«Aýylym Alataýdyń irgesinde,

Syr jatyr aq kóılektiń búrmesinde...»

Osylaı óleńdetken óńsheń aqyn

Bas qostyq Qulja qala bir keshinde.

«Quljadaı qala bar ma jer betinde?!» –

degeniń janymyzdy terbetýde.

Tán-SHannyń asqaqtyǵyn Sizden kórdim,

Saıramnyń sýreti bar kelbetińde.

Tal boıyń kúmis symǵa tyrtylǵandaı,

Jan apa, kórkiń qandaı, narqyń qandaı!

Bozdady toqsandaǵy Mádı aqyn,

«Shirkin-aı, qyz qaıda, – dep,– Marfýǵamdaı!»

İleniń ótkel bermes aǵynysyń,

Quljanyń qolǵa túspes laǵylysyń.

Uly aqyn bolmasa da, uly qartym

Qozǵady qyryq jylǵy saǵynyshyn.

Ol qazaq – bul qazaqtyń bir butaǵy,

Qý taǵdyr aqpa qumdaı syrǵytady.

Jas jigit óleńińdi jatqa soqsa,

Aqyn shal sharap emes, ý jutady.

Tólisiń Úısintaýdyń aq qar basqan,

Kelesiz appaq arǵa daq salmastan.

Týǵan jer mahabbatyn kórip turdym,

Mádıdiń janarynan aqqan jastan...

Ǵalym Qalıbekuly,

aqyn, Halyqaralyq «Alash» ádebı syılyǵynyń ıegeri.