AQ QAIYŃ KÓKTEMEDİ

(Mahabbat elegıasy)

Kóline qustar qaıtqan kóktem edi,

Ókpek jel teristikten óktem edi.

Sol jyly aq baltyrly appaq qaıyń

Búr jarmaı, japyraǵy kóktemedi.

 

Qonbady aqqýlar da aq aıdynǵa,

Basynan Sarykóldiń baq taıdy da.

Qazdar da ketip edi qaıyrylmaı,

Kelmedi aqbas qyran Altaıdyń da.

 

Tek qana shaǵalalar shańqyldasyp,

Qamystan uıa salyp, qaýqyldasyp,

Shýlatyp azan-qazan, Sarykóldi

Kóterdi bastaryna, qarqyldasyp.

Shalyqtaı,

Birde kúlip,

Birde jylap,

Shaǵala óz áýenin ketti jyrlap.

İsi joq eshteńemen, moıny yrǵaıdaı

Jaǵadan kókqutan júr balyq urlap.

 

Malshynyp,

Qyzyl boıaý sıasyna,

Kún batty kúreńitip uıasyna.

Taýlar tur qaraýytyp,

Úreı shashyp

Kóldegi jandylardyń sanasyna.

 

Aq qaıyń jaǵadaǵy kóktemedi,

Kóktemniń jeli sýyq óktem edi.

Qalqamen talaı bolǵan sol bir jerge

Júregim, nege ekenin, bettemedi...

 

Kýási mahabbattyń – jalǵyz qaıyń,

Mahabbat aýǵan menen: osy jaıym.

Qýaryp, daýyl soqsa, qularsyń-aý,

Taǵdyrdyń myna maǵan nesi daıyn?

 

Kóńilim qasiretti keshken edi,

Bir muńdy bir muń qýyp, óksheledi.

Sorǵalap,

Jarqyraǵan iz qaldyryp,

Bir juldyz jerge jetpeı óshken edi...

 

KÓŃİLİMNİŃ BAQSHASY

Oırandalǵan kóńilimniń baqshasy,

Aq kúıinde peıilimdi saqtashy!

Neni kútem,

Tul taǵdyrdan,

Osynaý

Daıyn turǵan maǵan degen «jaqshasy»...

 

Dúnıege kelgenimde,

Shyr etip,

Neni aıtpaq boldym jylap,

Jyr etip?

Bildim be eken?

Táńir isin –

Ajaldyń

Óle-ólgenshe júretinin kúzetip...

 

Jaryp shyǵyp,

Anashymnyń qursaǵyn,

Sezinippin dúnıeniń qursaýyn –

Tabıǵattyń doly kúshi áldılep,

Aqtútegi aıqara ashqan qushaǵyn.

 

Men týǵanda ulyǵany kók bóri,

Maǵan uqsas eken onyń kóp jeri.

Aıyrmamyz –

Ol bóri de,

Men seri

Bóri ólse,

Jerlenbeıdi,

Joq kóri.

 

Men týǵanda aqtútektiń qahary –

Qasireti eken, taǵdyr qatpary.

Arpalyssam,

Tiri qalý arman bop –

Ómir zańy

Bar ózindik baptary.

 

Tań qalamyn,

Táńir is dese de –

Túsiripti, kisi isin, kisige?..

Qulshynsań da jaqsylyqqa umtylyp,

Neden, nege, kógermeıdi kósege?

 

Kókter me eken,

Kóńilimniń baqshasy?

Ýa, qıamet!

Jolymdy ańdyp,

Baqpashy!

Ýa, Táńirim!

Borandatyp týǵan tentek ulyńdy,

Shetinetpeı,

Aman-esen saqtashy!

 

 

ÁJE ARÝAǴY

 

Aınaldym arýaǵyńnan ájetaıym!

(Bilseń ǵoı jebeýińniń qajet-aıyn...)

Qaı jerim jaqpaǵanyn Jaratqanǵa,

Jazdadym ólip qala jazataıym.

 

Ajalmen ómirimniń alysqany,

Tań men tún tirlik úshin soǵysqany.

