Aldaǵy ýaqyttarda Qazaqstan eksportqa shyǵaratyn kóptegen mal sharýashylyǵy ónimderiniń túrlerin damyta bereri sózsiz. Sonyń biri – eshki ónimderi.

«Esiń ketse, eshki jı» degendi qazaq ejelden aıtyp keledi. Eshki túligin ósirý el ekonomıkasyn kóterýge edáýir úles qosady. Máselen, eshki maly baıaǵydan qazaq turmysynda erekshe baǵalanǵan. Ony kóp jaǵdaıda túlikti kóbeıtý maqsatynda ósiredi. Sebebi, eshki – óte ósimtal janýar. Bul jóninde «Ońtústik Qazaqstan» gazetinde jarıalanyp kele jatqan serıaly maqalalardy qadaǵalap oqyp kelemiz. Qazaqpyz degenmen, eshkiniń biz bilmeıtin erekshelikteri mol eken.

Qalaı degende de mal sharýashylyǵy damyǵan oblysymyzda eshki fermalary uıymdastyrylǵany jón. Bul úshin osy salany damytýǵa baılanysty birqatar jeńildikter qarastyrylǵany durys dep sanaımyz. Memlekettik baǵdarlama boıynsha beriletin jeńildikter men sýbsıdıa alýda ońaılatatyn jol izdestirgen abzal bolar edi. Osy oraıda bıznes ókilderi men kásipkerlerdiń qulaqtaryna altyn syrǵa, olar osy salany damytýǵa qol ushtaryn berse degen de oı bar. Aınalyp kelgende olar muny ózderi úshin de jasaıdy. Sábıi úshin mańyzdy ári qaýipsiz sút olar úshin de kerek emes pe?

Sodan keıin bir aıtarymyz, barlyq dúkenderden demeı-aq qoıalyq, tańdaýlylarynan nemese tutynýshylar kóp baratyndarynan eshki sútine arnalǵan arnaıy burysh ashylsa. Sonda ony turǵyndar basqa jerlerden izdep áýre bolmaı-aq, belgili jerlerden ońaı taýyp alar edi.

Bılik ókilderi de bul sharýadan tys qala almas degen oıdamyz. Oblystyq aýyl sharýashylyǵy basqarmasynyń, kásipkerlikti qoldaý ortalyǵynyń, «Maksımým» aımaqtyq ınovasıalyq ortalyǵynyń qyzmetkerleri bul salany jan-jaqty zerttep, tıisti usynystar aıtsa, nur ústine nur bolar edi. Óńirimizde óristi jerler óte kóp. Solardy tıimdi paıdalana bilsek, eshki túliginiń paıdasyn kóretin kún de alys emes. Endeshe, óńirimizdiń ózgeshelikterin eskere otyryp, qolǵa alar endigi bir sharýa – eshki fermalaryn uıymdastyrý dep bilemiz.

Jandar KERIMULY, «Ońtústik Qazaqstan» gazeti