Ár pendeniń basynda ártúrli arman bar. Bireýdiń baı bolǵysy, tórt túligi saı bolǵysy keledi. Al bireýler ǵylym-bilim qýyp adamzatqa , qoǵamǵa úles qosqysy keledi. Dál osyndaı izgi armany men muraty ózin shetel asyp oqýǵa jetelegen qarapaıym qazaq qyzyna Lıtva elinde kezdestik.
Osy jyldyń 6-qarasha kúni Abaı atyndaǵy qazaq ulyttyq ýnıversıtetiniń magıstranttary salaýatymyzben «shetelde bilim asyrý» baǵdarlamasy boıynsha Lıtva eline qadam tastadyq. Maqsatymyz sondaǵy memlekettik oqý-aǵartý ýnıversıtetiniń profesorlarynan leksıa tyńdap, tájirıbe almastyryp,oı órisimizdi keńeıtý. Biz qonaqjaıǵa tústenip jatqanda Lıtva eliniń Astanasy Vılnús qalasynda bilim alyp jatqan qazaq qyzy ata mekeninen jerlesteri kelgenin estip, bizdi izdep keldi. Atalǵan jerlesimizdiń aty-jóni Merýert Súleımenova.
Merýert Súleımenova 1994 jyldyń týmasy. 2015 jyly Almatydaǵy abaı atyndaǵy qazaq ulyttyq pedagogıkalyq ýnıversıtetiniń hımıa mamandyǵyna magıstratýraǵa qabyldanǵan. 2016 jyly Abaı atyndaǵy qazaq ulyttyq ýnıversıtetinde akademıalyq utqyrlyq baǵdarlamasy boıynsha eki kezeńnen turatyn synaqtan ótip, Lıtva elindegi 450 jyldyq tarıhy bar Vılnús ýnıversıtetinde bilim asyrýǵa múmkindik alady. Armanyna qanat baılaǵan qazaq qyzy óz oqý orynynyń demeýimen bıylǵy qyrkúıek aıynan bastap Lıtva elinde bilim alýda. Ondaǵy bilimpaz oqytýshylardyń Qazaqstan men Lıtva eliniń bilim berý jaǵynda qandaı aıyrmashylyqtar bar degen suraǵymyzǵa ol : «Qazaqstan men Lıtva eliniń joǵary oqý oryndarynyń bilim berý júıesi arasynda asa úlken aıyrmashylyq joq. Eki eldiń de oqytýshylarynyń dáris kezinde qoldanatyn ádis-tásilderi de negizinen uqsas. Aıta ketýge tatıtyny Lıtva elinde stýdentterdiń bilim alýyna tamasha jaǵdaı jaratylǵan. Mysaly, táýlik boıy jumys isteıtin kitaphana bilim nárin izdegen ár stýdentke izdenýdiń qolaıly ortasy. Bul ýnıversıtettiń kitaphanasy mol kitap qorymen baı, ári barlyq jańa tehnologıalarmen jabdyqtalǵan» dep jaýap berdi.
Ol taǵy «Lıtva elinen alǵan erekshe áserimniń biri Lıtva halqynyń ana tiline degen erekshe qurmeti men súıispenshiligi, ári mundaǵy jastardyń ana tilimen qosa aǵylshyn tilinde erkin sóılesýi boldy» deıdi.
Óz mamandyǵynyń sońyna túsip, týǵan eli men jurtyna úles qossam dep júrgen qazaqtyń qyzy tek ata-anasynyń ǵana emes, eliniń maqtanyshy bolýǵa laıyq ekenin, shetelde bilim alý úlken jaýapkershilikti talap etetinin, óz eliniń senimin aqtap, abroıyn arttyrý ózi sekildi árbir zıaly jastyń mindeti ekenin ańǵartqandaı.
Dúısenáli Álimaqyn
Abaı atyndaǵy qazaq ulyttyq pedagogıkalyq ýnıversıtetiniń 2 kýrs magıstranty