Esimde,

Nege umytam,

Tań aldynda

Ájetaı!

Arýaǵyń kep bolysqany.

 

Ajal da jeńilmeıtin albasty eken,

Talasyp ǵumyryma arbasty ekeý –

Ólimdi ómir jeńip qan tógissiz,

Men edim,

Qyl kópirden aman ótken!

 

Jaralǵan qasiretten –

Qasıetiń,

Zulmattyń tartqan ediń taqsiretin.

Ashtyqtan jarty aýyldy alyp qalǵan,

Qyzy ediń shyqqan tegiń aqsúıektiń...

 

Jatsań da,

Qara jerde,

Qasıetiń –

Jeńgensiń taýqymettiń qasiretin.

Elesi ketpeı qoıdy arýaǵyńnyń,

Súıretken aq kebinin aqırettiń...

 

Aq kórsem,

Kóz aldymda sen turasyń,

Aǵaryp,

Anadaıdan kózge urasyń.

Ańdamaı adasatyn kezderimde,

Betimdi qubylaǵa sen burǵasyń.

 

Aldyńda paryzym bar balań ekem,

Dastanym aıaqtalmaı qaıda ketem?

Ájege nemereniń mahabbatyn,

Dám-tuzym taýsylǵansha jyrlap ótem!

 

 

ERLER QAIDA?!.

 

(Kúltóbeniń basyndaǵy zar)

 

Júr, dosym,

Oı bólisip,

Almasaıyq,

Basyna Kúltóbeniń jaıǵasaıyq.

Joǵaltyp almaımyz ba memleketti –

Áı, osy,

Kele jatyr

Soǵan saıyp?..

 

Ult tuǵyry bosańsyp,

Saǵy synǵan.

Qaıda barsań –

Qazaq júr ishten tynǵan.

Serpin joq,

«Dúr etý» de joqtyń qasy –

Qasiret móltildep tur kózde tunǵan.

 

Ultynyń baqyty úshin jany pıda –

Qan jaldap, ot keshetin erler qaıda?!

Ulystyń bolashaǵy qyl ústinde –

Borkemik, bosańsýdyń nesi paıda?

 

Ejelden kele jatqan janshylystan,

Býynǵa túsken kesel –

Qorqynyshtan –

Saǵaty toqtaǵan ba qazaǵymnyń,

Sharshaǵan buǵaýdaǵy bulqynystan?

 

Qınalmaı ólý arman boldy anyq,

Ketkendeı elimizden arýaq aýyp.

Dúnıe teris aınalyp shyǵa keldi –

Taıǵanaq saıasattan aldym qaýip...

 

Talan-taraj,

Bolǵanda

Tý-talaqaı,

Elińde qul bolýdyń nesi «alaqaı»?

Raqymsyz,

Kerden ketken basshylarǵa

Keregi –

Jarıalaý «han talapaı»...

 

Jalynam –

Kók aspandy shań jappasyn!

Qalqytyp, qara jerdi qan baspasyn!

Táńirim!

Estımisiń daýysymdy?

Elimdi ishten shyqqan jaý shappasyn!

 

Kerek pe

Qalt-qult etken

Qorlyq dáýir?

Moınyńda qul qamyty,

Arqań jaýyr.

Qurdymnan qoldan jasap «ulyǵanǵa»,

Tabynǵan qul sananyń nesi táýir?

 

Er bar ma

El arýaǵyn arqalaǵan?!

(Ajaldan arqasymen qalqalaǵan).

Erin tyńdar el bolsa,

Eshqashanda

Ulystyń baǵy qashyp,

Tarqamaǵan!

 

Osy edi,

Dosym, seni shaqyrǵanym,

Attandap,

Arýaq qysyp,

Aqyrǵanym.

Saǵan senem,

Senemin qazaǵyma –

Aldyńda syrymdy aıtyp «shashylǵanym»...

 

GÚLSEZİM

 

Jarq etken janaryńmen tań qaldyryp,

Sulýlyq qoıdyń meni tamsandyryp.

Tógilgen tal boıyńa qara shashyń,

Ár bergen aq júzińe jandandyryp.

