Almaty oblysynda mal saýdalap, artynsha máıiti tabylǵan aǵaıyndylardyń ólimine qatysy barlar ekeýden kóp,- dep habarlaıdy Qamshy.kz  KTK arnasyna silteme jasap.

Bul týraly sol qandy oqıǵa bolǵan Suranshy batyr aýylynyń turǵyndary aıtyp otyr. Aýylǵa 40 bas sıyr jáne kúdiktilermen qosaqtasyp kelgen bir top bóten jigitti kórgender de bar eken. Biraq polısıa ustaǵan eki adam men tapqan bir myltyǵynan árige barǵysy kelmeıtin syńaıly.

Uly úsh adam óltirdi dep aıyptalyp jatqan ana ulynyń mundaı qylmysqa barǵanyna senbeı otyr. Kórshileriniń kózine túspeýge tyrysyp, kúnde jylaýmen júr. Alty bala ósirgen zeınetker perzentiniń ózi pendege zıan keltirýi múmkin emes deıdi. Aıtýynsha, bireýler Murat Ońalbaevty qorqytqan.

"Meniń balamnyń densaýlyǵy joq. 3-shi toptaǵy múgedek. Basynda jaraqaty bar. Bir kózi joq. Óz janyn ózi zorǵa baǵyp júrgen jigit. Bir kisini uryp jyǵatyn kúshi joq. Endi ol jerden tiri shyǵa ma tegi, táńirim deseı?", - deıdi kúdiktiniń anasy Murat Ońalbaevtyń anasy Kúlán Ońalbaeva.

Jarqynbek, Qadilbek, Muqıat esimdi úsh aǵaıyndy mal bazarynan shyqqan boıda ekinshi kúdikti Talǵat Súleımenovtiń úıine kirgen. Úı ıesiniń 20 bas qoıy, jylqysy bar eken. Taǵy mal alýǵa bankten sol kúni 3 mıllıon teńge nesıe rásimdepti. Al marqum aǵaıyndylar munda 6 mıllıon alamyz dep kelgen. Biraq kúdiktide qalǵan aqsha boldy ma, álde saýdagerlerdi aldap ákelgen be, bul túıin áli sheshilmegen kúıde qaldy.

Marqum 3 jigit kelgende kúdiktiniń otbasy tórt kózi túgel úıinde otyrǵan. Biraq eshbiri de oqıǵa týraly tis jarmaı otyr. Dese de, sol kúni aýylǵa sıyrmen birge erip kelgen bir top bóten adamdy kórgender kóp.

Suranshy batyr aýylynyń turǵyny Shámen Qyrǵyzbaevtyń aıtýynsha, 4-5 jigit bolǵan. Olardyń barlyǵy aýyl adamdary emes, bóten kisiler eken. Olar maldardy jarty saǵat boıy túsirip, manaǵy úıdegi jigittermen áńgimelesken eken.

Bas sıyrdyń teń jartysyn úılerinde qaldyrsa, al qalǵan jartysyn júk kólikterine tıep kúdiktiler mine osy jolmen taýǵa qaraı áketipti. Al taýǵa kireberis jerde shekara zastavasy tur. Marqumdardyń týystarynyń aıtýynsha, qazaq-qyrǵyz arasyn kúzetkenderdiń tún ortasynda olardy kórmeýi múmkin emes. Sol sebepti, osy qandy qylmysqa qatysy bar ózge de sybaılastardy izdep tabýǵa shekarashylar da kómektesse dep otyr.

Qandyqol urylar aram oıyn osy taýdyń ishinde iske asyrǵan. Ázirge eki adam qamaýda otyr. Al polısıanyń bir myltyqtan basqa dáıegi de joq syńaıly. Tergeýdiń bastalǵanyna úsh aptadaı ýaqyt bolsa da, saraptama nátıjesin áli kútip júrmiz degen jaýap qana aıtyp otyr.