Sibir jarasynan kóz jumǵan er adam aýrýhanaǵa kesh barǵan. Bul týraly QR Densaýlyq saqtaý jáne áleýmettik damý mınıstri Tamara Dúısenova jýrnalıserge bergen suhbatynda aıtty, - dep habarlaıdy Qamshy.kz.
Buǵan deıin BAQ-ta er adamnyń oblys aýrýhanalarynda kómek ala almaǵany týraly aqparat taraǵan bolatyn.
Esterińizge sala keteıik, sibir jarasynan kóz jumǵan er adamnyń uly ákesiniń on kún boıy dárigerlerden kómek ala almaǵany týraly aıtqan edi.
"Qaıtys bolǵan azamatqa kelsek, ol aýrýhanaǵa baryp, qolymdy kesip aldym degen. Medısınalyq uıym sol arqyly sibir jarasy juǵady dep oılamaǵan. Ol óz aýdanynda kómek alýy tıis edi. Odan keıin qajettilik týyndaǵan jaǵdaıda oblystyq aýrýhanaǵa kelýi kerek bolatyn. Bundaǵy eń basty másele – naýqastyń dárigerlerge kesh qaralýy. Ekinshiden, ol abaı bolmaǵan jáne úshinshiden, medısınalyq uıymda azamattyń qolyn mal soıǵanda kesip alǵany týraly aqparat bolmaǵan. Qazirgi tańda oblystyq jáne aýdandyq aýrýhanalar tekserilýde", - dedi T.Dúısenova.
Aıta keteıik, asa qaýipti aýrý oshaǵynyń tabylyp, eki adamnyń qaıtys bolýyna baılanysty Qaraǵandy oblysy Shet aýdany Erkindik aýyly men odan 50 km radıýs qashyqtyqtaǵy aýmaqqa 22 maýsymda tótenshe jaǵdaı jarıalandy. Aýylǵa baratyn barlyq baǵyttar men dala joldary jabyldy. Bul aýyldan aýyl sharýashylyq ónimderin tasymaldaýǵa tyıym salynyp, kólik qatynasy toqtatyldy. Qazirgi tańda respýblıkalyq Veterınarlyq baqylaý jáne qadaǵalaý komıtetiniń mamandary arnaýly qural-jabdyqtarymen Erkindik aýylynda tekserý jumystaryn júrgizýde.
Mamandardyń aıtýynsha Erkindik aýylynan ázirge sibir jarasyn juqtyrǵan bir mal ǵana anyqtaldy. Aýylda 465 adam turady. Aýrý maldyń etin tutynǵandarmen 62 adam, onyń ishinde 21 bala aralasqan. Búgingi tańda barlyǵyna derlik emdik sharalar júrgizilip, tekseristen ótkizildi. Olardan aýrý qozdyrǵyshy anyqtalǵan joq.
Qaraǵandy oblystyq ınfeksıalyq aýrýhanasynda sibir jarasyn juqtyrǵan 7 naýqas em qabyldaýda.
Qaraǵandy oblysynyń İshki ister departamenti QR QK 327 bap 1 tarmaǵy boıynsha Veterınarlyq erejelerdi jáne ósimdikterdiń aýrýlary men zıankesterine qarsy talaptardyń saqtamalmaýynan aýyr saldarǵa alyp kelý faktisi boıynsha qylmystyq is qozǵady.
