Shardara aýdanyndaǵy Aqsheńgeldi aýyldyq okrýginde el Táýelsizdiginiń 25 jyldyǵyna arnalǵan aıtýly is-shara ótti. «Baq qonǵan, qut daryǵan aýylym» taqyrybymen ótken merekelik sharaǵa qatysqan turǵyndar aýyl sharýashylyǵy ónimderiniń kórmesin tamashalady. Oǵan «Aq altyn», «Egizqum» jalpy orta mektepteri men «Dınara» jáne «Qarlyǵash» balabaqsha ujymdary daıyndaǵan túrli buıymdar qoıyldy.
Merekelik is-shara aýyl jastarynyń fleshmobymen bastaldy. Is-sharaǵa arnaıy qatysqan aýdan ákimi Arman Abdýllaev aýyl turǵyndaryn Táýelsizdiktiń 25 jyldyq merekesimen quttyqtady.
Aqsheńgeldi aýylynyń turǵyndary malshylyqpen de, dıqanshylyq pen de aınalysady. Mundaǵy dıqandar ónimniń barlyq túrin egedi dese de bolady. Berekeli aýyldyń molshylyǵy kórmeden de kórinis tapty. Sharýa qojalyqtary Táýelsizdiktiń 25 jyldyǵyna aýyl sharýashylyǵy ónimderiniń 25 túrin shyǵaryp, kórmege usyndy. Intensıvti baq retinde otyrǵyzǵan almasy men bekesin ákelgen «Rahym» sharýa qojalyǵynyń tóraıymy Amankúl Naımanbaı «5 gektar alqapqa jemis aǵashtaryn otyrǵyzǵan edik, endi ónimin alyp jatyrmyz. Almany jaz boıy aýyl arasyna qoljetimdi baǵamen ótkizdik. Alma kóshetteri áli jas, aldaǵy ýaqytta ónim kólemi arta túsedi dep otyrmyz. Ónimdi ótkizýde eshqandaı problema joq, halyq dámdi almany jaqsy alyp jatyr» deıdi.
Kórmege «Altynbek» qojalyǵynyń almasy, «Tájihan» sharýashylyǵynyń qyryqpa qaýyny, «Salyqbaı» sharýashylyǵy óndirgen júzim, jerjańǵaq, «Oral» sharýashylyǵynyń qara qarbyzy, «Beıbit» sharýashylyǵynyń baqsha ónimderi, «Jandos» sharýa qojalyǵynyń kókónisteri, «Shapaǵat» sharýashylyǵynyń bıdaıy men júgerisi qoıylǵan. Sonymen birge, «Aqilgek» qojalyǵy daıyndaǵan qymyrannan da kópshilik aýyz tıdi. Aýyl turǵyndarynyń qolynan shyqqan qurt pen sary maı, qymyz ben qaımaq kórmeniń sánin asha tústi.
Mádenıet saraıynda aýyldyń áleýmettik-ekonomıkalyq damýyna atsalysyp júrgen memlekettik qyzmetshiler men qoǵamdyq jumystardyń ortasynda júrgen aýyl bılerine, kásipker azamattarǵa, úzdik muǵalimder men dárigerlerge aýdan ákiminiń marapattary tabys etildi. Sondaı-aq, Aqsheńgeldiniń ákimi Ordabaı Sahov on nomınasıa boıynsha eń úzdik degen qyzmetshiler men aýyl eńbekkerlerine syı-sıapat tapsyrdy.
Aýdan ákimi Arman Abdýllaev pen aýyl ákimi Ordabaı Sahov biraz jyldan beri tósek tartyp jatqan Myrzahmet Qasymovtyń shańyraǵyna at basyn burdy. Táýelsizdik alǵan alǵashqy qıyn kezderde aýyl ákimi bolyp 7 jyl qyzmet atqarǵan el aǵasynyń kóńilin surap, áńgime-dúken qurdy. Táýelsizdiktiń 25 jyldyq merekesimen jáne qarttar kúnimen quttyqtap, azyq-túlik sebetin tabys etti.+
Munan keıin aýdan basshysy men aýyl aqsaqaldarynyń qatysýymen «dóńgelek ústel» májilisi ótti. Jıyn barysynda aýyldyń tynys-tirshiligi, bereke-birligi jóninde keleli áńgimeler aıtylyp, azamattar oı-pikirlerimen bólisti.
Ádil ÁBDIRAMANOV. Shardara aýdany.
