قىمبات جيناعى 2 392 000 تەڭگەدەن ساتىلۋدا.

Geely CK

ارزان كولىكتەر ءتىزىمىن قازاقستاندا قۇراستىرىلعان قىتايلىق ماركا جالعاستىرادى. Geely CK كولىگىن رەسمي ديللەرلەر 1 930 000 تەڭگەگە باعالاپ وتىر. سەدان 1،3 كولەمدى 85 اتتىڭ كۇشىنە يە قوزعالتقىشپەن جانە مەحانيكالىق بەرىلىس قورابىمەن جابدىقتالعان. ەڭ ارزان جيناعى مەن قىمبات ءتۇرىنىڭ ايىرماشىلىعى – كونديسيونەر مەن ABS جۇيەسى عانا.  ياعني، ەكى ءتۇرلى جيناق قاڭتار ايىندا سايكەسىنشە 1 930 000 جانە  2 250 000 تەڭگەدەن ساۋدالانعان.

LADA Kalina

ءتورتىنشى ورىن بۇل تىزىمدە رەسەيلىك LADA Kalinaعا تيەسىلى. بۇل كولىكتىڭ «ستاندارت» ۇلگىسىندەگى بازالىق جيناعى 2 013 000 تەڭگەدەن ساتىلعان. جابدىقتالۋى جاعىنان  LADA Grantaدان ەش ايىرماشىلىعى جوق.

ءتۇرلى ۇلگىدەگى جيناقتارىنىڭ باعاسى 2 013 000 مەن 2 748 000 تەڭگە ارالىعىن قۇرايدى.

LADA Priora

قالتاعا جەڭىل كولىكتەر رەيتينگىن تاعى دا رەسەيلىك LADA Priora تۇيىقتايدى. جاستار اراسىندا ۇلكەن قىزىعۋشىلىققا يە بۇل كولىك 16 كلاپاندى 106 اتتىڭ كۇشىنە يە 1،6 كولەمدى قوزعالتقىشپەن، مەحانيكالىق بەرىلىس قورابىمەن جابدىقتالعان. سونداي-اق، قاۋىپسىزدىك «جاستىعى»، ABS جۇيەسى، ورتالىق قۇلىبى، بورتكومپيۋتەرى جانە الدىڭعى تەرەزەلەردى ەلەكتر كوتەرگىش جۇيەسى بار. «پريورانىڭ» بازالىق ۇلگىسى 2 038 000 تەڭگەدەن، ال، ەڭ قىمبات ۇلگىسى 2 493 000 تەڭگەدەن ساتىلعان.