Baýyrjan Halıollany kútý
Kiretin uıyqtasa túsine óleń
Men seni kıesi bar kisi dep em.
Jaılaýyn jyr-ǵalamnyń dúbirleter
Dóneniń bar edi ǵoı kisinegen?!
Aqyn eń jyr aınasyn kirletpegen,
Basyńdy Baqtyqoja qurmettegen.
Qoǵadaı ıiletin Nurlan aǵań
Ótsin dep ómiri dý-dúrmekpenen.
Kisendep qasıetti qalam, tildi
Júrmisiń shomyldyryp talantyńdy.
Qoldaǵy altynyńdy qumǵa kómip
Taba almaı qaldyń ba álde sol altyndy?
Júırikti qor etkende qolǵa matap,
Bolady qısyq temir balǵaǵa tap.
Otyńa maı quıǵanmen jurt gýildep
Janyńa jeleý bolmas jalǵan ataq.
Daqpyrttyń demeý bolmas qur qamshysy
Aqynnyń jármeńke ǵoı burqansa ishi.
Tańdaıyn talaılardyń jibitpeı me
Úzilip túsken jyrdyń bir tamshysy.
Demeımin inimizdiń syıy úzildi,
Deı kórme aǵamyzdyń kúıi zildi.
Sanyna saqsyr tıgen buǵydaı bop
Shaıqaımyn shańyraqtaı múıizimdi.
Aýzyńa keptelmese jyr aptyǵyp
Shaıyrdy sharshatady turaqtylyq.
Men seni kútip júrmin qansonarda
Keler dep quryq súırep, qur at minip!
***
Júrekte – jyr, kóńilde – kúı turǵanmen
Ótip jatyr ómirim ıt-yrǵańmen.
Ýaıymmen oıanam tańǵy uıqymnan
Oıanýdyń ornyna syıqyrly ánmen.
Ýaqyt – zaıa, samaldaı jyr espegen,
Taǵdyrym da sekildi bir eski óleń.
Ótip jatyr túnderim ýaıymmen
Ketip jatyr kúnderim kúrespenen.
Aıtylǵanda ótirik bet qyzarmaı
Yzalanam bárine kekti jandaı.
Bárin alyp – satatyn han bazarda
Shyndyǵymdy júremin ótkize almaı.
Iý-qıý shyǵarar esebin kim
Ádiletpen tolmasa ese bir kún
Nesi qymbat qorlyqpen ótken kúnniń,
Nesi aıaýly óksigen osy ómirdiń?...
***
Jurt júredi syrtymnan kóp ton piship,
Syrt kóz úshin kıý kerek ońdy ishik.
Táıke turǵan asyǵymdy búk deıdi,
Alshy túsken saqam ylǵı boldy shik.
Aǵaıynǵa alasaryp jaqpaımyn,
Qaqpaqylǵa túsip ketken doptaımyn
Boıyma shaq jumystardy atqarmaı
Oıyma shaq emes sózdi ottaımyn.
Kóńilime túskennen soń qaıaý muń
Ońyp ketken syrmaqtaǵy boıaýmyn.
Yńǵaıynan tabylam dep árkimniń
Ózimdi ózim joǵaltýǵa taıaýmyn...
***
Baram - kelemin,
sendelip kelem-ketemin,
Ne bolsa soǵan kóńildi – eleńdetemin
Qadalma, qalam, qaǵazǵa kenedeı bolyp,
Óle almaı júrip, óńmendep óleń ne teńim?!
«Syrymdy jurtqa jaıýǵa» nege yntyǵamyn,
Jelkemdi qıyp barady kógen-tumarym.
...Aranyn ashqan ashqaraq kóńil-peshime
Kómeıi tolyp qalǵansha óleń tyǵamyn!
***
Temirshe.
Temirshe dos.
Temirshe aǵam,
Ógeıligin kórsetti-aý ómir saǵan.
Shómishten qysyp quıdy ol sybaǵańdy
Qytymyr sekildenip kelin sarań.
Burqatyp anda-sanda jyr daýylyn
Saǵynyp júrýshi ediń syr qaýynyn.
Myltyǵyńdy kezenip búkeń-búkeń
Qýalap Jetisýdyń qyrǵaýylyn.
