Men, Meıirlan Shakeev, Almaty qalasynda turamyn. Naýryzbaı aýdanynyń aýmaǵynda ornalasqan jeke massıvte turamyn. Biraz ýaqyt buryn qudaı qosqan kórshim A. Sadıhovamen jer ýchaskesine baılanysty keliseýshilik bolyp, ol daý sotta qaraldy. Sot tıisti sheshim shyǵaryp, tek eki úıge ǵana qatysty emes, birneshe otbasynyń múddesi toǵysqan jer ýchaskesine qatysty sheshim shyǵardy. Alaıda, is onymen bitpedi. Osydan keıin kórshiler arasynda jekkórýshilik, baqtalastyq bastaldy. Oǵan kórshim A. Sadıhovanyń uly, sol kezde polısıada qyzmet istegen E.Mırzaevtyń áreketteri sebep boldy jáne daýdy odan ári órshitip jiberdi. Bizdi negizsiz aıyptap, balalarymnyń kózinshe balaǵattap, tipti, úıimniń qaqpasyna kólikterin tirep qoıyp, úıge kirip-shyǵýymyzǵa bóget jasaǵan kezderi de boldy.
Men óz aýlama qaýipsizdik úshin beınekamera ornattym. Osy áreketimdi kórshim A. Sadıhova zańǵa qaıshy, jeke ómirime qol suǵýshylyq dep taýyp, Almaty qalasy Naýryzbaı aýdandyq prokýratýrasyna shaǵym túsirdi. Prokýratýra QR Qylmystyq is júrgizý kodeksi talaptaryn óreskel buzyp, aryzdy sotqa joldaýdyń ornyna sotqa deıinshi tergeýdiń birińǵaı reestrine tirkeý jáne tergeý úshin Naýryzbaı aýdandyq İİB-ge jibergen. Bul jerde aryzdanýshy A. Sadıhovanyń uly sol ýaqytta sol aýdandyq İİB-de jedel ýákil bolyp qyzmet atqarǵanynan-aq biraz jaıdy ańǵarýǵa bolady. Aryz qabyldaý, qylmystyq is júrgizý tártibiniń jeke múddelilik, bálkim kelisimmen buzylýyn Almaty qalasy Naýryzbaı aýdanynyń prokýrorynyń orynbasary A.Sabýrovtyń zańǵa qaıshy qylyq jasap Naýryzbaı aýdandyq İİB anyqtaýshysy M. Jumajanovanyń isti qysqartý týraly shyǵarǵan qaýlysyn birneshe ret joıyp, tergeýdi qaıta jalǵastyrýdy talap etýinen de baıqaýǵa bolady.
Budan basqa, Freıd paıymy boıynsha túsinikke jol bere otyryp, prokýror orynbasary – A.Sabýrov Sadıhovanyń aryzyna qol qoıa otyryp aryzdyń joǵarǵy jaǵyna – «Aryz berýshi qyzmetker bolyp tabylady» - dep oryndaýshylarǵa aryzdanýshynyń artyqshylyǵyn dóp basyp jazyp bergen. Alaıda, Sadıhovanyń ózi polısıa qyzmetkeri emes , uly E. Mırzaev polısıa qyzmetkeri ekenin meńzegen. Sonyń saldarynan tergeý 6 aıdan astam ýaqyt júrgizilip, meniń Konstıtýsıalyq quqyqtarym dóreki buzylǵan, birneshe ret jaýap alýǵa shaqyryldym, «eshqaıda ketpeý» bultartpaý sharasyn qoldanyp, júris-turysyma shekteý qoıyady. Bul rette mundaı aryzdar boıynsha isti qaraý Qazaqstan zańnamasyna baılanysty tek sottyń quzyretinde bolsa da, aýdandyq prokýratýranyń aralasýymen zańsyz tergeý amaldary júrgizilgen.
