Jylda otyz mıllıon adam kelbetin ózgertedi. Qazaqstan da álemdik standarttan qalyspaı keledi. Oǵan, eldegi plasıkalyq hırýrgtarǵa degen suranystyń jyl saıyn 20-25% ósip otyratyny dálel. Sarapshylardyń  málimetine súıensek, qazaqstandyqtar jylda syrt kelbetine mıllıon dollar jumsaıdy.

Estetıkalyq medısına bizdiń zamanymyzǵa deıin myń jyl buryn paıda bolǵan. Oǵan Mysyrda tabylǵan perǵaýynnyń denesindegi plasıkalyq otanyń izderi dálel. B.z.d myń jyl buryn ómir súrgen perǵaýynnyń sol aıaǵyndaǵy saýsaqtary teri men aǵashtan jasalynǵan eken.  Al Úndistanda 800 jyldary murynǵa ota jasaǵan. Mundaı mysaldar jetip artylady. Bul adamdardyń ádemilikke degen qushtarlyǵynyń kórsetkishi. Ár ǵasyrdyń óz sulýlyq standarttary bolǵan. Alaıda, týareg urpaǵynyń ókilderi ár ýaqytta názik jandylardyń tolyq bolǵanyn durys sanaıdy. Qyz otyrǵanda, ishindegi qatpar sany on ekige jetpese, ol kórikti adamdardyń qataryna jatpaǵan. Qazaqstandyqtar týareg urpaǵy emes, sondyqtan bizde qypsha beldi qyzdar sánde. Degenmen, barlyǵy birdeı bota kóz, alma moıyn, qyr muryn, qıǵash qas, shıe erindi bola bermeıdi. Biraq, bul olqylyqtyń  ornyn qomaqty qarjymen toltyrýǵa bolady. Qudaı bergen kelbetińizge kóńilińiz tolmasa, ortasha eseppen 9000 dollarǵa jýyq qarajatyńyzdy daıyndaı berińiz.

Kelbetińizdi ózgertý úshin ortasha eseppen qansha qarajat qajet ekenin bilý maqsatynda Almatydaǵy birqatar beldi estetıkalyq medısına ortalyqtaryna habarlasyp, baǵasyn bilgen bolatynbyz. Nátıjesi mynadaı:

Shashty keratındi túzeýleý – 30 000 tg.

Qas tatýajy – 30 000 tg.

«Keń kózqaras» (qabaqty eýropızasıalaý) – 100 000 tg.

Kirpik ósirý – 10 000 tg.

Kirpik lamınasıasy – 30 000 tg.

Qulaqtyń pishinin ózgertý – 100 000 tg.

Murynnyń pishinin ózgertý – 400 000 tg.

Erindi úlkeıtý – 400 000 tg.

Betti tartý – 1 mıllıon 700 000 tg.

Jalpy soma: 2 mıllıon 800 000 tg.

Avtory: Ásem Álmuhanbet