Grýzıanyń ataqty ártisi Soso Pavlıashvılı taıaýda Qazaqstanda bolyp, Aqtaý qalasynda úlken konserti ótti. Ártis án keshiniń sońyn ala «Lada.kz»  saıtyna suhbat berip,  Qazaqstan týraly oı bólisti. Tilshimen bolǵan ekeýara áńgime barysynda grýzındik óner ıesi biraz nárseniń  basyn qaıyrypty. Ánderiniń týý tarıhy, tyńdarman  talǵamy, ásirese  Elbasymyzben bolǵan beıresmı  júzdesýi jaıly aqtaryla syr shertedi.

«Bul júzdesý kúni búginge deıin kóz aldymda, kóregen, ashyq minezdi, keremet jan soǵan qaramastan, barynsha myqty adam, quddy  ákemniń aǵasymen  pikirleskendeı áser aldym» - deıdi Palıashvılı. Oǵan qosa arý Almatymyz ben bas qalamyz Astana jaıynda da jyly lebizin bildiripti. Áńgimesinen qarapaıymdylyqtyń, shynaıylyqtyń ısi ańqıdy. Ol qalaı deısiz ǵoı? Soso «Almaty Tbılısı sekildi ásem, jyly, janǵa jaıly qala, al Astana múlde bólek, ol bir alyp keńistik», - dese, qazaqtar genetıkalyq turńydan tup-týra grýzınder sekildi óner dese, ishken asyn jerge qoıatyndyǵyn aıtady.

«Qonaq qoıdan jýas bolý kerek» deýshi edi, munysy nesi dep bastapqyda ishteı renjigen de edik. Keıin túsindik, biz renjimeýimiz kerek eken kersinshe úlgi alýǵa tıis ekenbiz. Sonda grýzın azamaty ultyn súıgeni úshin aıypty ma? Kerisinshe, grýzınder Palıashvılımen maqtanýǵa tıis. Eger, álgi grýzındik óner ıesiniń ornynda biz bolsaq ne ister edik? Eldiń kóńiline qaraıtyn qashanǵy kóńilshektik ádetimizge basyp, aldyńǵy aıtqanǵa maqaldaǵydaı    maqtaýdy úıip-tógip, kerisinshe teńep jiberýimiz bek múmkin be edi? Al, ártis «Tbılısı Almaty sekildi, bolmasa grýzınder qazaqtar sekildi» degen joq.  Qanshama qazaqtyń arasynda otyrsa da oıyn búkpesiz aqtaryp saldy. Rasy kerek, biz óz qundylyqtarymyzdy qashanda ózgelerdikinen tómen qoıamyz. Bolmasa, «Býrabaıdy qazaqtyń Shveısarıasyna» balap, Maǵjandy «qazaqtyń Pýshkıni» dep laǵar ma edik? Álemde eshbir el óziniń baǵa jetpes qundylyqtaryn  ózgelerdikine teńemeıdi. Mynaý turǵan kórshi qyrǵyz aǵaıynnyń ózi «Ystyq kólin»  qyrǵyzdyń bermeti dep, ózgeniń   altynyna aıyrbastaǵysy joq. Al,  biz barymyzdy baǵalaı almaı júrmiz. Osyndaıda Palıashvılıdeı azamaty bar qońqaq muryn halyq rasynda baqytty eken-aý dep qalasyń.

Saltanat Álimqul