بۇگىنگى ۇكىمەت وتىرىسىندا ءبىرقاتار ءوڭىر قارجى ءمينيسترى باقىت سۇلتانوۆتىڭ سىنىنا ىلىكتى، - دەيپ حابارلايدى «قامشى» پورتالى 24.kz-كە سىلتەمە جاساپ.

ونىڭ ايتۋىنشا، زاڭداستىرۋ بويىنشا وتىنىشتەردى قاراۋ مەرزىمى مەجەلى ۋاقىتتان اسىپ كەتكەن جايتتار جەتىپ ارتىلادى. «مۇنداي جاعداي اسىرەسە الماتى وبلىسى مەن استانا قالاسىندا ءجيى كەزدەسەدى»، - دەيدى ۆەدومستۆو باسشىسى.

جەكەشەلەندىرۋ جايى دا ۇكىمەت ۇيىندەگى تالقىلاۋدىڭ نەگىزگى وزەگى بولدى. مۇلىكتى زاڭداستىرۋ جۇمىستارىنىڭ بارىسى، اياق الىسى تۋرالى قارجى ءمينيسترى باقىت سۇلتانوۆ جان-جاقتى اقپارات بەردى. قوي جىلىنىڭ اياعىنا دەيىن 428 ملرد تەڭگە زاڭداستىرىلعان. 2015 جىلدىڭ جەلتوقسانىندا جەكەشەلەندىرۋگە بايلانىستى جاڭا زاڭناما كۇشىنە ەنگەن بولاتىن. جاڭا شارت ءوز جەمىسىن بەرۋدە. وسىلايشا، 2 ايدا 160 ملرد تەڭگە زاڭداستىرىلىپ ۇلگەرگەن.

باقىت سۇلتانوۆ، ق ر قارجى ءمينيسترى:

- جوسپاردى بۇگىن بەكىتتىك. ارى قاراي بارلىق وڭىرلەرمەن، ورتالىق، جەرگىلىكتى اتقارۋشى ورگاندارمەن، ۇلتتىق بانكپەن ءتيىستى جۇمىس جۇرگىزەتىن بولامىز. 2 ايدىڭ ىشىندە ءبىرشاما قاراجات ءتۇسىپ جاتىر. جالپى سوماسى 600 ملرد-تان استى. قارجى ءمينيسترى قارقىندى جۇمىس ىستەپ جاتقانىن العا تارتادى. سوڭعى 4 ايدا 700-جۋىق ماقالا جاريالانعان. 1500 سيۋجەت تەلەارنالاردا شىعىپ، 1600 جيىن وتكەن. سۇلتانوۆ ءبىرقاتار بانكتەردى جۇرشىلىقتى اقپاراتتاندىرۋدا اقساپ تۇرعانىن ايتىپ، سىن قىرىنا الدى. سونىمەن قاتار، پرەمەر-مينيستر بىرنەشە وبلىس باسشىلارىنىڭ ەسەبىن تىڭدادى. جەكەشەلەندىرۋ ماسەلەسى بويىنشا جيىننىڭ ەندى ايىنا ءبىر رەت وتەتىنىن جەتكىزدى.