«بىرلىك» پارتياسى ق ر پارلامەنتى ءماجىلىسىنىڭ سايلاۋىنا 8 ۇمىتكەر قوسادى. بۇگىن پارتيانىڭ كەزەكتەن تىس ەكىنشى سەزىندە دەلەگاتتار 8 ادامنان تۇراتىن سايلاۋ ءتىزىمىن بەكىتتى، - دەپ حابارلايدى "قامشى" پورتالى قازاقپاراتا سىلتەمە جاساپ.

ءوز سوزىندە «بىرلىك» پارتياسىنىڭ ءتوراعاسى سەرىك سۇلتانعالي پارتيانىڭ 53 مىڭ مۇشەسى قازاقستاندى گۇلدەنگەن، قۋاتتى مەملەكەتكە اينالدىرۋ ىسىنە جۇمىلا ۇلەس قوسۋعا مۇددەلى ەكەندىگىن اتاپ ءوتتى.

سونىمەن پارتيانىڭ سايلاۋ تىزىمىنە مىناداي تۇلعالار كىرىپ وتىر:

1. بولات بايقاداموۆ، "بىرلىك" پارتياسى ءتوراعاسىنىڭ ورىنباسارى.

2. مۋرات قوجامقۇلوۆ، "بىرلىك" پارتياسىنىڭ اقمولا وبلىسى بويىنشا فيليالىنىڭ ءتوراعاسى.

3. روزا قۋانىشبايەۆا، ق ر كاسىپوداقتارى قاۋىمداستىعى مۇلىك جانە اكتيۆتەردى باسقارۋ باسقارماسىنىڭ باستىعى.

4. تولەگەن قۋانىشيەۆ، "بىرلىك" پارتياسى ءتوراعاسىنىڭ ورىنباسارى.

5. مۇرات رايەۆ، قازاق گۋمانيتارلىق-زاڭ ۋنيۆەرسيتەتى رەكتورىنىڭ كەڭەسشىسى.

6. سەرىك سۇلتانعالي، "بىرلىك" پارتياسىنىڭ ءتوراعاسى.

7. اسقار سىزدىقوۆ، "گراند -ديۋك قازاقستان" ج ش س باسشىسى.

8. نۇرلان شاۋحامانوۆ، قىزىلوردا وبلىسى "بەينەۋ شىمكەنت" گاز قۇبىرى ج ش س ديرەكتورى.

سەز دەلەگاتتارى كەزەكتەن تىس وتكەلى وتىرعان ق ر پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋىنا قاتىسۋ تۋرالى قاۋلىنى بەكىتىپ، ەلىمىزدى ەڭ دامىعان 30 ەلدىڭ قاتارىنا قوسۋ جولىندا ايانباي تەر توگۋگە دايىن ەكەندىكتەرىن جاريالادى.

سونىمەن قاتار ەلباسىنىڭ 5 ينستيتۋسيونالدى رەفورماسىن ءبىراۋىزدان قولداۋ تۋرالى ماڭىزدى شەشىم قابىلدادى.