Ańshylyq qurar shaǵyń tek kúzde edi,
Qustardyń aldarqatyp kóp tizbegi
Qyrǵaýyl qanatyndaı qyzyl-jasyl
Kóp arman qýǵanyńmen jetkizbedi
Jetem dep Syrǵa bardyń, qyrǵa bardyń,
Úni ediń suńqyldaǵan bir ǵalamnyń.
Qyrǵaýyl qaýyrsyny sekildengen
Kim bilgen baıansyzyn jyr-qalamnyń!
Aqtóbelik aqyn Ershat Qaıboldındi aıtysqa shaqyrý
Ershat inim!
Tóbeńe shabytyńnyń ker shatyryn.
Terbetip Nurpeıistiń arýaǵyn
Ala kel aqyn babań berse aqylyn.
Áıteýir óleń ákel astanaǵa
Sóz ákel aıta almaıtyn basqa bala.
Torǵaıdaı shyryldaǵan janyńdy ákel
Tasyǵan meımanasy tas qalaǵa.
Sýsaǵan saǵynyshtan kim arylǵan,
Shyǵaıyn ıiskelep qumarymnan.
Esime Esenbaıdy túsiretin –
Bir jutym jupar ákel Shubaryńnan.
Qonatyn kez bolmaı ma órenge baq,
Qaraǵym, kúmiljimeı tómen qarap
Ótejan aýylynyń otyn ákel
Bir shýmaq byldyrlaǵan óleńge orap.
Aq perzent aqyny ediń Aqtóbeniń,
Áldılep jyr-ananyń baq bóbegin.
Bosatyp besiginen qol-aıaǵyn
Aıtyp kel Qýandyqtyń jatqa óleńin.
Almaty dýyldasyn, dúrkiresin,
Aq jańbyr óleń bolyp sirkiresin.
Kósheni sypyratyn Kamazdary
Abaıdyń dańǵylynan jyr kúresin.
Kúdiktiń kók tumany túriler shaq,
Týady tulparǵa da miniler sát.
Alańdap júrmin kúnde áýejaıǵa
Ańqyldap kep qalar dep inim Ershat!
Joǵalǵan dos
Zamanda shaıdaı ashyq kúshilerim
Sen meniń bolyp ediń bir tireýim.
Mamyrajaı kúnderdi esińe alyp
Jón shyǵar jaımashýaq jyr tileýiń.
Elgezek qalpyńmenen eleń etip
Sezýshi eń kóńilde kún sirkireýin.
Elemeı júrýshi edik tize qossaq
Sergeldeń sel-ómirdiń silkileýin.
Ol dáýren oralmasqa ketken shyǵar
Nesine kúlbiltelep irkilemin.
Kúshi barlar sońyma túsken kezde
Kóleńkemniń ózinen úrkip ediń.
Kórmegen-bilmegen bop kúmiljımiz
Ortaǵa kirgen ómir túlkilerin.
Basyńa baq qonǵanda bas- alty kún
Kókten túse qalǵandaı kúrkirediń.
Avgııdiń at qorasyn tazartarda
Bolyp em boq kúreıtin bir kúregiń
Maǵan bılik degeniń buıym emes
Qoldap tursa Qudaı men jurtym-elim.
Qala berem ózimniń bıigimde
Elemeı kúdiktiń kóp kirpilerin.
Ajal kelip qalmasa aıaqasty
Úzedi jaqsylyqtan kim kúderin.
Sabasyna túsedi darıa da
Kirbińniń tabar mezgil múmkin emin.
Qabyl bolsa qanekı bir tilegim
Túzeler rıasyz kúlkilerim.
«Men solaı bar shańnan bir silkinemin,
Men solaı rahattanyp bir kúlemin»
Syr sandyǵym syńǵyrlap ashylmaı júr
Joǵalǵan kúmis baýly kiltim ediń!
Óz úıim
Óz úıim – óleń tósegim,
Osynda ónip, ósemin.
Osynda kelip qutylam
Dańǵazasynan kósheniń.
Osynda búkil qazynam,
Kezderim bolsa qajyǵan
Áńki de táńki basymdy
Osynda tyǵyp jazylam.
Kóldeneń kózdiń suǵynan
Osynda kelip tyǵylam.
Úırekteı atsa bireýler
Úıime jetip jyǵylam.
Aıta alman sútteı aqpyn dep,
Úıimniń dámin tatqym kep,
Qansyrap kelip osy úıge
Qanymdy jalap jattym kóp!
