Kezekti keńes-saılaýy ótti. Bári durys. Májilisshilerdi mámilege keltire alamyz, óıtkeni, basymy nurotandyqtar. Iakı, nur da bar, otan da esten shyqqan joq...

Memleket basshysy, «Nur Otan» partıasynyń jetekshisi qatty tolqý ústinde bylaı dedi: «Biz jeńiske jettik. Qazaqstandyqtardyń 77 paıyzy qatysty, bul – rekord. “Nur Otan” saılaýshylar daýysynyń 82 paıyzyna ıe boldy, bul – rekord. Men barlyq daýys berýshilerge rızashylyǵymdy bildiremin. Bizdiń partıamyzdyń árbir múshesi kórsetilgen senimdi baǵalaýy tıis. Bul jeńis – kópjyldyq jumystyń nátıjesi. Saılaýdy 800 sheteldik jáne 10 myńǵa tarta jergilikti baıqaýshylar baqylady, olar saılaý úderisi zańnamaǵa sáıkes ótkenin atap ótti. Biz álemdik qoǵamdastyq aldynda ashyq ári ádil saılaý ótkizdik...».

Úsh saıası partıa: «Nur Otan», «Aq jol» jáne keshegi qazaqqa qyrǵyn salǵan qyzyl komýnıserdiń (QKHP) 7 paıyzdan joǵary daýys jınady. «Nur Otan» partıasyna 82,15; Qazaqstannyń «Aq jol» demokratıalyq partıasyna 7,18; Qazaqstan Komýnıstik halyq partıasyna 7,14; «Aýyl» halyqtyq-demokratıalyq partıottyq partıasyna 2; Jalpyulttyq sosıal-demokratıalyq partıaǵa 1,18; «Birlik» saıası partıasyna 0,29, paıyz saılaýshylardyń daýysy berilgen...

Aqjoldyqtar biraz jalaýlatty. Ózim bás tigip, alash­ordanyń izbasarlaryna uqsaǵysy kelgen jigit­terdi qoldadym. Qoldadym da, maqala jazdym. Partıanyń basshysy týraly áıdik avtordyń etekteı bazyna-essesin qaıtara jarıaladym. Sóz járdemi bolsyn, dem bersin dedim. Bireýden birdeńe dámetkendikten emes, úmit etkendikten: zıaly qaýym men isker toptyń qosyndysyn qosh kórip, ońdy ózgeris, oıanǵan betburysqa ıegimiz qyshyǵandyqtan...

Pende kóńilmen «Aqjoldyń» saıası belsendi qos jetekshisiniń biri altyn ýaqytynyń tutamyn (bir-eki mınótin) qıyp, bir aýyz «rahmetin» aıtyp, yqylasyn bildirer dep dámelendik. Oıhoı, dámemiz dalada qaldy...

Al, qyzyl komýnıserde meniń babamnyń qaıtpas kegi qalǵan, qazaqtyń júz jylǵa azaıtqan azǵyndardy keshe almaspyn...

Sosyn, aýylǵa uqsas, birlikti kóksegen birli-jarym partıalar da qotyr attaryn báıgege qosty. Óz basym tanymaıtyn, taltúste aspannan túskendeı bolǵandarǵa ýaqyt shyǵyn qylmadym...

Ózime unaıtyn, bılikten aýlaq qonǵan, biraq, adamı kelbeti men ımanı qasıeti myǵym, eldik pen otanshyldyq bolmysy bekem, bilim-biligi tereń jalqy jigitter saılaý alamanyna túspegen soń, basqa salsa baspaqshyl bolyp, beıtarap júrdim...

Amalsyz eýropa órkenıetiniń qaǵıdattaryna «tabynǵan» el bolǵasyn, saılaý jasap, baılaý qylý kerek shyǵar. Men halyqaralyq hám álemdik saıası salanyń mamany emespin, biraq, ár saılaý ótken saıyn muńdy kúıge túsip, tuıyq oıǵa qalamyn: «Utylǵan kim, utqan kim?..» - dep...

Áı, osynyń túıinin eshkim de bilmeıdi. Tipti, bilgisi de kelmeıdi. «Keregi joq bas qatyryp» dep oılaıdy. Kerek deseń «maǵan qatysy joq» dep te adasady. Sonda bizge qatysy bolmasa, nesine erte turyp, etik kıdik. Etik kıip, saılaýǵa kıliktik?!.

Kıligýimizge qaraǵanda, janama emes, tikeleı qatysy bar, kezkelgen saılaýdyń... Árbirimizdiń búgingi nápaqamyzǵa ǵana emes, nemeremizdiń erteńgi taǵdyryna ta taramdanyp tur...

...Oıana alsaq, osyny oılanyp kóreıik...

Qajymuqan ǴABDOLLA