 

Kózińniń tuńǵıyǵy ketti tartyp,

Shyǵýǵa dármenim joq qaıta maltyp.

Talasqan sulýlyǵy sulýlyqpen,

Jan bar ma dúnıede senen artyq?!

 

Tutatyp júregime ot jandyryp,

Janymdy menshiktediń en saldyryp.

Sezimniń sıqyrlaǵan jumbaǵy ma?

Ózińe tabyndyrdyń es tandyryp.

 

Gúl sezim oranǵandaı ot sezimge,

Órtendim oralǵandaı jas kezime.

Kúıse de naızaǵaıdyń jasynyna,

Shydaǵan ne aıtarsyń, bul tózimge!

 

Gúl sezim gúlge oranyp, qundaqtalǵan,

Janymdaı náziktigiń qymbat maǵan!

Somdasam músinińdi qasıettep,

Jyrymmen aq dıdaryń symbattalǵan.

 

Nazyńmen jyr suradyń,

Qıa almadym,

Renjitip almaıyn dep,

Jyr arnadym.

Sulýsyń!

Sulýsyń-aý,

Talasym joq,

Osydan ári qaraı bara almadym...

 

 

Gúlsezimniń sýretin kórgen bette esime «sol bir kez», jastyq shaǵym túse ketkeni! Alǵashqy mahabbatymnyń beınesine uqsastyǵy bolǵan soń, Gúlekeńniń «Aǵa, men ánin ózim shyǵaraıyn, Gúlsezim degen esimge arnap bir óleń jazyp berińizshi» degen erke nazyn jerge tastaı almadym. Al, Gúlsezim qaryndasym, jyr kerek bolsa osy, endi senen ánin kútemiz!

Meniń óleńderime «án shyǵarýshylardan» kende emespin, biraq sol sazgerler meniń óleńime ánin shyǵarady da, árman qaraı búgejektep qalady. Talaı ret telefonmen meniń óleńime shyǵarǵan ánimen án salyp, ándetip te berdi baýyrlarym, al biraq ári qaraı qozǵalys joq... Sóıtse, ándi notaǵa túsirý úshin aqsha, orınjırovkasyna taǵy aqsha, sosyn ánshige de aqsha tóleý kerek eken sahnaǵa, jurtshylyqqa shyǵarý úshin.

Áı, shirkin, ıt zaman-aı, ónerdi de aqshaǵa qaratyp, tusap tastaǵan!

 

JÚREKPEN SYRLASÝ

            (Muń elegıasy)

 

Júregim,

Jylamashy,

Bilem, bilem –

Laılapty tunyǵyńdy qaıǵy kileń.

Tegińniń bile tura náziktigin,

Qońsy qoný neńdi alǵan, muń elimen?

 

Ketesiń óz-ózińnen muńǵa batyp,

Qaıtpeksiń,

Batyp turyp,

Ýyn tatyp?!

Ne istersiń qubylmaly bul kóńilge,

Alyp-ushyp,

Ketti áne

Taǵy satyp!

 

Keýdemniń «Buzamyn!» –dep, – tas qamalyn»,

Júregim deısiń keıde «bulqynamyn»

Sezim ol –

Turaǵy joq,

Jalǵyz ózim...

O, nesi-aı!

Nemeneme julqynamyn?

 

Keýdemniń qıratpasam tas qamalyn,

Qalmapty tańdaý mende,

Basqa amalym.

Júrek, sezim, kóńilge,

Osy úsheýge

Bilmeppin,

Ózi ekenmin –

Baspananyń!

 

Júregim,

Jalǵyzdyǵyń –

Túrmedesiń,

Ne istersiń,

Táńir isi –

Kúrmegesin.

Súıip turyp, artynan ursatynym –

Yrqyma kónip keıde,

Júrmegesin.

 

Kóńilim qulazysa –

Urandaısyń,

Janaza shyǵaratyn qurandaısyń...

Júregim-aý,

Júregim!

Qaıtsem ekem?

Aýyryp qalmaı taǵy tura almaısyń...

 

LAǴYNET

 

Bilmeppin,

Laǵynet baryn mahabbatta,

(Belgisiz, atatyny qaı saǵatta...)