Kóńirsip jansa oshaǵym
Kún menen túndi qosamyn.
Kútedi meni osy úıde
Kúderin úzbeı qosaǵym.
Ákemnen qalǵan shańyraq
Qalmasyn dedim qańyrap.
Jamyrap kelip jatsa eken
Ulym men qyzym mańyrap.
Altynnan ardaq bosaǵam,
Aıtarmyz áli qosh-aman.
Bildirmeı alshy osy úıde
Janymdy bir kún, jasaǵan.
ULYQBEK ESDÁÝLET
Nelikten nemeresi Esdáýlettiń
Qýmady qyr sońynan esh dáýlettiń.
Ol sirá adal uly bolsa kerek
El dańqyn eseleıtin esti áýlettiń.
Qýlyqqa Ulyqbekti qylypty epsiz,
Turǵany qandaı jaqsy kúlip keksiz.
Ulyqbek óleńsiz de kúnin kórer,
Óleń kúni ne bolar Ulyqbeksiz?!
Taba almaı aǵalary berer baǵa,
Jasynan atandyrdy sheber bala.
Dán bolyp túsken jeri daryndy uldyń –
Ósirgen topyraq qoı neler dana.
Bolmady ol jaqsylarǵa jaıdaq ini,
Oqalap óleń etip oıdaǵyny.
İshine ınternettiń ıne suǵyp,
Tabady qaıdaǵy men jaıdaǵyny.
Tamshysy tekti Zaısan tolqynynyń
Alady aspanǵa ushyp ol tynymyn.
Senbeseń, sheshindirip kórińdershi –
Qanat bar astynda qos qoltyǵynyń.
Ótedi jyr ǵumyry jaryspenen,
Ol úshin bóri de óleń, barys ta óleń.
Qulaǵynyń ishinde antena bar
Júredi habarlasyp ǵaryshpenen.
Táńirim qýat bersin talapqa tyń,
Janyna jaryq túsir, jolatpa tún.
Ushýǵa talpynasyń sen de kókke –
Qasyńda júrgennen soń qanatty aqyn!
AQAN SERİNİŃ MUŃY
(Orazalynyń rýhyna)
Tabıǵattyń zańyna narazymyn
Oralmaıtyn bolsa eger Oraz inim:
Tógip-tógip ótetin telegeı jyr
Tartylmasa tiline tarazynyń!
Tabıǵattyń zańyna narazymyn.
Ózegine óner-ot túsken inim
Tarqamaıtyn boldy ǵoı ishtegi muń.
Qyran qusy qaırylyp tasqa túsip
Kókke qarap kúrsingen qusbegimin.
Shańqyldaǵan kóp shýlan sol qyranym
Topqa túsken uldarǵa boldy uranym.
Tamaǵymda qumyǵyp ókinishim,
Saǵaǵynda qaldy úniń dombyranyń.
Sózdi kásip etkender,
jyrdy mansap
Kez kelgende saǵymdy syndyrar shaq
Meniń túsinigimdi tárk etkende
Seniń kisiligińdi júrmin ańsap.
Qulmambetsiń,
Kódeksiń,
Súıinbaısyń,
Bizge tartqan táńirdiń syıyndaısyń
Átteń, endi bıikke shyǵyp alyp
Tóbesinen túlki-jyr quıylmaısyń.
Biri bolmaı sóz satqan saýdagerdiń
Ózi boldyń toqymnan aýǵan erdiń.
Seni kózge jarq etip bir kórsetken
Mıǵrajyna táńirdiń táýba dermin.
Bádáýımin shildede qatalaǵan,
Saǵyndym seni kórmeı sahanadan.
... Ertoqymyn arqalap jalǵyz qaıtqan
Saǵynaıdyń asynan Aqan aǵam.
Asyl – Ajar týǵan kún
Júr-aý dep qyr astynda tosyp ajal
Sen endi esh qoryqpa, shoshyma, jar.
Ózińdi aparady alystarǵa
Aýzyńnan túse salǵan Asyl-Ajar.
Óziń ǵoı jarqyldaǵan janar, túri,
Ózińnen kemisi joq, joq artyǵy.
Osylaı ala berse tárbıeńdi
Ekinshi Baqytjamal bolar túbi.
Qadamyn qapysyz ǵyp sanap basqan
Barlyǵyn ańǵaratyn qabaq-qastan.