Osyndaı qysymǵa qaramastan, prokýror Sabýrovtyń zań buzýshylyǵynan týyndaǵan tergeý barysynda meniń qandaı da bir kinám dáleldenbegendikten anyqtaýshy M. Jumajanova amalsyz isti qaıtadan qysqartyp, azamatsha Sadıhovaǵa atalǵan shaǵymmen jekeshe tártipte sotqa júginý kerektigin 6 aıdan soń bir-aq túsindirdirgen.
Ary qaraı azamatsha Sadıhovanyń aryzy boıynsha meni qýdalaý Almaty qalasy Naýryzbaı aýdandyq sotynda jalǵasyn tapty. Alaıda, sot ta aǵymdaǵy jyldyń 25 mamyrynda meni aqtap úkim shyǵardy.
Qazirgi ýaqytta anasy aryz jazyp, meni qýdalaǵan E. Mırzaev ishki ister organdarynan qyzmettik tártipti qatań buzǵany úshin tártiptik komısıa sheshimimen qyzmetinen qýylǵan.
Alaıda, osy iske qatysty Almaty qalalyq prokýratýrasyna Naýryzbaı aýdandyq prokýrorynyń orynbasary Sabýrovtyń jáne Naýryzbaı İİB polısıa qyzmetkerleriniń joǵaryda aıtylǵan ýájder boıynsha negizsiz qýdalaýyna qatysty birneshe ret jazǵan aryzdarym óz nátıjelerin bermedi.
Sonymen katar, osy jyldyń 9 tamyzynda Almaty qalasy prokýrorynyń orynbasary J.Baqashbaevtiń, 9 qyrkúıekte Naýryzbaı aýdanynynyń prokýrory N.Rakıshevtiń maǵan ishki ister qyzmetkerlerine qatysty tártiptik óndiristiń qozǵalǵany jóninde qaýly shyǵaryldy degen jaýaptary qózboıaýshylyq úshin berilgen jalǵan jaýap bolyp shyqty. Atalǵan tártiptik óndiris jaıly derek berýin suraǵan saýalyma Naýryzbaı aýdanynyń İİB basshysynan onyń basqarýyndaǵy tulǵalarǵa qatysty eshqandaı da tártiptik óndiristiń qozǵalmaǵany jóninde jazbasha jaýap aldym. Osylaısha zańdylyqty qadaǵalaýshy organnyń laýazymdy qyzmetkeri áldebireýdiń jeke qyzmetshisine aınalandaı qylyq tanytty.
Óz basym bul jerde, qylmystyq qýdalaý organynń is-árketterin toqtatýdyń ornyna ózi qyzmettik ókilettiligin asyra paıdalanyp, maǵan qatysty zańsyz qýdalaýdy uıymdastyrǵan qadaǵalaý organynyń qyzmetkeri – aýdandyq prokýrordyń orynbasary Sabýrovtyń kinási dep oılaımyn, óıtkeni ol atalǵan sanattaǵy ister jeke aıyptaý boıynsha (QR QPK 32-baby) qozǵalyp, tek sotta ǵana qaralatynyn bile tura osyndaı zań buzýshylyqqa ashyq barǵan.
Osyǵan baılanysty QR Bas prokýratýrasyna júginýge májbúr boldym. Bul jerde Qylmystyq qýdalaý organynyń qyzmetkerleriniń jáne Naýryzbaı aýdany prokýrory orynbasarynyń meni zańsyz qýdalaý kezinde jeke múddelilik tanytqany anyq (ol jemqorlyq saldarynan týyndaýy da múmkin). Osyǵan baılanysty Sabýrovqa jáne basqalarǵa qandaı jaza taǵaıyndalady jáne onyń ádil bolýyn tek Bas prokýror sheshetine kúmánim joq. Olaı deıtinimiz buǵan deıinde J. Asanov myrza Qaraǵandy oblysynyń qyzmette jaýapsyzdyq tanytqan birneshe prokýroryn qyzmetten bosatqan bolatyn. Sondyqtan, atalǵan másele boıynsha, salmaqty da negizdi SÓZDİ tek QR Bas prokýratýrasy ǵana aıtady dep senemin.
Meıirlan Shakeev
