Tipti qaıyrymsyz degen adamnyń júrgeniń túbinen meıirim tabylady. Sonyń bir dáleli – «Jan jylýy» baǵdarlamasy. Bir ǵana mysal, dárigerler tipti «adam qataryna qosylýy ekitalaı» dep aýrýhanadan da shyǵaryp tastaǵan Dıdar Qaıypov sońǵy úmitin arqalap «Jan jylýyna» kelgen ol qaıyrymdy jandardyń kómegimen emdelýge 7 myń AQSH dollaryn jınap qana qoımaı, Almaty oblysy ákimdiginen baspanaǵa qol jetkizip, memleket tarapynan tegin protezge ıe bolǵan. Búginde Dıdar aıaqqa turyp, tipti úılenýge de talpynys jasap jatqanǵa uqsaıdy. Jalpy osyndaı 20 jetim balaǵa otbasy jylýyn syılap, 13 balanyń ómirin ajal aýzynan alyp qalǵan, úısiz-kúısiz 8 birdeı otbasynyń baspanaly bolýyna tikeleı septigi tıgen «Jan jylýy» baǵdarlamasyna bıyl 5 jyl.
Osyǵan oraı, naýryzdyń 14-i saǵat keshki 19.00-de Astana qalasy «Qazaqstan» ortalyq konsert saraıynda «Jan jylýy» qaıyrymdylyq konserti ótkeli jatyr. Onda osy baǵdarlamanyń arqasynda ómirinde úlken ózgerister bolǵan kóptegen keıipkerler kelip, ózderi jaıly baıandap beredi. Jáne olardyń buǵan deıingi ómirlerinen beınekórinister kórsetiledi. Esterińizge sala ketsek, solardyń kelesi bireýleri – úsh jasar Arýjan Orazbekova men 12 jastaǵy Ramazan Esmaǵambetov. Ekeýi de týǵannan kálsı jetispeýshiliginiń zardap shegip, sonyń saldarynan nebary úsh jasqa deıin Arýjannyń aıaǵy 30 jerden, al Ramazannyń tipti dene súıekteri 50 jerden synǵan. Jáne jaryq dúnıege sap-saý bop kelip, tek endi ǵana qylyǵy shyǵyp júgirip júrgen sátinde anasynyń kózin ala bere, qaıdan tapqany belgisiz, margansovka untaǵyn jutyp qoıyp óńeshin kúıdirip alǵan Áset esimdi búldirshin. Osylardyń barlyǵyn biz «Jan jylýy» arqyly kórgende jan-júregimiz ezilip, tipti meıirimdilerimiz qolymyzdan kelgen kómegimizdi kórsetýge kirisip te ketip edik qoı. Joǵaryda Dıdar Qaıypovqa kórsetilgen kómek jaıly jazsaq, endi osy attary atalǵan úsh jasar Arýjan men 10 jastan endi ǵana asa bergen Ramazan, ıaǵnı, taǵdyry egiz ekeý de Máskeýge baryp emdelip, ózdiginen otyryp, tipti Arýjan júre alatyn da halge jetip otyr. Aıta ketý kerek, Arýjanǵa kómek qolyn sozǵan «Jas Otan» jastar qanaty. Olar qaıyrymdylyq konsertin uıymdastyryp, alty mıllıon teńge qarajat jınap bergen. Al Astana qalasy ákimdigi Ramazanǵa eki bólmeli páter syılaǵan. Qazir ol úıden bolsa da sabaq oqyp júr.
Osylardy óz kózińizben kórgińiz kelse, naýryzdyń 14-i kúni saǵat keshki 19.00-de Astana qalasy «Qazaqstan» ortalyq konsert saraıynda ótetin«Jan jylýy» qaıyrymdylyq konsertine kelińiz. Konsert tegin. Esesine sizder úshin bul keshte Gúlnur Orazymbetova, Dosymjan Tańatarov, Baqyt Shadaeva, Ardaq Balajanova, Jańabaı Ótegenuly, Maıra İlıasova syndy qazaq estrada juldyzdary ǵana emes, sonymen birge múmkindigi shekteýli jandardan quralǵan «Qolarbadaǵy bıshiler» toby men «Shashý» otbasylyq ansambliniń qaıtalanbas ónerin tamashalaısyzdar. Kesh qonaqtary qatarynda qoǵam qaıratkerleri, depýtattar men keıipkerlerge kómek bergen mesenattar, BAQ ókilderi, óner juldyzdary bolady. Al konsert sońynda taǵy bir kómekke muqtaj búldirshinge qaıyrymdylyq kórsetiledi. Iaǵnı, qalasańyz sizdiń de keýdeńizdegi meıirim, shapaǵatyńyz osy keshte kóńilińiz qalaǵan janǵa kómek qolyn usynýdan erekshe shabyt alatyn bolady. Al ol qaıyrymyńyz abaısyzda margansovka untaǵyn jutyp qoıyp, óńeshi kúıip qalǵan tórt jasar almatylyq Áset Jıenbekovke kóp kómegin tıgizetinin umytpaǵaısyz.
