Terakt kezinde Nıssada bolǵan qazaqstandyq Altynaı Sultanǵalıeva qaıǵyly oqıǵa týraly Instagram áleýmettik jelisindegi jeke paraqshasynda aıtyp berdi, - dep habarlaıdy Qamshy.kz QazAqparatqa silteme jasap.
Sorbaonnanyń zamanaýı ádebıet fakúltetiniń stýdenti kúıeýimen Nıssada sol ýaqytta demalyp júrgen.
«22:00-de otshashý boldy. Biz de qala turǵyndary men qonaqtary sekildi otshashýdy tamashalaý úshin jaǵalaýǵa bardyq. Keıin keshki as ishý úshin qalanyń ortalyq bóligine bardyq. Sýshı alǵymyz kelgen dámhananyń jabyq ekenin kórip, 50 metr jerdegi basqa dámhanaǵa bet aldyq. Ekinshi dámhananyń da jabylyp jatqanyn kórip, Tıma ekeýmiz tamaq ishetin jer izdep turǵanda, «Qashyńdar!» degen daýys estildi. Bir top halyq, balalar, egde qarttar, aıqaılaǵan áıelder bári biz jaqqa qashyp kele jatyr. Tıma meniń qolymnan ustap, súıreı jóneldi. Aıqaı-shý údeı tústi, artyma qaraǵanda adamdardyń bir-birin ıterip, taptap kele jatqanyn kórdim. Adasyp qalǵan balalar ata-anasyn tappaı jylady, ata-analar óz balalaryn janushyra izdep jatyr. Adam aıtsa nanǵysyz oqıǵaǵa sengim kelmedi», - dep jazdy Altynaı óziniń Instagram paraqshasynda.
«Men «Múmkin emes. Bári qaljyń shyǵar» dep oıladym. Biraq qashý kerektigin uǵyp, terasadaǵy oryndyqtardy ıtere júgirdik. «Ol jaqqa barmańdar! Onda oq atyp jatyr!», dep aıqaılady qarsy aldymyzdan shyqqan qyz. Jurt osharyla qalyp, basqa jaqqa qasha jóneldi. Barlyq jaqtan birneshe tilde «Onda oq atylyp jatyr! Ol jaq qaýipti! Qashyńdar, men ony kórip turmyn! Tez qashyńdar!» degen sózderdi estidim. Ótpeli jolda bir áıel tura almaı qulap jatty, halyq ony taptap ótti. Men ózimniń yńǵaısyz aıaq kıimimdi sheship jalańaıaq júgirdim. «Marselde terakt boldy! Adamdardy óltirdi!» dedi bireý. Marseli nesi, ol myna jerden 300 shaqyrym qashyqtyqta emes pe? Atys osynda bolyp jatqan joq pa? Osy kezde Tıma aýlaǵa kiretin kishkentaı esik tapty. Biz qulpyly qaqpadan sekirip ótip, kóliktiń artyna tyǵyldyq».
«Eń qorqynyshtysy, kóshede halyq júgirip júr jáne ne bolyp jatqanynan esh habaryń joq. Kúni boıy tynbaıtyn polısıa dabylynyń úni estilmedi. Jaǵalaýda qarýly adamnyń júrgeni týraly alǵashqy aqparattar túse bastady. Sol mezette deıin ómirdi qanshalyqty súıetinimdi, qanshalyqty qorqyp otyrǵanymdy túsindim jáne «óńim be, túsim be?» dep sener-senbesimdi bilmedim. Ý-shý basylǵan soń, aýlaǵa kirgen ájeı jaǵdaıdyń turaqtalǵanyn aıtty. Biz óz úıimizge bet aldyq. Kóshede halyq bolǵan joq. Árbir artyq dybys, jel qozǵaǵan japyraq sybdyry bizge qaýip tóndirgendeı edi. Úıimizge 50 metr qalǵanda, aldymyzdan qarýly polısıa qyzmetkeri shyqty. Bizdiń aldymyzda kele jatqan eki jasóspirimge qarý kezenip, «Qozǵalma! Qolyńdy kóter! Telefonyńdy tasta!» dep aıqaılady. Biz óz úıimizdiń lańkestik epısentri bolǵanyn, búgin kire almaıtynymyzdy bildik. Ápkeme habarlasyp, qonyp shyǵýdy suradyq. Tań ata óz úıimizge keldik, aınalada qoqys shashylyp jatyr, joldar jabyq. Qazir óz úıimde otyrmyn jáne osynyń bári tús bolsa eken dep tileımin. Abaı bolyńyzdar!», - dep jazǵan otandasymyz bolǵan jaǵdaı týraly.
