Aqyn, qoǵam qaıratkeri Oljas Súleımenov jer saýdasyna qatysty óz ustanymyn bildirdi, dep habarlaıdy Qamshy.kz Azattyqqa silteme jasap.

Jerge qatysty oıyn Oljas Súleımenov Almatyda óziniń 80 jyldyq mereıtoıyna oraı ótip jatqan konferensıa kezinde aıtqan.

"Halyq jer máselesine kelgende óziniń shyn nıetin tanytyp otyr dep oılaımyn. Muny kimniń basqaryp, paıdalanyp otyrǵany túsiniksiz. Biraq, men ózim jerdi, aýqymdy jer telimderin sheteldikterge uzaq merzimge berý qaýipti dep sanaımyn. Óıtkeni, 25, 49 jyl ishinde ol jerlerge shetelderden jumysshy adamdar qonystandyrylyp, ornyǵyp alýy múmkin. Onda bul máseleni sheshý qıyn bolady", - deıdi aqyn. 

Sondaı-aq, aqyn jer reformasynyń eldiń Táýelsizdigine de nuqsan keltirýi múmkin ekendigin, sol úshin zańǵa jerdi jalǵa berý merzimin qysqartatyn ózgerister engizý kerektigin aıtqan.