Jaǵaǵa laqtyrylǵan balyqtaıyn,

Taǵdyrym sonsha nege qatalatty?

 

Qalaısha kórmegenmin,

Kúnniń daǵyn?!

Júıkemdi,

Qaraýytyp

Jep turǵanyn.

Bilmeppin,

Mahabbattyń ot ekenin,

Otpen oınaý –

Opattyń ózi ekenin!

Áı, shirkin!

Sodan bolar?

Laǵynettiń

Kózdegen nysanasy –

Men ekenmin...

 

Qamshylap,

Taspa tilip qyr jonynan,

Naızaǵaı jarqyldaǵan oń,

Solynan –

Keń baıtaq Saryarqamnyń dalasynda,

Qara bult qalmaı qoıdy qyr sońymnan.

 

Ketipti,

Aıdyń betin qotyr basyp,

Sodan ba?

Muhıttar da,

Tur ǵoı tasyp!

Jaýyn da,

Tolastamaı

Sodan ba eken?

Kóńilim órekpigen qaldy jasyp.

 

Baz keship tolqyndardyń ortasynda,

Tiri qap júzgishtiktiń arqasynda –

Júzip áli kelemin,

Áı, bir kúni...

Qorqamyn

Soǵar ma dep, jartasyna.

 

Júrippin laǵynettiń qursaýynda,

Qaıteıin,

Ótkenimdi ursaıyn ba?

Adamzat!

Saq bolyńdar laǵynetten,

Túspeńder laǵynettiń tusaýyna!

 

SATQYNDYQ

Ashylsa qara aspany Jaratqannyń,

Armanym kórý edi, tań atqanyn.

Ǵasyrdan ne kútsem de,

Jaratqannyń

İshinde kim biledi ne jatqanyn?

 

Qorqamyn saıasattan qylaptanǵan...

Kún shyqsa kúnshyǵystan «qulaqtanǵan».

Shoshytyp jer taǵdyry, el taǵdyry,

Úreı tur sanalarda turaqtanǵan.

 

Aınala antalaǵan ajdahalar,

İshinde uıǵyry da,

Qalmaq ta bar.

Jer ketse ajdahanyń aranynda,

Qazaqty qazaq izdep, qaıdan tabar?

 

Kórmeýge ólepatty surapyldy,

«Attandap!» júregimnen jyr atyldy.

Ólgenin ákesiniń estirtkendeı,

Degen sóz qandaı jaman «Jer satyldy».

 

Adamnyń,

Adamdyǵy –

Sóz degesin,

Sóıledim,

Zulymdyqqa tózbegesin.

Kettim ǵoı shydaı almaı,

Shydaı almaı!

Kóz jasy qazaǵymnyń kóldegesin.

 

Ne istersiń,

Bul qazaqqa –

Ólermenge,

Mazaq bop kóringen soń kórermenge!

Baı bolyp ketpekshi eken jerin satyp,

Qytaıdy ishke ótkizip jibergende...

 

Bul jerde zymıandyq saıasat bar,

Naızań da boılamaıtyn,

Qatpar-qatpar.

Artynda «jer satýdyń» –

El satý tur,

Bul jerde –

Satqyndyq bar!

Jaýyzdyq bar!

 

 

TULDYR-BULDYR DÚNIE-AI!

(Qasiret elegıasy)

Tul bolǵan tuldyr dúnıe, janymdy meniń kúırettiń,

Tiri ólikke aınalǵan, sulbamdy qaıda súırettiń?

Janymnan ábden bezdirip, aıamastan,

Sanamdy –

Jadylap jyndy baqsydaı, zikirge de úırettiń...

 

Qýraıy jelmen syzylǵan, estilmeıdi dala úni,

Aıly túnde ulyǵan, qaıda ketti bóri úni?

Qazaqtyń uly dalasyn, taskereń etip Táńirim,

Melshıgen tastaı meńireý, eter me eken bir kúni?

 

Mylqaýdaı kereń tirlikti, tastap bir kún ketermin,

Buldyrdan ótip, tazaryp, tylsymǵa da ótermin.

