كاسىپكەرلەر الدىندا ميلليونداعان تەڭگە بەرەشەگى بار مەملەكەتتىك مەكەمەلەر قارىزىن قايتارۋعا قۇلىقسىز، - دەپ حابارلايدى «قامشى» پورتالى 24.kz-كە سىلتەمە جاساپ.

2015 جىلعى ەسەپ بويىنشا، مەملەكەتتىك مەكەمەلەردىڭ جەكە كاسىپكەرلەرگە قارىزىنىڭ كولەمى ميلليارد تەڭگەگە تاياعان. كىمنەن كومەك سۇرارىن بىلمەي ساندالعان بيزنەسمەندەر ماسەلەسىن بۇگىن ۇلتتىق كاسىپكەرلەر پالاتاسىنىڭ ارنايى كەڭەسى قارادى. بەلگىلى بولعانى، سوت شەشىمدەرىندەگى مەرزىمگە قاراماستان، كوپتەگەن مەكەمە قارىزىن ۋاقتىلى قايتارمايدى.

ال، جيىنعا قاتىسقان ادىلەت مينيسترلىگىنىڭ وكىلى سوت ورىنداۋشىلاردىڭ كومەگىمەن بۇگىنگە دەيىن اتالعان قارىزدىڭ جارتىسىنان استامى قايتارىلعانىن ايتتى. ەندى كەڭەس مۇشەلەرى بۇل اقپاراتتىڭ انىق-قانىعىنا كوز جەتكىزىپ، وبلىستىق پروكۋراتۋراعا وسىنداي ىستەرگە قاتىستى تىڭعىلىقتى تەكسەرىس جۇرگىزۋىن سۇراپ وتىر.

ولەگ ساۆەلەنكو، «اتامەكەن» ۇكپ كاسىپكەرلەر قۇقىعىن قورعاۋ دەپارتامەنتىنىڭ ديرەكتورى:

- كاسىپكەر بارلىق ءىسىن ىسىرىپ قويىپ، 1 نەمەسە 1 جىلدان استام ۋاقىت سوتتاسىپ جۇرۋگە ءماجبۇر. سايكەسىنشە، ول بيزنەسكە بەلگىلى ءبىر دەڭگەيدە نۇقسان كەلتىرەدى. كەيىنگى كەزدە ءدال وسىنداي مازمۇنداعى حاتتار كوپ كەلىپ جاتىر. الداعى ۋاقىتتا جوعارىداعى ماسەلەلەردىڭ بارىنشا رەتتەلگەنىن، ورايى كەلسە، بولماعانىن قالايمىز.