Almatyda ádildik izdep ashynǵan aqjaýlyqty ana, búgin erekshe qarsylyq aksıasyn ótkizdi. Qalanyń qaq ortasynda ústindegi kóılegin sheship tastaǵan keıýana, ózin mundaı qadamǵa barýyna ákimdik qyzmetkerlerin aıyptaıdy, - dep habarlaıdy Qamshy.kz 31-arnaǵa silteme jasap.
Tul denesine altyn alqasyn taǵyp, arasha suraǵan qorǵansyz ana. Egde tartqan aqjaýlyqty jannyń kókiregin qars aıyryp, kıimin sheship tastaıtyndaı ashýyna tıgen nárse – ol osyǵan deıin kórgen qıyndyqtar men ádiletsizdikter. Fatıma apa ınsýlt alyp úıde jatqan otaǵasy men otbasyn asyraý úshin myna jemis-jıdek satatyn dúńgirshekti ornatqan. Ákim-qaralar aı saıyn salyǵyn tólep turamyn dese de saýdaǵa ruqsat bermepti. Kúnimizdi kórý úshin jasap otyrǵan sońǵy úmitimizdiń de kúl talqany shyǵa ma dep kúıinip otyr keıýana.
FATIMA RAQYMBAEVA, Kóp balaly ana:
- Mılısıasy bar, ákimi bar ma, keldi búgin tańerteń. Men 40 jyl joldasymmen ómir súrgen bolsam, meniń tánimdi tek joldasym kórgen, jalańash tánimdi. Meniń kógiregimdi on balam emgen... Qazir osy jerde myńdaǵan halyq ótip jatyr...
20 jyl buryn Fatıma Raqymbaeva týǵan-týystarynyń qal degenine qaramaı, otbasymen Qazaqstanǵa oralǵan. Almatydaǵy eskileý úıin satyp, "Aqkent" yqshamaýdanynan bólip tóleý boıynsha túriktiń "Aıt-Haýzıng" kompanıasynan páter alady. Alaıda aılyq tólem aqysy qymbatqa túsip, birneshe jyl turyp kelgen úıdiń tólem grafıgin arzandatyp qaıta qurýǵa kelispegen túrkıalyq kompanıa sot arqyly bosatýdy talap etedi. Al qala ákimi Baýyrjan Baıbektiń atynan eshkim úıden shyǵarylmaıdy dep qansha ýáde berilse de, Fatıma apany baspanasynan qýyp shyqqan. Qazir páter jaǵalap júr.
FATIMA RAQYMBAEVA, Kóp balaly ana:
- Qazir bireýdiń úıine kirdim 150 myń teńge aıyna tólep. Men endi ne isteımin ári qaraı? Qalaı ómir súrem? Joldasym ınsýlt, túk sezbeıdi. Ózim saharnyı dıabet, oǵan qosylyp asqazanym aýyrdy. Endi ne isteımin men?
Turǵyndar kóp balaly ananyń jurttan qaıyr suramaı, adal eńbek etýine múmkindik berse deıdi.
QAMBAR BEISENBAEVA, Turǵyn:
- Onı hotát svoım chestnym trýdom zarabotat. Hot etı kopeıkı chtoby ım bylo na kýsok hleba, na chaı, nýn na odejdý.
Keıýananyń Almaty qalasyndaǵy memlekettik mekemelerden kóńili ábden qalǵan. Qanshasynyń tabaldyryǵyn tozdyrǵan. Etegi jasqa tolyp, kemseńdegen ana endi kimnen kómek suraryn bilmeıdi.
