Almaty oblysy Uzynaǵash kentiniń mańynda óltirilgen úsh azamattyń isi boıynsha sot bastaldy, - dep habarlaıdy Qamshy.kz.
Búgin sottyń aldyn ala sot májilisi ótti. Onda sot tergeýin bastaý jóninde aıyptaýshy, aıyptalýshy taraptardyń, qorǵaýshylardyń pikirleri tyńdaldy. Alǵashqy sot otyrysy 17 qarasha kúni ótetin bolyp belgilendi.
«Sol otyrysta kýálardan, aıyptalýshylardan jaýap alyna bastaıdy. Sondaı-aq, búgingi otyrysta prokýror aıyptaý aktisin oqyp, kúdiktilerdiń ómir derekterin naqtylady», - deıdi jábirlenýshi taraptyń qorǵaýshysy Muhtarıma Karbanova.
Aıýandyqpen óltirilgen úsh azamattyń týystary bolsa, sotqa deıingi tergeý amaldaryna kóńilimiz tolmaıdy dep otyr.
«Búgingi otyrysta úsh kúdiktini de kórdik. Olardyń bireýi qylmysty kóre tura, zań oryndaryna málimdemegeni úshin aıyptalyp otyr. Ol qolhatpen bostandyqta júr. Tergeý kezinde qamaýǵa alynbaǵan. Qylmys jasalǵan qarý J. Súleımenov degen kisiniki eken. Ol boıynsha bólek sot bolady deıdi. Maldy kúdiktilerden D. Súleımenov degen týysy satyp alǵan. Bul jerde de basy ashylmaǵan jaıttar kóp», - deıdi qaza tapqan úsh jigittiń týysy Erkin Beısekeıuly.
Marqumdardyń týysy Tursyn Ámirbaıuly da qylmysqa qatysty kúdik kóp ekenin aıtady.
«Baýyrlarymyzdy atyp óltirgen qarý, ol kimniń qarýy, qylmys jasalǵannan soń qaıda jasyryldy, kim jasyrdy, nege der kezinde polısıaǵa habar berilmedi, úsh azamatty izdestirý sharalary nege baıaý júrdi, polısıanyń marqumdardyń týystary men dostary shýlaǵannan keıin baryp qana qozǵalǵany, dereý eki kúdiktini ustap alǵany qalaı degen sıaqty suraqtar kóp. Tergeý barysynda bul suraqtarǵa jaýap ala almadyq. Endigi úmitimiz sotta. Sýdıa ádildik jasap, isti zertteıdi, kem-ketik jerlerin aıtyp, qylmyskerlerdiń ádil jazasyn beredi dep senemiz», - deıdi ol.
Qaza bolǵan úsh jigittiń biri Muqıat Zarlyhanulynyń aǵasy Adal Zarlyhan osy qylmysqa qatysy bar degen úshinshi kúdikti Baqyt esimdi azamattyń buryn da sottalǵanyn estigenin, ázirge ony qamaýǵa almaı, qolhatpen bostandyqqa jibergenine narazy.
Esterińizge salsaq, qyrkúıek aıynda Almaty oblysy Jambyl aýdanyna oblystyń Kóksý aýdanynan mal satýǵa kelgen úsh azamat – Muqıat Zarlyhanuly, Qadylbek Álimhanuly men Jarqynbek Doldanuly habarsyz ketip, artynan úsheýiniń de aıýandyqpen óltirilgeni habarlanǵan bolatyn. Bastapqyda osy qylmysqa qatysy bar degen kúdikpen eki azamat qamaýǵa alynsa, keıin Jambyl aýdanynyń taǵy bir turǵynyna qylmys týraly bile tura tıisti organdarǵa habarlamady degen aıyp taǵylǵan bolatyn.
Erlan Tóleýbaı
