Pavlodar oblysynda Ertis ózeninde balyqtyń qyrylý sebepteri anyqtalyp jatyr. Aqsý jáne Maı aýdandarynda balyq jaǵalaýǵa jaqyn júzip kelip, ony qolmen ustap alýǵa bolady, - dep habarlaıdy Qamshy.kz pavlodarnews.kz -ke silteme jasap.
Bul týraly beıneni búgin qoǵamshyl-ekolog Erjan Orazalınov óziniń Facebook-gi paraqshasynda jarıa etken. Avtordyń aıtýynsha, beıne Aqsý qalasyndaǵy qaıyq stansıasy mańynda túsirilgen. Balyqshylar jeksenbi kúni Ertistiń túbinde qyzyl daqtar paıda bolyp, keıin balyq jaǵalaýǵa jaqyndap, keıbireýi sý betine qalqyp shyǵa bastaǵanyn alǵa tartty.
Dál osyndaı jaǵdaı Maı aýdanynda da oryn aldy. Jer qoınaýyn paıdalaný, qorshaǵan orta jáne sý resýrstary basqarmasy basshysynyń orynbasary Áıgerim Qabyltaevanyń aıtýynsha, vedomstvo ekologıa jáne tutynýshylar quqyǵyn qorǵaý departamentterimen birlesip balyqtarǵa ne bolǵanyn anyqtap jatyr.
«Tutynýshylardyń quqyǵyn qorǵaý departamenti radıologıalyq jáne aýyr metaldardyń mólsherin bilý úshin sýdyń úlgisin alǵan. Nátıjesi erteń tústen keıin belgili bolady. Orman jáne ań aýlaý sharýashylyǵy ınspeksıasy oqıǵa bolǵan jerge bardy, biraq balyqtyń qyrylýyn baıqamady. Biz jaǵdaıdy baqylaýǵa aldyq», - dedi Áıgerim Qabyltaeva.
Aqsý qalasy ákiminiń orynbasary Qarshyǵa Arynovtyń paıymdaýynsha, ekologıalyq apat týraly aıtýǵa áli erte. -«Aldyn ala boljam boıynsha balyqtardy sý betine shyǵýǵa otteginiń jetispeýshiligi májbúrlep otyr. Bul nemen baılanysty ekenin áli anyqtap jatyrmyz. Balyq pen sýdyń úlgisi Pavlodar qalasyndaǵy ulttyq saraptama ortalyǵyna jiberildi. Sýǵa qatysty nátıjeni erteń alamyz, al balyq jóninde aqparat beısenbi-juma kúnderi ǵana daıyn bolady. Qalalyq sý arnasy óz zerthanasynda saǵat saıyn sýdyń quramyn tekserip otyr. Taldaý qorytyndysyna sáıkes sý ishýge jaramdy. Negizi, aǵyp jatqan Ertis ózeniniń úlken bóliginde atalmysh jaǵdaı tirkelmegen, bul jaǵdaı kishigirim qoınaýda oryn aldy. Mamandar bolǵan jaǵdaıdy jaqynda sý deńgeıiniń kóterilip, tez arada qaıta túse bastaǵanymen baılanystyrady. Degenmen, anyǵyn saraptamadan soń ǵana aıta alamyz», - dedi Qarshyǵa Arynov.
