Almatynyń ortalyq aýdandarynyń birinde 27 jasar Arsen (aty-jóni keıipkerdiń qaýipsizdigi úshin tolyq atalmaıdy) esimdi jigit turady. Páter jaldap turǵanyna úsh jyl boldy. Úsh jyl buryn áıeli ony eki balasymen tastap, basqa bireýmen ketip qalǵan.
Arsen 4 jasar Janel men 3 jasar Dıanany baǵý úshin jumys istep júr. "Eki qyzymdy asyraý úshin isteımin jumysty. Áıtpese maǵan áıel de basqasy da kerek emes. Jalpy áıel ataýlydan túńildim" deıdi ol.
Arsenniń aıtýynsha áıeli ekinshi balasyn týa sala tastap ketken. Ekeýi nekede bolǵan kezinde-aq basqa jigittermen júrgen áıeliniń áreketine narazylyq bildirgen Arsen qaıyn jurtyna jaqpaıdy. Áıeliniń týystary ony "qyzymyzdy qorlady" dep jamandaıdy. Al áıeliniń esil-derti Arsennen tezirek qutylyp, anaǵurlym qaltaly jigitterge ketý bolatyn.
Áıeli Dıanany bosanǵannan keıin kóp uzamaı kıim-keshegin alyp ketip qalady. Arsen onyń artynan izdep baryp, balalar úshin keıin qaıtýyn ótinedi. "Men oǵan birneshe ret baryp, úıge qaıt dep jalyndym. Biraq ol jańa baqytyn tapqanyn aıtyp, meni de, balalaryn da kórgisi kelmeıtinin bildirdi. Men erkektik namysymdy taptap, kishireıip bardym ǵoı oǵan. Áıelim miz baqpady. "Kózdegeni aqsha, materıaldyq baılyq eken, qala bersin" dep aqyl aıtty dostarym. Dostarymnyń sózine qulaq asyp, eki balany jetimhanaǵa ótkizbeı tolyqqandy asyraýǵa kóshtim. Úsh jyldan beri ol balalaryn kórýge kelmedi de. Netken qatygez áıel edi?!
Bolashaqty balalarymdy jaqsy mektepte oqytyp, tárbıeli azamatsha etip ósirgim keledi. Qarajatymnyń teń jartysyna jýyǵy páteraqyǵa ketedi. Balalarym esh tarshylyq kórmesin dep ekinshi jumysqa ornalastym".
"Kishkentaı balany jalǵyz baǵý erkek úshin qıyn ba?" degen suraǵymyzǵa Arsen bylaı dep jaýap berdi:
— Qınalǵanymdy aınalama kórsetkim kelmeıdi. Biraq meniń áriptesterim, jaqyn dostarym basymnan ótken jaǵdaıdy túsinip, maǵan qolushyn berýde. Áriptes qyz-kelinshekter apta saıyn kelip, páterdi jýyp-shaıyp, balalarǵa neshe túrli tamaq pisirip beredi. Balarymnyń da kıim-keshegin dostarym jýady. Solardyń arqasynda áıelimniń joqtyǵy baıqalmaıdy da. Biraq tańerteń balalardy turǵyzyp, baqshaǵa aparý ońaı bolmaı tur. Ásirese Dıana jylap, balalar baqshasyna barǵysy kelmeıtinin aıtady. Úlkenim es bilip qaldy desem bolady. Bolashaqta maǵan qolǵanat bolatyn solar dep bilemin.
Ázirlegen Aıǵanym Birtýar