Artymda qalyp bar jatqan, máńgirgen kórt urpaqty,

Jáýdiretip kózderin, ketkende sonda, ne etermin?..

 

(Bile almaı áli júrgenim – áı, osy men kimmin?!

Adammyn?

Álde...

Bórimin?

Meni aqyn etken kim?!

Tún bolsa juldyz aralap,

Tańsholpanmen syrlasyp,

Táńirim syzǵan mejeden qalaısha ótip ketkenmin?!)

 

Óńimde kórqap asynyp, kebinimdi súıretken,

Kórbilte jolǵa saramdy, kónbeske bolmaı úıretken –

Men edim-aý,

Myna men,

Jazmyshtan jazym kútkendeı,

Aq Edildeı aq armanyn, baıqaýsyzda kúıretken...

 

Qaıter edim osy men, dúnıege kelmegende,

Tileýin ata-anamnyń Táńirim bermegende?

Ne ister edim taǵdyrǵa, kórdemshe bop týylǵanda,

Teksiz bolsam, nemenem qalar edi, ólmegende?

 

Ne istersiń Táńir isi –

Baqyt izdep, kezbegende,

Tańdap bergen qasiret-qaıǵysyna kónbegende?

Áı, osy-áı!..

Synaq bolar,

Synaǵy Jaratqannyń?

Qaıtemin, qaıtsem endi shydap kelip,

Tózbegende?

(Ne demeıdi mendeı jan, Azattyqqa shóldegende...)

 

JETİSPEI TUR BİRDEŃE...

Jetispeı tur,

Jetpeı tur-aý, birdeńe,

Kıip ketip, birdeńeler kóldeneń.

Naızaǵaı ol –

Qaharynan aırylǵan,

Kúrkir emes,

Kúrkildegen birdeme...

 

Jetispeı tur,

Jerge, kókke birdeńe,

(Nemene eken, jaqyndaǵan irgeme?)

Bulttardyń da kóz jastary solypty,

Jaýyn da emes –

Sirkelegen birdeme.

 

Jetispeı tur,

Birdeńeler ǵurpyma,

Ne bolǵan bul,

Ejelgi jurt ultyma?

Kótere almaı,

Mansap, dańq, baılyqty,

(Qan tolypty bireýlerdiń urtyna...)

 

Jetispeı tur,

Birdeńeler zamanǵa,

Áý, qazaǵym!

At-kóligiń aman ba?

Jetispeıdi,

Jetispeı tur birdeńe,

İzdegenim birdeńeni jaman ba?

 

Jetispeı tur,

Aı men Kúnge birdeńe,

Jer de mynaý, shyrq aınalǵan –

Qur dene.

Úmit oty syǵyraıǵan keýdede,

Qorqyp júrmin,

Sóne me dep birdemde.

 

Keýdemde tur,

Basyp alǵan birdeńe,

Albastydaı áıteýir bir áldene.

Aı týǵanda qoımaı-qoımaı ulıdy,

Adam da emes,

Bóri de emes,

Birdeme.

 

Qyzyq emes,

Mynaý ómir endigi,

Ne keregi,

Dúnıeniń keńdigi?

Bir tarynyń qaýyzyna syıdyryp,

Qurtty-aý meni,

Birdemeniń mendigi...

 

 

QULYNYM-AÝ, QAZAǴYMNYŃ BALASY!

 

Qulynym-aý!

Qazaǵymnyń balasy,

Joqshylyqtan byt-shyt bolǵan sanasy.

«Lańkessiń!» – dep,

Aıdar taqqan naqaqtan,

Batyp ketti sum bıliktiń jalasy!

 

Jerimizdi «satý» degen talasy,

Nursultannyń alpys eki aılasy –

Jermen birge Otan tústi saýdaǵa,

Opasyzda Otan joǵyn qarashy!

 

Qulynym-aý!

Qazaǵymnyń balasy,

Tar bop saǵan qazaǵyńnyń dalasy –

Qaqpaqyldap,

Keri teýip keýdeńnen,

Shytynady qazaǵyńnyń qalasy...

 

Qańǵyrǵanda,

It nalasyn arqalap,

Artyńda – Órt!