Qaıtkende uqsaımyn dep uly anama
Sátimen ıneńdi de sabaqtasqan.
Tezirek oralsyn dep qosyna aman
Ol bizdiń bárimizdi tosyp alań.
Qasıet-qadirińdi kıe tutyp
Basady orynyńdy osy balań.
Oıansań ortasynda keıde túnniń
Qaıtqany qaıyrymen beınetińniń
Beınesi sol bolar ma bizge jetken
Aqbala, Hanymbıke, Zeınekúldiń!
Ekeýmiz eski qonys, eńistemiz
Urpaqty shyǵararmyz óriske biz.
Júrer-aý shyr aınalyp qasymyzda
Jebeýshi aq qanatty perishtemiz.
Aınalǵan qasynda áli shyrkóbelek,
Ol saǵan párýana bir kóbelek.
Sen mensiz qalǵan kúni úmittenem
Sol ǵana kóz jasyńdy súrte me dep.
TABYLDY DOSYMOV
Taýlar men tóbelerdi aıyrmaǵan
Shaıyr bop kórinbeıdi shaıyr maǵan.
Teńizdiń jaǵasynda sýsap turmyn
Kemeńe qolym jetpeı qaıyrlaǵan.
Qalaısha tirligińde tanymaǵam?
Bolady taǵdyryńa janym alań.
Kúńgirtteý kún astynda kúńirenip
Júrgendeı kórinesiń áli maǵan?
Ultym-aý, ulysym-aý dep shyryldar
Júrekte jasyrýly kóp syryń bar.
Alashqa asqaqtatpaı ataǵyńdy
Janyńda júrdi me eken jeksuryndar?!
Aqynǵa ajal jetpeı joq baqyt shyn,
Ashshy men tushshyny da kóp tatypsyń.
Shalquıryq shańyn úzer shaq týǵanda
Sharq urǵan saparyńdy toqtatypsyń.
Tabylyp taýdan bıik tabaldyryq
Bermedi-aý zálim zaman saǵan da yryq.
Sheriń men shemenińdi shyǵarýǵa
Aıǵaılap ánge bastyń amal quryp.
Ónersiz ózderiniń basyn kúıtter
Shubyryp júrgen shyǵar qasyńda ıtter.
Bireýler pendeligin jasyrdyq der,
Bireýler elge qunyn asyrdyq der.
Keterin biledi olar kim súrinip,
Astynan tabanymnyń qum sýyryp,
Arqamnan qaqqan bolyp ózimniń de
Qasymda qaraýyldap júr shubyryp.
Sózińe otyrǵam joq sóz qosqaly,
Jolyńa shalar edim boz qasqany.
Mahambetti óltirgen dushpany emes,
Mahambetti óltirgen óz dostary!
Tirlikte aq pen qara sabylysqan
Aqyn kóp joldasy – aıar, jary – mystan.
Suraıtyn erikkende erdiń qasyn
Janashyr degenińniń bári – dushpan.
Bul ózi álimsaqtan biletin is,
Baıyzdap taýyp jatsyń mine tynys.
Úderip kósher kezde kerýen-ómir
Úzilip ketý qandaı uly ókinish.
Kóterip qurmetińe tostarymdy
Sharappen jubataıyn ash qaryndy.
Tiri emes, ólilerden dos tańdasam,
Men seni tańdar edim, dos Tabyldy!
ULYTAÝDYŃ QYMYZY
Qanekı, qymyzyńnan quıshy, al, qyzym,
Shanaqtan án tógilsin kúı shalqysyn.
Qymyzdyń shalyǵymen jazǵan jyrdan
Kók maısa shabyndyqtyń ısi ańqysyn.
Biz úshin atamyzdyń asy – qymyz,
Qymyzben alshy túser asyǵymyz.
Sýsynyn mahabbattyń qanyp ish dep
Qolynan qymyz quısyn ǵashyǵymyz.
Bal dámi tańǵaltady, tolǵantady,
Toltyryp tostaǵandy qolǵa al taǵy.
Qymyzben qosa jutqyń keledi eken
Qymsynyp qymyz bergen sol qalqany.
Qymyz quı!
Qymyz ishsem – bapqa kelem,
Qymyzdan artyq qazaq tappaǵan em.
Atamnyń asyn ishsem, jelik býyp,
Aýzymnan aqtarylar qap-qap óleń.
Shólinen shyǵyp edim saǵynyshtyń,
Qymyzyn Ulytaýdyń qanyp ishtim.
