Bilim men ǵylymnyń qasıetti qara shańyraǵy ál-Farabı atyndaǵy QazUÝ-da akademık, ǵalym, tehnıka ǵylymdarynyń doktory, profesor, Qazaq KSR Memlekettik syılyǵynyń laýreaty, Qazaq KSR ǵylymynyń eńbek sińirgen qaıratkeri Ómirbek Aryslanuly Joldasbekovtiń 85 jasqa tolýyna oraı alqaly jıyn ótti, - dep habarlaıdy «Qamshy» portaly.

1970-1986 jyldary S.Kırov atyndaǵy QazMÝ-da 16 jyl boıy rektorlyq qyzmet atqarǵan Ómirbek Aryslanulynyń búginde álemniń úzdik ýnıversıtetteri qataryna ilikken QazUÝ qalashyǵynyń negizin qalaýǵa sińirgen eńbegi zor. 39 jasynda Qazaqstannyń tuńǵysh ýnıversıtetine bekitilgen rektor elimizdiń bilim berý isin jańa baǵytqa buryp, ǵylym aıdynyna tyń tynys ákeldi. Ol kórnekti qoǵam jáne memleket qaıratkeri retinde elimizdiń órkendeýine súbeli úles qosty.

Ǵalymnyń týǵan kúni QazUÝ rektory Ǵalym Mutanov bastaǵan ýnıversıtet ujymy men belgili ǵalymdar, Ómirbek Aryslanulymen qyzmettes bolǵan dostary, qurby-qurdastary, otbasy músheleri, shákirtteri men stýdentteri jınalyp, ǵalym rýhyna taǵzym etti. Akademık eskertkishine gúl shoqtaryn qoıǵan soń sharany QazUÝ rektory, akademık Ǵalym Mutanov ashty. Ol bilim oshaǵynda búgingi tańda jalǵasyn taýyp jatqan jobalardy kezinde Ó. Joldasbekovtiń ózi josparlap ketkenin jáne akademıktiń ýnıversıtet damýyna sińirgen zor eńbegi eshqashan umytylmaıtynyn erekshe atap ótti. Sondaı-aq QR UǴA prezıdenti Murat Jurynov pen profesor Sultan Sartaev sóz alyp, ǵalymnyń ónegeli ómirinen taǵylymdy estelikter aıtty.

İs-sharanyń jalǵasy QazUÝ-dyń mehanıka-matematıka fakúltetindegi Ó. Joldasbekov atyndaǵy úlken dáris zalynyń  saltanatty ashylý rásimine ulasty. Dárisqana lentasyn ýnıversıtet rektory Ǵalym Mutanov pen QR UǴA prezıdenti Murat Jurynov kesti.

Ǵalym Mutanov ónegeli ómir ıesiniń atqarǵan qyzmeti, qaıratkerligi haqynda baıandama oqydy. «Ómirbek Aryslanuly qyzmet qylǵan jyldary qazaqtyń bilim keńistigine jańashyldyq alyp keldi. Kóptegen ıgi isterdiń jarshysy bolǵan Ómekeńniń Qazaq elin ózge baǵytta damytý, bilim men ǵylymdy órkendetý jolynda jasaǵan eńbegi ushan-teńiz. Bastysy ǵalym óz izbasarlaryna eń qundy nárse – óziniń ǵylymı murasyn qaldyrdy. Ómirbek Joldasbekov 25 ǵylym doktoryn, 100-den asa ǵylym kandıdatyn daıyndady. Ol – 400-den astam ǵylymı eńbektiń,  12 monografıa men 30 oqýlyqtyń avtory. Sonymen qatar, Ó. Aryslanuly   respýblıkamyzdyń Joǵarǵy Keńesinde qyzmet qylyp, onan soń Parlament depýtattyǵyna 6 ret saılanǵan. Keıinnen el Májilisiniń áleýmettik damý boıynsha komıtetiniń tóraǵasy bolǵan birtýar  azamattyń keshegi júrgen joly men qylǵan eńbegi barshamyzǵa úlgi-ónege. Ol kisiniń ár isi men jetken jetistigi – biz úshin úlken mektep. Men osyndaı ardaqty azamattyń isin jalǵap, izimen júrgenimdi maqtan tutamyn jáne isimdi úlken jaýapkershilikpen atqaramyn», – dedi rektor.

Qaıratkerdiń ǵumyrynan syr shertken derekti fılm qazaqtyń dara tulǵasy jaıly jastarǵa mol maǵlumat berdi. Úzdik stýdentter men mektep oqýshylaryna Ómirbek Joldasbekov atyndaǵy shákirtaqylar tabystaldy.

Shara barysynda oqylǵan QR Prezıdentiniń keńesshisi Muhtar Qulmuhammedtiń quttyqtaý haty da Ómirbek Aryslanulynyń azamattyq kelbetin asha túsken edi. Odan keıin minbege QR UǴA prezıdenti, akademık Murat Jurynuly shyǵyp sóz sóıledi. Ol: «Eliniń qamy úshin qyzmet qylǵan ardaqty azamattyń ómiri týraly jıyn bastalǵaly beri estip-bilip jatyrmyz. Ol kisini men stýdent jasymnan bilemin. Talaı dárisin tyńdadyq. Óte bir tartymdy, qarapaıym ómirden alynǵan mysaldarmen dáris oqıtyn. Profesor ómiriniń eń mándi jyldaryn ustazdyqqa arnady. Ómiriniń kóp bóligin osy QazUÝ-da ótkizdi. Jastyq shaǵyn da osyndaı úlken ýnıversıtet qalashyǵyn salýǵa kúsh jumsady. QazUÝ qalashyǵy – ol kisiniń artynda qaldyrǵan eń úlken, eleýli eńbekteriniń biri. Ol kisiniń qalaǵan mektebi, ýnıversıteti – búgingi kúnniń qymbat qazynasy. Ómekeń irgesin qalaǵan QazUÝ qazirgi tańda erekshe qarqynmen gúldenýde. Osy tusta talmaı eńbek etip jatqan ýnıversıtet ujymy men rektory Ǵalymqaıyr Mutanulyna alǵys bildirip, aldaǵy ýaqytta sáttilik tileımin!» – dedi. Murat Jurynulynyń sózin jalǵap ortaǵa akademıktiń qyzmettes bolǵan áriptesteri, shákirtteri shyǵyp, erekshe estelikterimen bólisti.  Bunan soń akademık, profesor Ómirbek Aryslanuly Joldasbekovtiń otbasy atynan profesor Baıan Ómirbekqyzy sóz sóıledi. «Eliniń jarqyn bolashaǵyna bar ǵumyryn arnaǵan Ómirbek Joldasbekovtiń 85 jyldyq mereıtoıyna jınalǵan barsha qaýymǵa otbasymnyń atynan alǵys aıtamyn.  Búgin ákemniń týǵan kúninde arnaıy eske alyp, osyndaı úlken shara ótkizip jatqan ýnıversıtet basshylyǵyna sheksiz rızamyn. Ákemizdiń ómir joly men etken isterine ózderińiz kýásizder. Men osyndaı alyp tulǵanyń urpaǵy bolǵanymdy maqtan tutamyn jáne árdaıym zor jaýapkershilik sezinemin!» – dedi ol.

Bar sanaly ǵumyryn eliniń ıgiligi jolyna sarp etken tuǵyry bıik tulǵanyń esimi men erligi, eren eńbegi el esinen eshqashan da óshpek emes.