Osydan birneshe jyl buryn shet eldik bir kompanıada jumys istegenim bar. Qyzmetkerlerdiń barlyǵy, basshylarǵa deıin túgel musylmandar. Barlyǵy derlik namaz oqıdy. Ujymda Zarına degen qyz bar edi. Namazdan qalmaıdy. Biraq is-áreketi, bolmysy musylman qyzyna laıyq deýge kelmesteı. Zarına jumysqa sándi kıimmen keletin de sómkege salyp alǵan oramal, hıdjabyn tek namazǵa barǵanda kıetin. Sándi unatatyny sonshalyq, belin jyltyratyp, topıktiń nebir túrin ústinen tastamaıtyn. Keıde qyzmet ornynda elýden asqan erkekterdiń bar ekenin eskermesten shortymen keletinin qaıtersiz? Beli, baltyry ashyq-shashyq qyzǵa basshylyq úndemeıtin. Óıtkeni basshymyz keńpeıil adam edi.
Namaz ýaqyty taıaǵanda Zarına ústindegi lypasyn hıdjabqa aýystyratyn. Kúnine eki qubylatyn qyzǵa birdeńe deýdiń ózi qıyn edi. Óıtkeni ol eskertý jasap, ıa aqyl aıtqan áriptesti jas demeı, kári demeı, betinen alatyn. Tym jas deıtindeı emes, 25-ke kelgen. Kosmetıkanyń túr-túrin erkin qoldanatyn. Másele bunda da emes, onyń dindi qalaı túsinetininde bolsa kerek. Qysqasy, ony tańerteń kórgen adam tústen keıin kezdesse tanymaı qalatyn. Zarına túske deıin moıyn, bel, sanyn jaltyratyp júrse, tús aýa hıdjabty musylman bola qalady.
Birde shet eldik bastyq odan qalam surady. Zarınanyń bastyqtyń qalamyn onyń óz qolyna qaıtarýdyń ornyna anadaıdan betine laqtyryp jibermesi bar ma?! Bastyq tózimdi edi. «Nege úıtesiń?» degen joq. Onyń bul áreketinen keıin tipten jırenip kettik. Sóıtip, kerekti kezinde belin jalańashtap, fıgýrasyn kórsetip, qajet kezinde namazyn da qaza jibermeıtin Zarınadan áriptester túrpideı jıyrylatyn. Sóılegen adamnyń betinen ala túsetin dóreki qyz kimge jaqsyn? Ózi taǵy qandaı jigittermen dostasyp júrgenin de kópshilikten jasyrmaı áńgimeleıtinin qaıtersiz?
Zarınany jaqsy kórip, únemi qasynan tabylatyn Gúlfıa degen qyzmetker boldy. Ekeýiniń minezi uqsas. Elýdi eńsergen aǵaılar men apaılar til qatsa da eki qyz turpaıy jaýap qatady. Ózine qajet kezde ǵana sypaıy. Qyz uzatyp, kelin túsirip otyrǵan bir apaı birde álgi ekeýine musylman adamnyń ylǵı da ózgelerge úlgi bolarlyq jaqsy minezdi bolýy qajet ekendigin túsindire bastap edi, Gúlfıa «Sharýańyz qansha?» dep qaıtaryp tastady. "Sharýańyz qansha?" — Gúlfınyń eń jıi qoldanatyn tirkesi.
Bundaı minezdilermen bir ortada jumys isteýdiń ózi qıyn ǵoı. Birte-birte eki dolynyń minezine shydamaǵan áriptester shetinen ózge jumysqa aýysa bastady. Aqyrynda jańa kadrlar kelgende Zarına men Gúlfıa ǵana qalypty eski orynda.
Iá, namaz oqyp, hıdjab kıip, ózin musylmanbyn deıtin pendelerdiń arasynda dindi aıaq asty etip júrgenderi de bar eken...
Dana Qamshybek
