Qazaq ónerinde qoıylymdarymen tanylyp, eldiń qoshemetine bólenip júrgen teatr aktrısasy Gúlsim Qarataeva Aqtóbedegi jastardy qurban qylǵan lańkestik jaǵdaıǵa júreginiń qan jylaıtynyn aıtty, - dep habarlaıdy Qamshy.kz Nur.kz -ke silteme jasap.
«Lańkesterdiń kózin qurttyq dep qýanyp jatqanda men qýana almadym. Ózegimdi ottaı órtegen óksik kózimnen kól bolyp tógildi. Olardyń biri ákesiz ósse, endi biri anasynyń qaıda ketkenin bilmegen. Olar joqshylyqtan júıkesi tozyp, jaratqanyna júginip járdem suraǵan jaraly jandar. Biraq, aırandaı uıyǵan elimizge iritki salýshylardyń jeteginde ketkenderin baıqamaı da qalǵan bolý kerek. Sanalaryna sebilgen ýdyń boılaryna tarap, júrekterin tasqa aınaldyryp jibergenin de sezbegen shyǵar», - deıdi Gúlsim Qarataeva.
Ol ýlanǵan jastardyń sanasyndaǵy sezimdi óziniń de basynan ótkergenin aıtyp berdi.
«Bul ózimniń basymnan ótken jaǵdaı, bir kúnde mıym astan-kesteń boldy. Keshkilik úıde uıqym kelmegen soń bir kitapty aldym. Avtory esimde joq, túrik avtorlary bolý kerek, muqabasy aq, orys tilindegi kitap. Bir keshte, tań atqansha oqyp shyqtym. Mıym 180 gradýsqa ózgerip ketti. Erteńine kóship ketetindeı taksı ustap, jantalasyp meshitke bardym. Kitap satyp alýdy ádetke aınaldyrdym. Meshitten shyǵyp, janyndaǵy dúkennen kúnde kitap alamyn. Ákelgen boıda oqyp tastaımyn. Tańerteń alǵanymdy túske deıin oqyp, qaıta baryp alamyn. Ol kitaptar tuńǵıyqqa tarta beredi. Basynda ol bilinbeıdi, kirgennen keıin sora beredi, batpaqqa batyra beredi», - deıdi ol.
Sana sezimin ýlaǵan oı otbasyna da áser etken. Ártis túbegeıli ımıjin ózgertken.
«Myna jer haram, namaz oqymaıtyn, kıinbeı júretin adamǵa kápir dep qaraý sezimderiniń barlyǵy mende boldy. Kitaptarda bul ómirde kim jupyny kıinedi sol ana jaqta kıimniń asylyn kıedi degen. Buryn úıimdi ásemdep, túrli dızaınǵa mán berip, ózgertetin edim. Kitap oqyp alǵannan keıin úıdiń úshin qalaı jupyny qylamyn dep oılaıtyn boldym. Úıdegi balalarymnyń teledıdar qaraǵanyna qarsy bola bastadym. Ony laqtyryp tastaýǵa deıin bardym. Oramal tarta bastadym, kıimderim ózgerdi. Shkaf ishine basqa kıimder keldi», - deıdi Gúlsim Qarataeva.
Ol teatrdaǵy áriptesterine shaıtandaı qaraǵanyn da jasyrǵan joq.
«Jumysqa kelgende áriptesterime shaıtan sıaqty qaraıtyn boldym. Jan jaǵyń haram, aınalań aram adamdar. Balań, sen anasyń, baýyrsyń, qazaqsyń, ultsyń degen sezimdi joǵaltyp jiberedi eken. Olar balańmen de qorǵana almaısyń deıdi. 2006 jyldarda saqaly bar adamdar sırek júretin. Men sol kezde balaqtyń shań tımes úshin qysqa bolý kerektigin, árbir saqalda perishte otyratynyn oqydym. Men dinge til tıgizgim kelmeıdi, biraq kitaptar fanatızmge jeteleıdi. Olar ádebıetter arqyly sana sezimdi ýlap alyp, birden basqa arnaǵa buryp jiberedi», - deıdi ol barlyq qaýiptiń dinı ádebıetterde ekenin eskertip.
«Men azan shaqyrýdy estigen boıda kóshede kele jatsam da sol jerde otyra qalyp, esh qysylmaı mańdaıymdy jerge tıgizýge daıyn boldym. Iaǵnı men basqa qadamǵa da barýym múmkin degen sóz. Olar aldymen ishki dińgekti nyǵaıtady. Adam óziniń qurban bolyp jatqanyn baıqamaı qalady. Sondyqtan jastardy solardan qutqarýymyz kerek. Biz perishte emespiz, pendemiz. Adamdar dinge rýhanı tirek izdep barady. Rýhanı izdenistegi adamǵa kim birinshi kezigedi, sonyń jeteginde ketedi», - deıdi sanasyna ýlanǵan jastar oılaǵanda júreginiń qan jylaıtynyn aıtqan ártis.
Ártis ýlanǵan sanasyn ýaqyttyń ózgertkenin de aıtyp berdi.
«Mende de polısıa qyzmetkerlerine degen basqa kózqaras boldy. Olar janalǵyshtar sıaqty bolyp kórinetin. Kitapta boljamdar jasaǵan aqyrzaman bolatyn kezde qoldaryna taıaq sıaqty qarý ustaǵan adamdar bolady. Olar onymen adamdarǵa qorlyq kórsetedi degen. Maǵan ol jazbadaǵy adamdar kózime polısıa qyzmetkerleri bolyp elestedi. Jekkórinish boldy. Keıin aıaǵym aýyr boldy, densaýlyǵym kelmedi, kitap oqý da qalyp qoıdy. Jaılap jan jaǵymjaǵy adamdardy jaqsy kóre bastadym. Men aq-qarasyn áli kúnge deıin aıyra almaımyn. Anaý durys, mynaý burys degennen qorqamyn. Keıde osy qoǵam shynymen de durys emes shyǵar dep oılaımyn. Islam dininiń kórkem jaqtaryn kóbirek nasıhattaýymyz kerek», - dedi teatr aktrısasy Gúlsim Qarataeva.
