Asa aýqatty otbasynda bala kútimimen, úı sharýasymen jáne otaǵasynyń qart áke-sheshesin baǵyp-qaǵýmen bes jyl aınalysqan A. esimdi qyz kórgenderimen bólisti, - dep habarlaıdy Qamshy.kz.
«Men qyzmet istegen baıdyń áıeli aýyldasym bolǵandyqtan oǵan ápke retinde qaradym. Biraq sol «ápkem» bes jyl ishinde maǵan eshqandaı aqy tólemeı, tegin qyzmet jasatty. Ózi apta saıyn shet eldiń kýrortttarynda demalady. Qymbat avtokólikti aı saıyn aýystyrady desem, múmkin senbeıtin bolarsyz. Biraq bul búkpesiz shynym, jezdemniń qart áke-sheshesi aýrý, solardy kútemin. Balalardyń kir-qońy, tamaǵy bári meniń moınymda. Aýyldan shyqqan jaqynym ǵoı dep, zyr júgirip qyzmet ettim. Bes jyl ishinde «Ata-anańa baryp kelshi» dep, eń bolmasa 500 teńge bergen emes.
Bul otbasynyń sarańdyǵyn sózben sýrettep taýysý múmkin emes. Úılerine eshkimdi jolatpaıdy. Bir úıde bir-eki jyl ǵana turady. İri qalalardan qymbat páterler alyp, únemi kóship-qonyp júredi. Men ishken tamaǵym bolmasa bul úıden eshqandaı paıda kórmedim.
Jezdem óte dóreki, bárin balaǵattap sóıleıdi. Kóbinese shet elde júredi. Úıge kelgende bárimizdi balaǵattap, jerden alyp jerge salady. Úıdegi eki balasynyń bar sharýasy meniń moınymda. Daıyn tamaqty kútip otyrady. Kisiligi joq. Birde erli-zaıypty ekeýi bir jumystarmen syrtqa ketken. Maǵan bazardan azyq-túlik ákep qoı dep tapsyrdy. Jasy jıyrmaǵa kelgen ulyna «mashınamen bazarǵa baryp keleıik» dep edim, moıny jar bermedi. Ózim barýyma týra keldi. Zildeı júkti belimdi maıystyryp kóterip jaıaý keldim. Zińgitteı jigit bop qalǵan balasynyń tipten jany ashyǵan joq.
Ápkem dúkenge, bazarǵa jibergende chek talap etedi. Mindetti túrde tıyn-tıynyna deıin eseptep alady. Avtobýs, taksıge qansha jumsaǵanyma deıin tergep turyp suraıdy. Al ózi qara basy úshin myńdaǵan dollardy aıamaı jumsaıdy. Balalarynyń týǵan kúnin de tek ózderi otyryp jasaıdy. Eshkimdi shaqyrmaıdy.
Birde aýyldaǵy ata-anamdy saǵynyp, baryp qaıtýǵa ruqsat suradym. Onyń ústine sol kúni basym aýyryp, qınaldym. Ápkem 100 teńge de bergen joq. Kók tıynsyz kóshege qalaı shyǵamyn. Aýylǵa barmaǵan kúıi qala berdim.
Ózińdi adam qurly kórmeıtin úıge nege qyzmet etesiń deısiz ǵoı? Jezdemiz bedeldi adam, eń bolmasa qaladaǵy bir kolejge bolsa da oqyta ma dep úmittenip jiberip edi, ata-anam. Ápkem arqyly kolejde oqyǵym keletinin bildirip edim, burqan-talqan ashýlandy.
Bul otbasynyń adamdary ózderinen basqa tiri jan joqtaı ómir keshedi. Jezdemiz qalasa ishkıimmen otyra beredi dastarhan basynda. Basqalardan uıat-aý degendi bilmeıdi. Ózderine qajet degen bastyqty ǵana qonaqqa shaqyrady. Ondaı dókeılerdiń aldynda qurdaı jorǵalaıdy.
Bes jyl boıy bireýdiń otymen kirip, kúlimen shyǵý ońaı ma, densaýlyǵym syr berdi. Sodan ózim jeke qalǵanda bala baǵýshy izdegen jarnamalardy qarap otyryp, bir jasar sábıi bar jalǵyzbasty áıeldi taptym. Bes jyl buryn aýyldan kıip kelgen jalǵyz paltomdy, usaq-túıek kıimderimdi alyp, jańa tanysqan áıeldiń úıine ketip qaldym.
Bul áıel meniń aýyldasym sıaqty asa baı bolmasa da adamgershiligi bar. Aı saıyn aqy tóleıdi. Balasy da mazasyz emes. Qazir kolejge túsý úshin aqsha jınap júrmin. Iá, eshkimniń kúnin eshkimge qaratpasyn» dep sózin aıaqtady A.
Jazyp alǵan: Aıǵanym Birtýar
