Kezdesý barysynda ekijaqty birshama ózekti, halyqaralyq deńgeıdegi keıbir túıtkildi máseleler talqylandy. Qazaqstan Respýblıkasynyń Premer-mınıstri Kárim Másimov Baıan-Ólgıı aımaǵyndaǵy tabıǵı apattan zardap shekken otbasylarǵa 200 myń dollar kóleminde aqshalaı qarjy bólinetinin málimdedi.

Keshe ǵana Baıan Ólgıı qalasynda bolyp, astyna at minip qaıtqan Kárim Másimovtiń bar jomarttyǵy 200 myń dollardan aspaı qalǵany qalaı?

Búkil el bolyp, "Qazaqstan Mońǵolıadaǵy qandastarǵa qol ushyn sozatyn boldy" dep taqıamyzdy aspanǵa atqandaǵy kómegimizdiń túri osy-aq pa?

200 myń dollar degenińiz eki-úsh úı salýǵa ǵana jetetin qarjy. Jaraıdy, bes-alty úı salynsyn delik. Qalǵan qazaq qaıtpek? Dalada qalmaq pa?

Keshe búkil BAQ pen áleýmettik jeli Úkimet basshysyna oda aıtyp edi. Sol odanyń óteýine bola qomaqty kómek bolar dep oılaǵanbyz. Sóıtsek, Másimov myrza taǵy da aldap ketti. Ózine keremet jarnama jasap, áp-sátte ózgerip shyǵa keldi. 

"Qazaq úkimeti Mońǵolıadaǵy qazaqtarǵa 200 myń dollar berdi" dep aıtýdyń ózi uıat. Bul bizdiń eldegi orta deńgeıli bıznesmenniń qolynan keletin sharýa ǵoı. Bulaı kúlki bolǵansha, Másimov úkimeti baǵzy qalpymen úndemeı qalǵany jaqsy edi. 

Sháriphan Qaısar, Abai.kz