Aldyńda tur –

Jarqabaq!

«Nursultandar» shoshańdatyp myltyǵyn,

Taýyspaqshy ǵumyryńdy párshalap!

 

Aınalaıyn!

Qazaǵymnyń balasy,

Qara túnek tónip tur-aý,

Qarashy –

Tynysyńdy tunshyqtyrdy byqsyǵan,

Saıasattyń tútindegen shalasy.

 

Qulynym-aı!

Qazaǵymnyń balasy,

«Lańkes!» – dep tur,

Seni bılik,

Qarashy!

Mazaǵy ma?

Azaby ma Qudaıdyń –

Qaıda ulttyń Abylaıdaı danasy?!

 

Basymyzǵa salyp turyp –

Azapty,

«Óltir! – dep tur,

Nazarbaev – qazaqty».

Qansha ýaqyt aıta almaı júr edi,

Úkim osy –

Qurtý maqsat –

Qazaqty!

(Taǵdyr ma eken, qarashy bul mazaqty!..)

 

 

ÓKPEM MENİŃ QAZANDAI!

 

Baýyr basqan atameken jerime,

Shyǵyp ta alǵan qazaǵymnyń tórine –

Seniń de atań, ulty basqa bolsa da,

Jatyr osy qazaq jeri kórinde!

 

Ókpem meniń saǵan qara qazandaı,

Talaı-talaı tartqyzdyrttyń sazamdy-aı!

Qazaq edik,

Quraq ushqan aldyńda,

Qudaı bersin,

Ókpeletseń –

Jazańdy-aı!

 

Jerim úshin alańdarǵa shyqqanda,

Sen ediń-aý,

Boı tasalap, yqqan da...

Ne paıda bar, aıtyp bershi, senderge,

Qytaı kelip týymyzdy jyqqanda?

 

«Seniń jeriń, qorǵa – deısiń, – jerińdi!»

Bilip edim, tap osylaı derińdi...

Áli óshpegen basqynshylyq pıǵyly –

Myna senen,

Meniń janym jerindi!

 

Sen ólmediń,

Men ólgende –

Ashtyqtan,

Ol zulmat ta, bolyp edi, qastyqtan.

Seniń kúnáń –

Shubarlanǵan tilim de,

Jaý bolǵanyń jaqsy edi,

«Dostyqtan»...

 

Aman qaldyq –

Aralaspaı qanymyz,

Óspese de, sol kúıinde, sanymyz.

Táýba, táýba, qazaq bolyp qaldyq biz,

Qınalsa da tizeń batqan janymyz.

 

Men shyqqanda,

Sen shyqpadyń alańǵa!

Sebebi sol –

Jatjurttyq tur sanańda.

Bilem, bilem, Otanyń bar balama,

Meniń jerim,

Emes seniń –

Anań da...

 

 

 

  TÚISİNÝ

 

Dástúrli,

Qasıetti qaıran dinim,

«Táńir!» – dep,

Kúńirengen qaıda úniń?

Tarbıǵan qý aǵashtyń butaǵyndaı,

Shyrmalyp,

Túrli aǵymǵa tústiń búgin.

 

Alashtyń tabynǵany –

Táńir edi,

Ǵaryshqa jalbarynyp «Ámir!» – dedi,

Ulyǵan aıǵa qarap bórideıin,

Aspanǵa qolyn jaıǵan táýir edi.

 

Aspan – Táńir,

Ustanym – Islam dini,

Yrymshyl salt-dástúri,

Iman dili.

Eńirep, jalbarynyp, qol jaıǵanda,

Aspanmen ushtastyrǵan –

Qazaq tili!

 

Quqaıyn kórip talaı «táıiriniń»,

Artyn kútken shapaǵat qaıyrynyń –

Jaralǵan Qudiretten –

Qazaq tili

Idirgen Táńiriniń meıirimin.

 

Táńirdi aıyrbastap «Alla» atyna,

Tósedik tilimizdi qaı jatyna?..

Degen soń Muhammedti «Alla elshisi»,

Arabtyń den qoıǵanbyz til hatyna.

