Almaty oblysynda toptasyp qyz zorlaǵan 4 jigittiń isi qaıta tergeletin boldy, - dep habarlaıdy Qamshy.kz KTK arnasyna silteme jasap.
Úkim shyǵarý úshin keńesý bólmesine ketip, 5 kún oılanǵan sýdıanyń sheshimi osyndaı. Endi onsyz da saǵyzsha sozylǵan sot otyrysy qaıta jalǵasady. Iaǵnı sýdıa san márte suralǵan sarapshylardyń pikirin taǵy bir tyńdap kórýdi jón sanapty. Al buǵan deıingi otyrysta prokýror tórt aıyptalýshynyń árqaısysyna 11 jyldan suraǵan bolatyn.
Esik qalasyndaǵy aýdandyq sot ǵımaratynda qas qaraısa da qyzý jumys qaınap jatyr. Óıtkeni toptasyp qyz zorlaǵan tórt jigitke úkim oqylady degendi estip, qos taraptyń ta týystary taıly-tuıaǵy qalmaı jınalǵan. Alaıda keshki saǵat 5-te bastalýy tıis sot otyrysy talaıdyń júıkesin tozdyrdy. Óıtkeni úsh saǵat boıy tar bólmege tyǵylǵandar sýdıany kútip ábden dińkelegen. Sot ta kele sala eshkim kútpegen sheshim shyǵaryp, jınalǵandardy tań qaldyrdy.
Erlan Baımoldınov, sýdıa:
-Sot zertteý jasaǵan sarapshylardan qaıta jaýap alý úshin sot tergeýin jalǵastyrý týraly uıǵarym jasady. Kelesi otyrys 18-shi qarashaǵa belgilensin.
Jábirlenýshi Jibek Mýsınova da búgin sotqa sońǵy núkte qoıylyp, ózin qorlaǵandar ádil jazasyn alady dep oılaǵan. Endi tergeýdiń jalǵasatynyn estip, kóńili kúpti bolyp tur.
Jibek Mýsınova, jábirlenýshi:
-Aıtarǵa sózim joq. Búgin úkim shyǵady dep oılaǵam. Biraq bolmady. Ne úshin bulaı bolǵany túsiniksiz.
Mundaı sheshimdi jábirlenýshiniń advokaty da túsinbeı otyr. Aıman Omarova tipti, sotqa bireýler qysym jasaýy da múmkin ekenin jasyrmaıdy.
Aıman Omarova, Jibek Mýsınovanyń advokaty:
-Bizdiń oıymyzsha, qysym jasalyp jatyr. Nege deseńiz sot úkim shyǵarýǵa ketken kezde kóbinese úkimmen kelýi kerek. Ne aqtaý, ne sottaý...
Jibek Mýsınovanyń zorlanǵanyn anasy áleýmettik jelide jaıyp salǵan edi. Qylmys aýdandyq İshki ister bóliminiń aldynda bolǵan. Iekteriniń astynda bolǵan jáıtten beıhabar saqshylardyń tórteýi jumystan qýyldy. Qyz zorlady degen kúdiktiler de kópke uzamaı ustalǵan bolatyn. Prokýrorlar qazir qamaýda otyrǵan Almas pen Erbol Ermekovtar, Asqat Bektursyn jáne Nurbol Eltaıdy 11 jylǵa sottaýdy surap otyr.
