KESHE 21.03.2016 j.

Qostanaıǵa tizege jeter qar jaýdy. Saılaý bolǵan kúni ertemen jańbyr bolyp bastalǵan keıis qabaq faıl-bult aqyry bulqan-talqan bolyp buzylyp, Naýryzdyń aqshaqaryna ulasty. Mezgilsiz jaýǵan qar boldy. Adamdar áreketindegi «mezgilsizdikke»Tabıǵat anadan qatqan jaýap syndy ma qalaı? Bárinen erteńgi Naýryz meıramyn kıgiz úı tigip qarsy alatyn jurtqa qıyn boldy. Merekeleý bar, merekeniń ústinde aıaǵynan tik júrip qyzmet etetinder bar degendeı. Naýryzdy Arqa óńirinde dalada úsip-tońyp qarsy alýdy doǵaraıyq dep aıtyp júrmiz. Kıgiz úı tigip, jurtty kóshege shaqyryp, qarsy alý mindetti emes. Bul dástúr Keńes úkimeti ydyraı bastaǵan ýaqytta alǵash ótkizgen Naýryzdan bastalyp edi...

Qys mezgili ketkisi kelmeı, qarsylyq jasap jatqan sekildi. Biraq báriniń de óz ýaqyty bar. Ýaqyty toqtaǵandar – bul dúnıe tórinen de, ózge de sahnadan da ketedi. Ketpeımin dep qasarysqan qaharly qysty erke kóktem yǵystyratyny sózsiz. Jadyraǵan jaz da kelip, arqany keńge salarmyz...

Qostanaıda bıyl qar kóp. «Kóp» dep aıtyp kúpirlik qylmaıyq. Qazaq jeri jaýyn-shashynǵa malshynǵan ólke emes. Kóptik etpeıdi. Kókten túsken jaýyn-shashyn – jerdiń yryzdyǵy. Kóp qar birtindep talyp erip, jerge sińer. Sodan, bálkim, egin bitik shyǵar, eldiń yryzdyǵy artar. Biraq tasqyn bolyp, topansý qaptaýy ábden múmkin. Jyldaǵy qarapaıym halyq «jylaıtyn» másele. Sodan qaýiptenemiz. Halyqtyń shúıligetin bir adamy bar edi. Tegi de «qudirettiń» atymen attas nemese onyń o jaq, bu jaǵynda. Sol Bojko halyqtyń atynan týra saılaný arqyly depýtattyqqa ketip, bıylǵy tasqynnyń «renishin» týra qabyldamaıtyn boldy. Bojkony «bog» saqtap qaldy...

BÚGİN 22.03.2016 j.

Keshe jaýǵan Naýryzdyń aqshaqaryn jamylǵan Qostanaı Ulystyń uly kúni merekesin toılap ketti. Qalanyń ortalyq alańyna bilim ordalary, óndiris pen mekemeler, san túrli ulttardyń mádenıet oshaqtary Naýryzdyń rámizindeı bolyp qalyptasyp qalǵan kıgiz úılerdi samsatyp tikken. Qazaq kıgiz úıleriniń janynda ulttyq kıim kıgen jandardyń qarasy kóp. Naýryz aq qar, kók muzǵa oranyp kelgenimen, «tabıǵatta reńsiz raı joq» dep qabyldaıtyn, kóktemniń «esik qaǵyp» turǵanyn túsinetin jurtshylyqtyń kóńili kóterińki. Oblys basshylyǵy da óz tilekterin joldap úlgirdi. Ulystyń uly kúni merekesin qala turǵyndarymen birge qarsy alý úshin A.Baıtursynov atyndaǵy Qostanaı memlekettik ýnıversıteti Ahań atyndaǵy kıgiz úı tigip, án aıtyp, jyr tógýde. Naýryz qutty bolsyn, aǵaıyn!

Almas Ábsadyq

Qostanaı