Ańqańdy alqaǵanda appaq sýsyn
Basylar alaýlaǵan jalyny ishtiń.
Qadirin qaıdan bilsin joq úlginiń,
Torsyqty tosyrqaıdy kóp ul búgin.
Baptaýly bal qymyzdan ańqyp turar
Tútinin ańsadym-aý tobylǵynyń.
Telmirtpeı tostaǵanǵa, qymyzdy ber,
Qymyzǵa qazaqtaı bop kim úzdiger.
Men naǵyz qazaqpyn ba, basqamyn ba –
Qyzyǵyp jutqanymda qymyz biler.
Bolsyn dep úıir-úıir jylqym aman
Kóńilim Qambar ata jurtyna alań.
Balshyqtaı uldarymdy baýlı bersin
Jaryqtyq jýsan ısi burqyraǵan.
Sheshemniń shelek shaıyp, is qylǵany,
Teri mes, jez samaýyr, mys qumǵany
Elesteı kólbeńdeıdi kóz aldymda
Tatysa tańdaıyma ystyń dámi.
Qapysyz qadirleseń qonaǵyńdy,
Qaraǵym, qyltyńdatpa konágińdi.
Sarqyp quı sabadaǵy sýsynyńdy,
Jibitsin jybyrlaǵan tamaǵymdy!
QUDAIBERDİ MYRZABEKOV ELÝDE.
Qudashym, Qudash – inim Qudaıberdi,
Men saǵan teńgermeımin bylaıǵy eldi.
Serini sertke berik sen dep bilem,
Býynyp shyǵa kelseń qynaı beldi.
Basyńnan jyldar zýlap ótkenimen,
Men seni áli jas qoı dep kelip em.
Atyńdy baýyrlatyp talaı óttiń
Qara óleń darıasynyń ótkelinen.
Janyńdy jarqyldatsań jyrǵa jaıyp,
Taǵatym talaı meniń turdy azaıyp.
Aýzyńnan aqyq sózder aqtarylsa
Bolýshy em tús kórgendeı bir ǵajaıyp.
Keıde sút te az bolyp, kóp kómiriń,
Aıtystyń bir minbediń kók temirin.
Kómbege qara úzip kele me dep
Qysýmen taqymymdy ótti ómirim.
Kómbege Qulager bop jetpegender
Báriń de búgin maǵan ókpeleńder.
Kermede typyrshyǵan tulpar qusap
Júldesiz ketti qansha tekti óleńder.
Jaratqan, jaqsylardy jat qylmashy,
Shaıyrǵa anyq eki shaq týmasy.
Syımadyń qalybyna bul zamannyń,
Noqtaǵa syımaǵandaı attyń basy.
Aıtystyń taptyń dep em bel balasyn,
Óziń de talaılarǵa endi aǵasyń.
Ońaıǵa ıilmeıtin ór basymdy
Iiltken talantyńmen sen ǵanasyń!
Jaqyndaý júrmeseń de óte maǵan
Men seni degen joqpyn bóten adam.
Kıesi Kókshetaýdyń sen dep bilem
Batasyn berip ketken Kóken aǵań.
Kıip ap saq babanyń saptamasyn
Sen endi tulpar baptap, at baǵasyń.
Qazaqqa qazaq bolý ońaı emes,
Taǵdyryń talantyńdy taptamasyn!
Elýdiń eńkeıtpesin taıanǵany,
San bulbul panalaıdy saıańdy áli.
Kóksheni kóterýge jaraısyńdar
Tólegen, óziń jáne Baıanǵalı.
Saqa dep ıirmeıdi kim asyǵyn,
El sorly – tanymasa shyn asylyn.
Kógildir Kókshetaýdyń Qudashynyń
Tileımin jyǵylmaýyn jyǵasynyń!
Sózge qurmet
Qazaqtyń barlyq sózi menshigimde,
Bereıin menshigimenen enshi kimge.
Óleńdi shýmaq=shýmaq shashý úshin,
Shabytym, shamyrqanyp kelshi kúnde!
Aq jaýyn sekildenip sirkiregen
Quıylsa kókten kúnde shirkin óleń.
Tatysa tańdaıyma sózdiń dámi
Qumarym basylmasa jyr tilegen!
Qazaqtyń ekeýiniń biri uǵynar
Óleńde júregimniń dirili bar.
