«وردا» توبىنىڭ مۇشەلەرى وزدەرىن ءار قىرىنان سىناۋدى قويار ەمەس. بۇعان دەيىن توپ ءانشىسى ەربولات بەدەلحان «91» دەگەن توپ قۇرسا، ونىڭ توپتاعى تاعى ءبىر ارىپتەسى داستان ورازبەكوۆ جاڭا «Turkiss» اتتى قىزدار توبىن تانىستىردى، - دەپ حابارلايدى «قامشى» پورتالى juldizdar.kz-كە سىلتەمە جاساپ.

وتكەن جىلى ساۋىردە «وردا» توبىنىڭ مۇشەسى داستان ورازبەكوۆ ءوزىنىڭ قىزداردان قۇرالاتىن توبىنا كاستينگ جاريالاعان بولاتىن. ءانشى قازاقستاندىق ەسترادادا ەرەكشەلەنىپ تۇراتىن توپ قۇرماق نيەتتى بولعان. كاستينگە قاتىسقان 500-گە جۋىق قىزدىڭ ىشىنەن داليدا، انەلي جانە جانار ەسىمدى قىزدار تاڭداپ الىنىپ، توپقا «Turkiss» دەگەن اتاۋ بەرىلدى. قىزداردى ەستراداعا دايىنداۋعا ازدى-كوپتى 10 اي جۇمسالعان.

داستان ورازبەكوۆتىڭ پىكىرىنشە، توپتىڭ اۋەنى باسقا توپتاردان وزگەشە، ەشقايسىنا ۇقسامايدى. جوبا قازاقستاندا عانا ەمەس، ازەربايجاندا دا ونەر كورسەتەتىن بولادى. توپتىڭ ازەربايجاندىق پروديۋسەرى — يسا مەليكوۆ ءبىر كەزدەرى قاراپايىم انشىلەر ەلدار گاسىموۆ پەن نيگيار دجامالدى «ەۆروۆيدەنيە» جەڭىمپازى دەڭگەيىنە دەيىن جەتكىزگەن اتاقتى پروديۋسەر.

«Turkiss» توبىنىڭ مۇشەلەرى كىشكەنتايىنان بيمەن، انمەن اينالىسقان قىزدار. داستان ورازبەكوۆكە بۇل سالا ازىرگە تاڭسىق، سەبەبى ءانشى بۇعان دەيىن تەك جىگىتتەردەن قۇرالعان توپتارمەن جۇمىس ىستەپ كەلگەنى بارىنە ءمالىم. «مەن ءۇشىن قىزدارمەن جۇمىس ىستەۋ ومىرىمدەگى ەڭ قيىن كەزەڭ بولاتىن شىعار. ولاردىڭ كوزىنەن قورقىنىشتى نەمەسە ىستەي الار ما ەكەنبىز دەگەن كۇماندى كورگەندە، ءوزىم دە قاتتى قاپالانامىن» — دەيدى پروديۋسەر.

بۇگىندە «Turkiss» توبى ءان جازىپ قانا قويماي، وعان بەينەبايان ءتۇسىرىپ ۇلگەرگەن. بەينەباياننىڭ ءتۇسىرىلىمى كييەۆتە ءوتتى — ءقازىر مونتاج جۇمىستارى جۇرگىزىلىپ جاتىر، كوپ ۇزاماي توپتىڭ تۇڭعىش تۋىندىسىن كورۋگە مۇمكىندىك تۋادى.