 

Ózgermedi –

Salt-dástúr,

Dilim,

Tilim,

Sanamdy buza almady eshbir ilim!

Denemde zyryldaǵan qanym –

Qazaq

Muhammed musylmannyń –

Úmbetimin.

(Táńirdiń aıshyǵynyń sýretimin...)

 

 

SEN EMESSİŃ, SEN EMES!

 

Áı, Nursultan!

Beri qara –

Myna sen!

Ult atynan aıtamyn,

Tyńda,

Sen!

«Han talapaı»,

Osyǵan sen ákeldiń –

Basyń ketpek,

Aıtqan sózge kónbeseń:

 

Sen emes!

Bostandyqty alyp bergen,

Sen kelgeli ultymnyń kúni sóngen!

Belovejden mastyqtyń saldarynan,

Egemendik qazaqqa ózi kelgen...

 

Qazaq halqy sensiz de kúnin kórgen,

Shırek ǵasyr merzimde neń bar bergen?!

Bir ólip, bir tirilip kele jatqan –

Ultymnyń sen kelgeli oty sóngen!

 

Sen ediń!

At-tonyńdy ala qashqan,

Egemendik alýdan záreń ushqan.

Tarıhtyń tańdaýynsyz taqqa otyryp,

Toıymsyz ámirlerdiń jolyn qushqan.

 

Sen de emessiń qutqarǵan bodandyqtan,

Qol úzbeı áli júrsiń odaqtyqtan.

Sen emessiń,

Sen emes – qutqarýshy,

Sensiz-daǵy kún batyp, tańym atqan!

 

Sen emessiń!

Eshkim de,

Sen emessiń,

Shapaǵat kórgen emes senen eshkim!

Alańysyń qorqaýlyq –

Jemqorlyqtyń,

Ne dese de, áıteýir,

Er emessiń!

 

Sózińe senip seniń, alańdaǵam,

Jurt ne demeıt –

Sózine qaramaǵam...

Osy kúni,

Sen bar ǵoı

Myna seniń,

Bes tıyndyq qunyń joq, ólde maǵan!

 

Máńgilikke,

Qur beker, dári izdeme,

İzdetem dep ketersiń múrdemińe!

Máńgilik –

Elge istegen jaqsylyq ol,

Sony da bilý saǵan kúrdeli me?

 

Qazaqty qazaq etip qurap kelgen,

Sen emessiń!

Sen eldi –

Buzyp bergen!

Ózeýreısiń, «halqym» – dep,

«Otanym» – dep,

Eki júzdi aıardy kim bar kórgen?!

 

Máńgilik qaıdan kelsin sol qolańa,

Eskertkish bolsa-daǵy qý molańa?

Eskertkish bolsa, bolar,

Zulymdyqtyń:

Ordasy –

Ataýy joq tas qalaǵa...

 

Toqsan bir metr bolyp boı túzetken –

Jeri joq «Qazaq eli» monýmentpen;

Bul qazaq seziner me joıylaryn,

«Qazaqstandyq» degen ult –

Tól qujatpen...

 

Jıyrma bes jyl emin-erkin tonadyń,

Qazaq ultyn ash qasqyrdaı taladyń!

Jańaózende soǵys ashyp ultyma,

Atqyzyp ta,

Qanymyzǵa toımadyń!

(Taırańdaýdy tóbemizge qoımadyń)

 

Jerdiń astyn ajdahadaı jalmadyń,

«Toqta!» – desek,

Qaperińe almadyń.

Bárin sattyń,

Jer edi ǵoı qalǵany!

Ony sattyń, oryndalyp armanyń.

 

(Máńgilik bola almaıdy ury ókimet,

Ulty jat, qazaqtarǵa jaý úkimet.

Shırek ǵasyr tamyryn tereń jaıǵan,

Bulardyń qulaýy da bolar hıkmet...)

 

Bere almaımyz qytaıǵa –

Jerimizdi!

Quldyqqa sata almaısyń elimizdi!

Ár qazaqtyń qorǵany –

Táńiri bar,

Sen emessiń qazatyn kórimizdi!

Qýanysh Muqtaı