Óskemende oralmandardyń kvotasyn ıemdenip, aqsha jymqyrǵan kúdiktiler anyqtaldy. Kóshi-qon basqarmasyna qalalyq prokýratýra ókilderi júrgizgen tekserýdiń nátıjesi osyndaı. Búgin olar oralmandarǵa turǵyn úı alý úshin beriletin biryńǵaı memlekettik tólemder basqa bireýlerdiń esepshottaryna aýdarylyp kelgeni týraly málimdedi. El aýmaǵyna ótpegen 17 otbasynyń atyna kvota resimdelgen. Osylaısha, kóshi-qon basqarmasynyń qyzmetkerleri qazynanyń 24 mıllıon teńgesine qol salǵan. Tergeý jumystaryna kedergi jasamaý maqsatynda, prokýrorlar kúdiktilerdiń kim jáne qansha ekenin qupıa ustap otyr.

 MERÝERT BULǴYNBAEVA, QALA PROKÝRORYNYŃ AǴA KÓMEKSHİSİ:

— Tergeý amaldary júrgizilip jatyr. Bir nemese eki adamnyń qatysy bar dep ázirge aıta almaımyz. Kóshi-qon basqarmasynyń zańdy tulǵasy men basqa kúdiktilerge qatysty is qozǵaldy.

Prokýratýra ókilderi bul qylmystyń 2010 jyly jasalǵanyn aıtady. Ol kezde kóshi-qon basqarmasy oblystyq ákimshilikke qaraǵan. Al, qazir İshki ister departamentiniń quzyryna ótken mekemede ol qujattarǵa jaýapty tulǵalar joq kórinedi. Polısıanyń baspasóz qyzmeti osyndaı ýáj aıtyp otyr. Máselen, qazir ústinen is qozǵalǵan azamatshalardyń biri qyzmetten osy ótpeli kezeńde ketip qalǵan.

 BAQYTJAN TORǴAEV, OBLYSTYQ İİD BASPASÓZ QYZMETİNİŃ BASTYǴY:

— Ol azamatsha atalmysh qurylym İshki ister departamentine engizilip jatqanda bala kútý demalysyna ketken bolatyn. Sodan keıin, óziniń jeke ótinishi boıynsha, ishki ister organdarynan bosatylady. Iaǵnı, ol resmı túrde bizde tirkelgenimen birde-bir kún jumys istemegen.

Óskemen qalalyq prokýratýrasy isti Qarjy polısıasyna tapsyrdy. Oralmandar kvotasyn ıemdengenderge qatysty asa iri kólemdegi alaıaqtyq faktisi boıynsha qylmystyq is qozǵaldy. Tekserilip, tergeýge alynǵandardyń ishinde burynǵy memlekettik qyzmetkerler de bar.

Óskemen

Qýanysh Ǵabdýllın

«7» telearna

Taqyryp ózgertildi