Sibir jarasy Almaty oblysyna da jetti. Kerbulaq aýdanynyń úsh turǵyny atalǵan indetti juqtyrǵan, - dep habarlaıdy Qamshy.kz 31 arnaǵa silteme jasap.

Naýqastarǵa der kezinde shara qoldanyp, aman qaldy. Bul máseleni óz baqylaýlaryna alǵan aýdan prokýrorlary óńirdiń veterınarıa salasynda birqatar zań buzý faktilerin anyqtady. 

Anyqtalǵandaı Kerbulaq aýdanynda Sibir jarasyna qarsy egiletin vaksınalar tek jertólede saqtalyp kelgen. Soraqysy sol, atalǵan preparattardyń qujat boıynsha maldarǵa egildi dep esep berilgenin prokýrorlar anyqtaǵan. Bir ǵana Sarybulaq aýyldyq okrýgine júrgizilgen prokýrorlyq tekseris kezinde 30 myńnan astam  Sibir jarasyna qarsy vaksınanyń qujat boıynsha maldarǵa egilip, al shyn máninde tek jórtólede saqtalyp turǵany anyqtaldy.

BAÝYRJAN TOIBAEV, Almaty oblysy prokýratýrasy basqarma prokýrory:

- Sibir jarasyna qatysty 30 myńnan astam vaksına tabyldy. Bul vaksınalar veterınarlyq qujatqa sáıkes 2015 jyly qoldanyp ketken. Alaıda, aıtyp ótkendeı vaksınalar is júzinde múldem qoldanylmaǵan.

Al Kerbulaq aýdanynda sibir jarasyn juqtyrǵan úsh adam Qarashoqy aýylynyń turǵyndary. Olarmen qatynasta bolǵandarǵa da tolyqtaı tekseris júrgizildi. Dárigerlerdiń sózinshe indetti juqtyrǵandarmen qarym-qatynasta bolǵan adamdardyń densaýlyqtarynan sibir jarasyna qatysty eshqandaı belgi anyqtalmapty.

GÚLNARA JÚNİSOVA, Almaty oblystyq densaýlyq saqtaý basqarmasynyń bólim meńgerýshisi:

- Sibir jarasyn juqtyrǵan 3 adammen qatynasta bolǵan 104 adam tekserildi. Profılaktıkalyq emdik sharalar qoldandy. Qarashoqy aýylynyń turǵyndary maldy soıý kezinde sibir jarasyn juqtyrǵan. Qazir olar tolyqtaı em qabyldap, jaǵdaılary jaqsy.

Qazir Kerbulaq aýdanynyń  prokýrorlary is júzinde qoldanylmaǵan vaksınalarǵa baılanysty zań buzýshylyqty tergep, qujattardy sotqa daıyndap jatyr. Al sibir jarasyn Almaty oblysynan ózge Qaraǵandy jáne Pavlodar oblysynyń turǵyndary da atalǵan indetti juqtyrǵan edi.