Zaısannan shalǵaıda jatqan Shilikti aýyldyq okrýgine bes eldi meken qaraıdy. Olar: Shilikti, Tasbastaý, Jalshı, Kákentaldy jáne Qarasaı aýyldary. 2 300 turǵynǵa eki orta, bir ortalaý, bir bastaýysh mektep, mádenıet úıi, poshta, dárigerlik emhana, tórt feldsherlik pýnkt, toǵyz dúken, eki naýbaıhana, shashtaraz, dárihana, mal soıý alańy qyzmet kórsetýde. Qazirgi ólshemmen alyp qarasaq, bul jaqsy kórsetkish, dep jazady Shyǵys Qazaqstan oblystyq "Dıdar" gazeti
- Elbasy Nursultan Nazarbaevtyń «Qazaqstan jańa jahandyq naqty ahýalda: ósim, reformalar, damý» atty Joldaýynda «jahandyq daǵdarys - bul tek qaýip emes, bul jańa múmkindikter» dep atap ótti. Demek, daǵdarystan úrikpeı, barlyq kúsh-jigerdi ortaq maqsatqa jumyldyra bilsek, bul qıyndyqtan ótemiz. Ótkendi saralap, aldaǵy atqarylar sharalardy belgilep, baǵdarly isterdi qolǵa alyp jatyrmyz, - dedi aýyldyq okrýg ákimi Qurmet Saǵıev.
Budan keıin aýyl ákimi ótken jyly iri qaranyń 12682, qoı-eshkiniń 31 myńnan asqanyn, jylqy 3054 basqa jetkenin tilge tıek etti. Munyń aldyndaǵy jylmen salystyrǵanda iri qara úsh myń, usaq mal alty jarym myń, al jylqy 624 basqa kóbeıgen. Mal basyn asyldandyrýda da tabys barshylyq. Ótken jyly 39 asyl tuqymdy iri qara satyp alyndy. Osynshama malǵa 6 mıllıon teńge sýbsıdıa berilipti. Eki sharýa qojalyǵy asyl tuqymdy 41 qoshqarǵa 328 myń teńge, 1230 analyq qoıǵa 1 mıllıon 845 myń teńge sýbsıdıa alypty. Al júnge 400 myń teńge sýbsıdıa alǵanyn estigenimizde, shynynda da aýyl adamdarynyń eńsesin kóterýge arnalǵan baǵdarlamalardyń jemisin bere bastaǵanyn ańǵardyq. «Jaılaý» baǵdarlamasy boıynsha qazirgi ýaqytta úsh otbasy 300 bas qoıdy aman saqtap ósirgen eken.
Bolat Turǵynov jetekshilik etetin «Nurtaza» sharýa qojalyǵy 250 iri qara, 150 jylqy, bir myńǵa tarta qoıdy ósirip otyr. «Nurdana» qojalyǵynyń ıesi Serik Fazylov iri qara ósirse, Seken Shajaevtyń «Almaz» qojalyǵy bir jarym myń qoıdy baǵyp, ondaǵan adamdy jumyspen qamtamasyz etýde.
Shilikti aýyldyq okrýginde «100 naqty qadam» Ult jospary baǵdarlamasy boıynsha memlekettik jáne óńirlik baǵdarlamalardy júzege asyrýǵa baılanysty ıgilikti ister atqarylýda. Máselen, Shilikti aýylynda eki kóshege jaryq tartylsa, Táýelsizdik kóshesine qum-tas tóselip, turǵyndar rızashylyǵyn bildirýde. Sebebi, buryn bul kóshe jaýyn-shashyn kezinde las bolyp, júrý qıynǵa túsetin. Jalshı aýylynyń shetinen mal óleksesin tastaıtyn qorym iske qosyldy. Shiliktige aǵyn sý ákelý maqsatynda Zaısan qorǵan seriktestigi aýylǵa sý arnasyn burdy. Aýyl mádenıeti men sportyn damytý baǵytynda josparly jumystar júrgizilýde. Uly Jeńistiń 70 jyldyǵy qarsańynda aýyl turǵyndary men kásipker azamattardyń demeýshiligimen 1 mıllıon 45 myń teńgege eskertkish taqta ashylyp, 270 adamnyń esimderi jazyldy. Naýryz, Jeńistiń 71 jyldyǵy, Balalardy qorǵaý kúni, Qazaq handyǵynyń 550 jyldyǵy, basqa da aıtýly merekelerge aýyl turǵyndary belsendilikpen qatysyp, sporttyq jarystardyń sánin keltirdi.
Aýyl ákimi «Týǵan jerge-taǵzym» aksıasynyń jyl saıyn ótip turatynyn aıtty. Atap aıtqanda, Qunapıanovtar áýleti Shilikti orta mektebiniń bir bólmesin zamanaýı jabdyqtap, bul maqsatqa 1 mıllıon 750 myń teńge qarjy jumsapty. Sol kabınetke aýdannyń órkendeýine ólsheýsiz úles qosqan, birneshe ordenniń ıegeri, marqum Qalym Qunapıanov aqsaqaldyń esimi berildi. Uly Otan soǵysynyń ardagerleri Súleımen Baımoldın, Qonaı Nurmuhanbetov aqsaqaldyń urpaqtary at báıgesin uıymdastyryp, marqumdarǵa as berip, jerlesterin rıza etip tastady. Jarys jeńimpazdaryna avtokólik, motosıkl, basqa da baǵaly syılyqtardy tapsyrdy. Tasbastaý aýylynyń týmalary Qaırat, Dálelbek Saǵdoldınder kindik qany tamǵan aýylyna 6 mıllıon teńge qarjy jumsap, ımandylyq úıin syıǵa tartty.
- Bıyl - uly mereke, el Táýelsizdigininń 25 jyldyǵy. Merekelik sharalardyń kestesin aldyn ala jasadyq. Barlyq aýyldarda mádenı sharalar ótedi, sport jarystaryna jurtshylyqty belsene qatystyrý oıda bar. Shilikti aýylyndaǵy Aıjaryq kóshesin jaryqtandyrý, Tasbastaý ortalaý mektebiniń sport zalyn, Shiliktidegi kósheni jóndeý, qatty qaldyqtar tastaıtyn oryndy iske qosý, basqa da jumystardy atqarsaq dep otyrmyz. Shilikti aýyldyq okrýginiń turǵyndary táýelsizdiktiń shırek ǵasyrlyq mereıtoıyn tolaıym tabystarmen qarsy almaq, - deıdi aýyl ákimi Qurmet Saǵıev.
Ońdasyn Elýbaı
SHQO Zaısan aýdany