Máńgilik saparyńdy bastaý úshin
Sózderim, máńgilikke tirilip al!
Jazǵyrar bul óleńdi jazdy dep kim,
Talǵajaý ettim sózdi azdy- kóp kún.
Sájdege qoımaı júrgen basymdy ıip,
Ana til- ardaǵyma taǵzym ettim!
*****
Áziliń tolyp turma shyn,
Qaljyńdap qoıshy, qurdasym.
Túserdeı mıym aýyzǵa
Aýryp taǵy tur basym.
Sýyryp, shanshyp janarym
Sezdirse syrqat habaryn
Osynaý mıdyń ishinde
Kim bilsin- ne joq, ne baryn...
Mıymda bári, mıymda:
Buıymda, teńge, tıyn da.
Mıymda oınaq salady
Aınalǵan óleń quıynǵa.
Mıymda bári, mıymda:
Májilis, mımyrt jıyn da.
Adaldan kelgen madaq ta,
Adamnan kórgen sıym da.
Mıymda mynaý dert alǵan
Máńgilik óshpes bar tańbań-
Aıaqtan shalǵan aıarlyq,
Alaqan- qaqqan arqamnan.
Árkimniń sózin maldanar
Aıarǵa ońaı aldanar
Kesh dese, kóne salatyn
Aqymaq qalpym ol da bar.
Sýmańdap jetken ósek te,
Sýynyp qalǵan tósek te.
Mazalap jatyr sol mıdy
Umyttyq qansha desek te.
Jarym da, kári sheshem de,
Jaýymda ketken esem de,
Shyrt etip synǵan kesem de
Shýylǵa toly kósheń de
Mıymda bári, mıymda:
Bilmeımin, qalaı syıýda
Syzdaǵan basta sol mıǵa
Solqyldap aýrý qıyn ba?!
******
Qyz ediń- kózindegi monshaǵy ázir,
Súıýshi em,
Súımeıtindeı onsha qazir
Meni seni jaqsy kórem demegem.
Sumdyq- aı, ótipti sonshama jyl?!
Jazylmaı qalǵandaı – aý qanshama jyr.
Júr- aý dep bárin ishteı óziń bilip,
Qaldyra jazdappyn- aý sezimdi umyt.
Qajetsiz bul ne degen qatygezdik,
Jóni joq bul ne degen tózimdilik?
Qamyqpa samaıyńa qonsa kúmis,
Lapyldap júr mende áli sol saǵynysh.
Keýdeni kernep turǵan sózdi aıtpaǵan
Tilimdi kesý kerek- bolsa qylysh!
Qasyńda júrmin ǵoı dep kúıeýsimen,
Men seni súıem áli, súıem, súıem.
Qyl ótpes ortamyzǵa qaıdan túsken
Myna bir júgirmekter jıensingen...
Mańynda úıirilgen qyz=kelinnen
Murshań joq qaıyrlatyn bizge múldem.
Men seniń júregińnen aınalaıyn
Bárine jetemin dep júz bólingen!
Qarttyqtyń kúpisine ıyǵym shaq
Men búgin ata boldym ıi jumsaq.
Mahabbat shýaǵyna bóle meni
Kózińniń anda=sanda qıyǵyn sap!
******
Ashyndyrma aqyndy.
Ashynbasyn.
Basynbasyn bireýler asyl basyn.
Salerdeı- Mosartty mańaılaǵan
Júrgen joq pa, baıqańdar, qasyńda sum?
Muńaıtpańdar aqyndy.
Muńaımasyn,
Muńaıtpaýdyń tabyńdar myń aılasyn
Basqalardyń qabaǵy kirbıse de
Aqynyńnyń kózinde kún oınasyn!
Jasytpańdar aqyndy.
Jasymasyn.
Tutqıyldan túspesin basyna syn.
Etemin dep birimdi qaıtsem ekeý
Kúıbeńmenen mıy onyń ashymasyn.
Kúrsintpeńder aqyndy.
Kúrsinbesin.
Qýanyshtan júregi dúrsildesin.
Qasiretten qan jylap júregi onyń
Áreń súırep júrmesin qur súldesin.
...Teńizde de qaıyrǵa batyp kemem
Jyr shóliniń azabyn tartyp kelem.
Naǵyz aqyn ýaıymnyń ýyn iship,
Qasiretpen jazady baqytty óleń!
