Kúni keshe Qytaıdaǵy bir tanysym maǵan habarlasyp: «Álimjan, sen jazýshy Jumabaı Bilálulymen suhbat ótkizemin dep, ol kisiniń basyn qypqyzyl daýǵa qaldyryp otyrsyń ǵoı?!...» dedi ázil-qaljyń aralas. Meniń bul suhbatym elaralyq «Qazaq eli» gazetinde 2012 jyly «Álem ádebıetiniń tórinen kórinetin  týyndylarymyz kóp» degen atpen jáne «Shýn.kz» aqparattyq partalynda «Hanzýlar qazaqty jaqsy kóredi» dep ózgertilip  berilgen bolatyn. Men bilsem kezinde bul maqala Qytaı qazaqtarynyń «Sen qazaq» saıty kóshirip bergen.  Arada tórt jyl ótken soń bıyl Qytaıdyń «Kúltegin» saıtyna bireý qaıta salypty. Sóıtsek, olar osy áńgimedegi bir suraqtyń jaýabyna shamdanǵan sıaqty. Sodan ba, joq álde bireýler tyrnaq astynan kir izdegisi keldime, otqa maı quıyp, dýyldatyp jatqan kórinedi.

Bul suhbatta jazýshy J.Biláluly kináli bolatyndaı áńgime bolǵan joq edi ǵoı? degen tańǵalyspen 4 jyldyń aldyndaǵy «Qazaq eli» gazeti men «Shýn.kz» saıtynda jarıalanǵan suhbbatty qaıta oqyp shyqtym. Biraq ózbasym Zuqa batyrdyń urpaǵynyń shamyna tıetin oǵash áńgimeni kezdestire almadym.

Meniń budan túsingenim J.Biláluly jazýshy Batyrqan Qusbegınniń «Zuqa batyr» romany Shyńjańdaǵy tarıhı romandardyń serkesi nemese shyńy dep aıtý kerek sekildi. Solaı dep aıtpaǵany úshin J.Biláluly kináli ma? Al romandaǵy bas keıipker Zuqa batyrdyń erligin, batyrlyǵyn Júkeń óte ádemi jetkizip otyr. Qazaq rýly elin tumsyqtyǵa shoqtyrmaı, qanattyǵa qaqtyrmaı asyraǵan erlerin «batyr» dep ataǵan joq pa?!  Al romanda batyr beınesi, onyń erligi, parasattylyǵy, qaıratkerligi qalaı sýretteledi ol jazýshynyń sheberligine baılanysty.     

«...Beseýi desem az bolar, on roman tarıhta qalyp jatsa sonyń ózi jetip jatyr» dep aıtqan qarymdy qalamger J.Biláluly áriptesi B.Qusbegınniń «Zuqa batyryn» aýyzǵa alýynyń ózi atalǵan romanǵa degen  qurmeti,  jaqsy lebizi dep  qabyldaǵan jón bolar.

Jaqynda Dúnıe júzi qazaqtary qaýymdastyǵynyń «Atajurt» baspasynan jazýshy B.Qusbegınniń «Zuqa batyr» romany jaryq kóripti. Redaksıa qyzmetkerleriniń aıtýynsha bul roman 2000 jyly memleket josparymen basylǵan eken, osy joly Zuqa batyrdyń 150 jyldyǵyna oraılastyryp onyń urpaqtary ekinshi ret qaıta bastyrypty. Nıet durys, árýaq razy bolsyn!

Zuqa batyrdyń 150 jyldyǵyn keń kólemdi, dabyraly atap ótýdi uıymdastyrǵan urpaqtarynyń qýanyshyna ortaqpyz, mereı toı qutty bolsyn, aǵaıyn!    Álimjan ÁSHİMULY

Jýrnalıs